13
Han pangngarig chin khun munhapuwaˈ hi pfugwa
1 Ay chuy gwot an arkhaw ja nakak cha Hesus ay chuy an pfalay ja immuy cha hichi pingngit chi baybay, ja inumpfun hi Hesus. 2 Ja munhihiˈ-ig hachi atakhutakhu an mali-ub ay hija, hotti immuy nunlukhan han pfalangay an nebnebtaw ay chuy palantag an timmataˈchukhan chin cho-or an tatakhu, ja inumpfun ta muntuchu. 3 Ja cho-or chin intuchun Hesus an in-ari-arig na. Ja inali na hi, “Gwa han ohan takhu an immuy nunhapuwaˈ hi pfugwa hichi hapfar na. 4 Khun munhapuwaˈ ja nepochag chin uchumna ay ni chalan, ja numpanga-ali chin hagwiti ja nun-a-an cha. 5 Chin uchumna ja nepochag chin mapfinato an lota. Khagkhaju cha an hemmangaw ti maymayyapit chin lota 6 muti chin apfi-ahan chi hukhit ja naˈleng, ti un nitutu-i chin hemmangagwana. 7 Nepochag khu chin uchumna chin achoˈlan chi holoˈ an nun-apakhatan. Un chaagkhu hemmangaw ja emmaˈlap hachi nun-apakhatan an holoˈ ja hinaˈpfungan cha chin nitanum hotti agkhuy penomhod. 8 Ja chin uchumna ja nepochag chin maphod an lota, ja numpangahangaw cha ja numpangapfunga cha. Ja hachi uchumna ja pfimmunga hi hinkhakhahot, ja hachi uchumna ja pfimmunga hi unum chi polo, ja hachi uchumna ja pfimmunga hi tolom polo.” 9 Ja inalin khu Hesus hi, “Pa-ennongan ju an munchongor ay tay alloˈ.”
10 Immuy hachi disipolo ay Hesus ta i cha epfokha hi, “Anagkha mah ta pangngarig hini atom an muntudtuchu ay cha tay an tatakhu?” 11 Ja inalin Hesus hi, “Aa, ti chaˈju hana pangpa-innilaan Apo Jos ay ni omaˈ-atan ni Pun-ap-apugwana. Hana ayya uchumna an achi miˈ-unud ja achi mipa-innila ay chicha. 12 Ti hini takhu an miˈ-unud ay ni ituchuˈ ja umannung an ma-ug-ugman hini mituchu ay hija ta chomchom-or chi annilaona. Hini ayya takhu an una lamangon an achi miˈ-unud ay ni ituchuˈ ja anong un hini anila na ja ma-utaw ay ni nomnom na. 13 Hotti hini atoˈ an muntudtuchu ja pangngarig, hot anong un cha khun tikhan hana khun u aton ja chengngor cha hana khun u itudtuchu ja achi cha chamchama ma-awatan. 14 Ti immannung chin impadtun profeta Isaiah hi nangarjana hi,
‘Hay hato an tatakhu, anong un nun-alu-angan hana inga cha ja achi cha chomngor,
Ja anong un himulimuli hini mata cha ja achi cha tumikhaw.
15 Empop cha hachi inga cha ta achi cha chonglon chi tukhun,
Ja inimit cha hachi mata cha ta achi cha tikhan hini umannung an omaˈ-atana.
Ja pfimmato hini nomnom cha.
Ti allon Apo Jos hi, “Anaad tugwali ta achi cha podhon an tumikhaw ja an chomngor? Ja anagkha ta achi cha podhon an matuchugwan? Ja anagkha ta achi cha chuˈkhon hana pfahor cha ja achi cha mungkalalag ay ha-in ta takhuwoˈ chicha?”’ ”a
16 Ja inalin Hesus hachi disipolo na hi, “Akhaˈkhaja aju ti mitikhaw hana mata ju ja chomngor hana inga ju. 17 Ja umannung hitay alloˈ ay chaˈju an akhaˈkhaja aju pay mu hachi cho-or an profetan Apo Jos ja magpong an tatakhu chin nahop, ti penhod cha an ah-upan an manikhaw hato khun ju tikhan muti agkhuy cha niˈtikhaw. Ja penhod cha khu an munchongor hato khun ju chonglon muti agkhuy cha ne-egngor.
