Matthew 16

Chin nangarjan cha ay Hesus hi atona hay milagro an panginnilaan ay ni apfalinana

¹ Immuy hachi uchumna an Farisee ja Saducee ay Hesus ta toptopngan cha. Inali cha ta ipatikhaw na hay milagro ta panginnilaan cha an narpu ay Apo Jos hini apfalinana. ² Muti agkhuy inapfulut Hesus ja inali na hi, “Nu gwan mahilip ta munlatikha ad uchu ja allon ju chi ukhaw ay nuy mun-inggwiˈgwiit. ³ Ja nu gwa ayya ta nanong ta mango-orpfob ja allon ju chi lomomlom ay nuy an arkhaw. Anila ju an mangimatunan ay ni podhonan hapiton hana matikhaw hichi ad uchu, ja anagkha mah ta achi ju imatunan hini podhonan hapiton hay hato khun maˈma-at ad ugwani an timpo? ⁴ Un aju kaykhu mumpunlahlah an tatakhu ad ugwani an timpo, ti napukhit chi nomnom ju ja chin-ug ju hi Apo Jos. Itugtukha ju an mangpfokha hi hay ipatikhaw u hi panginnilaan ju an narpu ay Apo Jos hitay apfalinaˈ. Muti ma-id, ti un angkhay hini amat chin na-at chin profeta an hi Jonah chi ipatikhaw u ay chaˈju.” Amat hichi ja empacheh Hesus ja tenaynana chicha.

Hini pfinoˈpfoˈ hachi Farisee ja hachi Saducee an hija hana khun cha itudtuchu an nehahalla

⁵ Amat hichi ja nunlukhan cha Hesus chin pfalangay ja pfinad-ang cha chin baybay. Emmatam cha hichi chammangna ja nenomnom hachi disipolo an nalichuwan cha an nunhongot. ⁶ Himmapit hi Hesus ja inali na ay chicha hi, “Elanna mangkay, achi la-ahna ja i ju inapfulut hini pfinoˈpfoˈ hachi Farisee ja hachi Saducee.” ⁷ Ja khun munhahapit chin disipolo an khun cha allon chi, “Inalin Hesus hinuy khapo ta ma-id hengngot ta-o hi tenapay.” ⁸ Aniˈ-ilan Hesus chin khun cha hapiton ja inali na hi, “Anagkha ta unagkhu hini a-id chi tenapay chi ikhimoh ju an haphapiton? Un kaykhu it-ittang hini pammati ju! ⁹ Akamoh ja achi ju ma-awatan. Nomnomon ju chin lema an tenapay an empa-an u hachi lemay lipfu an tatakhu, ja atanay pfahkit hi pinnu ju chin nahagwar? ¹⁰ Ja nomnomon ju khu chin peto an tenapay an empa-an u hachi apat hi lipfu an tatakhu, ja atana hachi otong an pfahkit hi pinnu ju chin nahagwar? ¹¹ Na-awatan ju koma an pfu-un hay tenapay chi khun u hapiton. Hay alloˈ ja achi ju apfuluton hini pfinoˈpfoˈ hachi Farisee ja hachi Saducee.” ¹² Ja na-awatan mahpay chin disipolo an pfu-un hini pfinoˈpfoˈ an mangpaluˈ-ukhu hi tenapay chi khuna hapiton, an hay penhod na an hapiton ja hini khun itudtuchun hachi Farisee ja Saducee.