18 Hotti chonglon ju ta alloˈ hini podhon tay pangngarig an hapiton. 19 Hana pfugwa an nepochag ay ni chalan ja hija hana tatakhu an nunchongor ay ni mitudtuchu an omaˈ-atan ni Pun-ap-apugwan Apo Jos ja agkhuy cha na-awatan. Ja umuy hi Satanas ta akagwona chin hapit an chengngor cha. 20 Ja hana ayya nepochag ay ni mapfinato an lota ja hija hana tatakhu an nun-an-anla an nunchongor ay ni Hapit Apo Jos ja inapfulut cha gwot, 21 muti un naˈnaˈ-omtang, ti agkhuy limmamot hini hapit na ay chicha. Unchani ta umali hana apalikhatan ja apahigwan khapo hi nangapfulutan cha ay ni hapit Apo Jos ja chin-ug chaot hini pammati cha. 22 Ja hana ayya nepochag ay ni achoˈlan chi holoˈ an napakhatan ja hija hana tatakhu an nunchongor, muti immali ayya hana pundanakhan ay tay piˈtakhuwan ja hana homalegwa an nomnom hi omachangjanan, ja nahi-ig hini Hapit Apo Jos ja achi cha miˈpfunga. 23 Hana ayya nepochag ay ni maphod an lota ja hija hana nunchongor ay ni Hapit Apo Jos ja na-awatan cha. Ja pfimmunga cha hi maphod, hachi uchumna ja hinkhakhahot chi pfunga cha, ja hachi uchumna ja hin-uˈnum chi polo, ja hachi uchumna ja hintotlompolo.”
Han pangngarig chin holoˈ an neˈhangaw chin nitanum an trigo
24 Inalin khu Hesus hachi atakhutakhu han pangngarig an amat heto, “Hinuy pipadchungan tay Pun-ap-apugwan Apo Jos ja mipadchung ay ni takhu an i na enhamar han pfinlungan an trigo. 25 Unot limmapfi an naloˈ an amin chi tatakhu ja immuy hini pfuhur na ja i na nun-epfetaˈ an intanum han holoˈ ay chuy trigo ja nakak. 26 Ja hemmangaw chin trigo ingkhana an numpfuhug, ja matikhaw hachi holoˈ an neˈhangaw. 27 Ja immuy hachi takhala na ja inali cha ay ni apo cha an nanghapfar hi, ‘Apo, maphod chin intanum mu an trigo ay ni hapfar mu, muti gwa mangkay hana holoˈ an nun-epfetaˈ ay nuy trigo.’ 28 Tempfar chin apo cha ja inali na hi, ‘Aa, ti gwacha han pfuhur ta-o an hijay nangat.’ Ja inali cha hi, ‘Ti podhom ayya ja i mi pumpfaˈkhut hinuy holoˈ.’ 29 Muti inali na hi, ‘Achi ju, ti unchani ja niˈpfaˈkhut hana trigo. 30 Anong kay ja neˈ-otong hana holoˈ ingkhana an machakngan chin ahebtoˈ. Ja alloˈ hana mumpfotoˈ ta pahhunon cha an aanun hana holoˈ ja pfina-ud cha ta i cha poolan, ja un chaot etoloy an pfot-on hinuy trigo ta amungon cha ja i cha emponpon ay ni alang u.’”
Han pangngarig chin pfugwan chi lakotta
31 Intuchun khu Hesus han pangngarig ja inali na hi, “Hini Pun-ap-apugwan Apo Jos ja mipadchung ay ni ohan pfugwan chi lakotta an intanum han takhu ay ni hapfar na. 32 Hija hini it-ittangan an amin hi pfugwa heto lota muti hemmangaw ayya ja khun um-umuy chi arkhaw ja umajiw ja ot-ottongan mu hay hana uchumna an hamchaˈ. Ja mapfalin an pun-emengan chi hagwiti hini hepeng na.”
Han in-arig Hesus hi pfinoˈpfoˈ
33 Ja intuchun khu Hesus han pangngarig ja inali na hi, “Hini Pun-ap-apugwan Apo Jos ja ipadchung u khu ay ni pfinoˈpfoˈ an inidchum han pfupfai han toloh halug an alena. Ja impalaˈ-ukhun chuy it-ittang an pfinoˈpfoˈ hichuy cho-or an alena.”
34 Pangngarig chin enat Hesus an nangtuchu an amin hay hato, ja ma-id intuchu na hi agkhuy na in-arig. 35 Enat na heto ta mipa-annung chin inalin chin oha an profetan Apo Jos hi nangarjana hi,
“Pangngarig hini panudtuchuˈ ay chicha,
Ja chin agkhuy nipa-innila nete-a chin narmugwan tay lota ja itudtuchuˈ ay chicha ad ugwani.”b
Chin nangpa-innilaan Hesus chin in-arig na an nepfetaˈ an holoˈ
36 Amat hichi ja tenaynan Hesus chin atakhutakhu ja himmikhop cha ay ni pfalay an nunhihittugwan cha. Ja niˈhapit chin disipolo na ja inali cha hi, “Ituchum adchiya ngay i-arig ni holoˈ an nepfetaˈ ay ni trigo.” 37 Ja inalin Hesus hi, “Hini ayya nuntanum ay ni maphod an trigo ja ha-in an Na-ilangitan an Takhu. 38 Hini ayya hapfar ja hija hitay lota. Hana maphod an pfugwan chi trigo ja chicha hana tatakhu an nidchum ay ni Pun-ap-apugwan Apo Jos. Hana ayya holoˈ ja chicha hana tatakhun Satanas. 39 Hinuy pfuhur an i nangpfetaˈ ay ni holoˈ ja hi Satanas. Hini pfotoˈ ja hija hini apogpokhan tay lota, ja hana mumpfotoˈ ja chicha hana angher. 40 Tipunon cha hachi holoˈ ja mapoolan cha, ja amat hina khu chi ma-at chin apogpokhan tay lota. 41 Ti ha-in an Na-ilangitan an Takhu, ja honakhoˈ hana angher u ta umuy cha an amin ay ni Pun-ap-apugwaˈ, ta amungon cha an amin hana nangat hi napukhit ja hana chimmalat hi pfumahulan chi ibpfa chah takhu. 42 Amungon cha ja intuud cha ay ni khun munchalang an apoy hot mun-okhab cha ja mungngelot hana pfapfa cha. 43 Ja hana ayya magpong an tatakhu ja humilaw cha ay ni Pun-ap-apugwan Ama cha an amat ay chuy hukhit. Hotti pa-ennongan ju an ekhongahan hitay alloˈ.”