Chin nangarjan Peter an hi Hesus ja hija hini Hennag Apo Jos an Mamahhod

¹³ Immuy cha Hesus han lukhar an nehnot ad Cesarea Filipos. Ja inali na hachi disipolo hi, “Ngachah tugwali chi allon hana tatakhu hi omaˈ-ataˈ an Na-ilangitan an Takhu?” ¹⁴ Tempfar cha ja inali cha hi, “Gwacha hana mangali hi un he-a hi John Bautista. Ja gwacha khu hana mangali hi un he-a hi Elijah, ja allon khu hana uchumna hi un he-a hi Jeremiah wenno hay uchumna an profeta chin nahop.” ¹⁵ Ja inali na hi, “Chaˈju mah? Ngay allon ju tugwali hi omaˈ-ataˈ?” ¹⁶ Tempfar Simon Peter ja inali na hi, “He-a hini Hennag Apo Jos an Mamahhod. He-a hini Empfalay ni mamattakhu an Jos.” ¹⁷ Ja inalin Hesus hi, “Akhaˈkhaja a, Simon an empfalay Jona, ti pfu-un takhu chi nangtuchu ay he-a ay tay an inalim, ti hi Ama an gwa ad langit chi nangtuchu. ¹⁸ Ja ha-in chi mangali ay he-a, an he-a hi Peter an hay podhona an hapiton ja pfato. Ja hitay an pfato chi pangpfangunaˈ ay ni iglesiaˈ, an hija hana tatakhu an mamati ay ha-in. Ja anong un hini apfalinan chi patoy ja achi na apfakon chicha. ¹⁹ Ja ichat u ay he-a hini torpfoˈ ni Pun-ap-apugwan Apo Jos. Hotti nu gwacha chi achim i-apfulut heto lota ja achi khu mi-apfulut ad langit. Ja hini i-apfulut mu heto lota ja mi-apfulut khu ad langit.” ²⁰ Ja naˈnaˈ-allon Hesus hi, “Achi ju pay epfaˈpfaag hachi tatakhu an ha-in hini Hennag Apo Jos an Mamahhod.”

Chin nangpa-innilaan Hesus ay ni umali an atajana

²¹ Nete-a ay chuy ja khun ipaˈpa-innilan Hesus hachi disipolo hana umali an punlikhatana. Khuna allon hi, “Mahapor an umujaˈ ad Jerusalem, ti mahapor an hortapoˈ hana cho-or an likhat an epahaˈpfat hay hana a-ap-apon chi Hudju ja hana a-ap-apon chi papachi ja memehtolon chi urchin Moses. Patajonaˈ muti ay ni me-atloh arkhaw hot mummahuwaˈ.” ²² Chengngor Peter hitay an inalin Hesus ja enegnad Peter hija ja inali na hi, “Achi maphod an im hapiton chi amat hina, Apo, ti achi mapfalin an ma-at hay hato ay he-a!” ²³ Muti nunchu-ug hi Hesus ja inali na ay Peter hi, “Makak a, Satanas, ay ha-in! Achi mapfalin an halegwaonaˈ ay he-a. Ti hini podhom ja pfu-un hini penhod Apo Jos, an un meˈ-ampoy ay ni penhod chi tatakhu.”

²⁴ Inalin Hesus hachi disipolo na hi, “Hini mamhod an midchum ay ha-in ja mahapor an chuˈkhona hini piˈtakhuwana heto lota ja pi-ukhona hini kros na, ja inunuchaˈ. ²⁵ Ti hini takhu an mangpa-ennongan ay ni piˈtakhuwana heto lota ja angkhay ja achi miˈtakhu ay Apo Jos. Muti hini takhu an man-ug ay ni piˈtakhuwana heto lota khapo hi pangunuchana ay ha-in, ja miˈtakhu ay Apo Jos hi ma-id chi pogpogna. ²⁶ Anong un alan ni takhu an amin chi enachangjan ay tay lota ja ma-id pfalor na nu un ma-utaw chamchama hini piˈtakhuwana ja nadusa hija hi ma-id chi pogpogna. Ma-id ichat na hi hugwar ni piˈtakhuwana. ²⁷ Mumpfangngachaˈ an Na-ilangitan an Takhu an magwachaan ay ni apfalinan ja pfinang Apo Jos ja itnud u hana angher, hot oha-ohaoˈ an amin chi tatakhu an ichatan hi lagpfu na an me-okor ay ni neˈ-at na. ²⁸ Muti umannung hitay alloˈ an gwacha hana uchumna ay chaˈju an achi matoy hot ah-upan cha hini pangte-aaˈ an Pun-ap-apugwan an Na-ilangitan an Takhu.”