Chin pangngarig chin nilulupfuˈ an pfalituˈ ja chin perlas
44 Inalin khu Hesus hi, “Hini Pun-ap-apugwan Apo Jos ja mipadchung han pfalituˈ an nilulupfuˈ han lota. Unot chinakngan han ohan takhu ja munnaud an mun-an-anla. Amat hichi ja khinapfunana ja empacheh na an i nangeplaˈ an amin hachi khina-u na ta i na pola-on hichuy an lota an nilub-an chuy pfalituˈ.
45 Hay oha khu an pipadchungan ni Pun-ap-apugwan Apo Jos ja amat ay ni mungkumerchu hi perlas an homenad an i maningit hi maphod an perlas. 46 Unaagkhu chinakngan han maˈ-aphod an perlas ja ina eneplaˈ an amin hana khina-u na ta pola-ona hichuy an perlas.”
Chin pangngarig chin tapfukur an napnu hi akhachikhachiw
47 Inalin khu Hesus hi, “Hini Pun-ap-apugwan Apo Jos ja mipadchung han tapfukur an en-apja cha hichi baybay ja cho-or hachi numpfino-ob-on an khachiw an neˈna. 48 Napnu ayya chin tapfukur ja khinujud cha ta echa-ar cha. Inumpfun cha ta polenan cha hana maphod hi ihcha ja nun-itto cha hana tempfa. Hana ayya achi mihcha ja nun-etapar cha. 49 Amat hina khu chi ma-at chin apogpokhan tay lota. Umali hana angher ta annikhon cha hana tatakhu an napukhit chi ugali na, ja annikhon cha khu hana tatakhu an ipfilang Apo Jos hi magpong. 50 Hot hana napukhit chi ugali na ja etapar cha ay ni apoy. Ja mun-okhab cha ja mungngelot hana pfapfa cha.”
51 Ja inalin Hesus hi, “Hot na-awatan ju chah an amin hay hato?” Ja inali cha chi aa. 52 Ja inali na khu hi, “Hot ma-awatan ju hitay alloˈ an nu gway mehtolon chi urchin Moses an natudtuchugwan ay ni omaˈ-atan tay Pun-ap-apugwan Apo Jos, ja mipadchung ay ni oha an nangpfalay an gway enhaˈpfa na hi pfakhu an khina-u, ja gwacha khu chi enhaˈpfa na hi napfajag an khina-u. Hot anila na an mangpapfutay ay ni mahapor na, nu pfakhu wenno napfajag.”
Chin nan-ukhan hachi eNazaret ay Hesus
53 Napfalin an intuchun Hesus hay hato an pangngarig ja nakak 54 ta numpfangngad ay ni pfuglay an emmer-erkhana. Ja immuy hichi sinagoga an i nuntudtuchu. Ja nanor hachi khun munchongor, ja inali cha hi, “An ngay nangalan tay ay ni nomnom na? Ja ngay nangalana ay ni apfalinana an mangat hi milagro? 55 Un chah pfu-un hitay hini empfalay ni karpentero? Un chah pfu-un hi Mary chi ammod na, ja a-akhi na cha James ay Josep ja hi Simon ja hi Judas? 56 Ja neˈhehetto khu hana i-ibpfa na an pfinapfai. Hot ngay nangalana ay ni nomnom na ja apfalinana?” 57 Ja angkhay hachi ja pfen-on cha. Ja inalin Hesus ay chicha hi, “Egngor hana tatakhu hini profeta an narpu hi uchumna an pfuglay muti achi cha egngor ay ni pfuglay an narpugwana ja anong un hini pamilya na.” 58 Hotti ma-id cho-or hi milagro hi enat Hesus ad Nazaret khapo hi achi cha pammatiyan ay hija.