8
Han na-unit an empatenong Hesus
1 Unot nunchayyu hi Hesus ay chuy pfuludna ja cho-or chin tatakhu an nangunud. 2 Ja gwacha han lala-e an na-unit an immuy ay Hesus an i nunheppe ja inali na hi, “Apo, otong hini apfalinam hotti podhom ayya ja epatenongaˈ.” 3 Ja hen-an Hesus chin na-unit ja inali na hi, “Podhoˈ. Hotti tomenong a.” Ja emmat an na-aan gwot chin unit na. 4 Ja inalin Hesus hi, “Achi la-ahna ja gway im pangar-arjan ay tay an na-at ay he-a. Hay atom ja umuy a ay ni pachi ta i a mumpatikhaw an temmenong a. Ja ipidaton mu ay hija hini allon ni urchin Moses an khun idaton ay Apo Jos an panginnilaan an umannung an na-aan chin unit mu.”
Chin nangpatengngan Hesus han takhalan han kapitan an eRome
5 Emmatam cha Hesus ad Kapernaum ja gwa han kapitan chi hinchalo an eRome an immuy ay hija. Ja numpakpaka-ahi 6 ja inali na hi, “Apo, gwa han takhalaˈ an un la-ahna ja napechoy ja gwa an numpepekheng hichi pfalay mi ja munnaud an malikhatan.” 7 Ja inalin Hesus hi, “Aa, umuy ta, ta epatenong u hija.” 8 Muti inalinot chin kapitan hi, “Apo, khahinon un a miˈjali hi pfalay mi. Ti pfuma-inaˈ. Ti ammuna un mu allon hi tomenong hitay takhalaˈ hot ma-at. 9 Ti anong un ha-in ja gway apoˈ an khun mamaar ay ha-in, ja gwacha khu hana hinchaloˈ an khun u pfaalon. Ti alloˈ ay ni oha an hinchalo hi, ‘Umuy a!’ ja immuy. Ja alloˈ khu ay ni oha hi, ‘Umali a!’ ja immali. Ja alloˈ ay ni takhalaˈ hi, ‘Atom hitay!’ ja enat na. Ja om-omod ay he-a an gway apfalinam an mangali hot ma-at.” 10 Ja nanor hi Hesus hi nangngolana ay tay inali na. Ja inali na hachi tatakhu an ninitnud ay hija hi, “Umannung hitay alloˈ ay chaˈju, an ma-id oha hi Hudju hi tinnig u an gway pammati na an miˈpadchung ay ni otong an pammatin tay pfu-un Hudju. 11 Alloˈ ay chaˈju hi cho-or hay hana tatakhu an marpu hana nunleneˈgwoh tay lota ta meˈ-orpfong cha ay cha Abraham, Isaak ja hi Jakob hichi Pun-ap-apugwan Apo Jos. 12 Muti cho-or hana Hudju an holag Abraham an midchum koma ay ni Pun-ap-apugwan Apo Jos ja agkhuy cha penenhod an miˈ-unud hot pakakon Apo Jos chicha ta umuy cha ay ni munhehellong. Ja mihihidchi cha an midchum hana khun mun-okhab ja khun mungngelot hana pfapfa cha.”
13 Amat hichi ja niˈhapit khu hi Hesus chin kapitan ja inali na hi, “Aa, umanamut a. Ti ma-apja hini empfokham khapo ay ni pammatim.” Ja emmat, an unot ay chuy ja temmenong chin takhala na an napechoy.
Chin nangpatengngan Hesus hachi cho-or an mumpunchokhoh an tatakhu
14 Immuy cha Hesus hichi pfalay cha Peter an adalana. Ja tinnig na chin pfupfai an ammod ni ahagwan Peter an numpepekheng, ti mapfi-ah han potang na. 15 Penchon Hesus ja na-aan gwot chin potang na. Amat hichi ja pfimmangon hitay pfupfai ja enhakhanaana cha Hesus hi anun cha. 16 Unot nahilip ja in-uy cha ay Hesus hachi cho-or an tatakhu an nun-ahuˈlungan hi napukhit an ispiritu. Ja un ammuna chin aton Hesus an munhapit hon nun-a-akak hachi napukhit an ispiritu. Ja nun-epatenong na an amin hachi mumpunchokhoh. 17 Ay tay an enat na ja nipa-annung chin inalin profeta Isaiah hi nangarjana hi, “Henaˈpfatana hana likhat ja chokhoh ta-o ta tomenong ta-o.”
Achi nalaka chi miˈ-unud ay Hesus
18 Khapo hachi cho-or an tatakhu an khun malimali-ub ay Hesus ja inali na hachi disipolo na ta mumpfalangay cha ta gway aton cha an umuy hichi chammang ni baybay. 19 Agkhuy cha pay nakak ja gwa han mehtolon chi urchin Moses an immuy ay hija ja inali na hi, “Rabbi, mimitnuchaˈ ay he-a an amin hi omajam.” 20 Tempfar Hesus ja inali na hi, “Un chah angkhiloh, ti ha-in an Na-ilangitan an Takhu ja ma-id nunhitugwaˈ hi khun u alo-an, an uchuˈchuna agkhu niˈ hay hana amunin ti gway hogong hi humigpan cha, ja hay hana hagwiti ti gway hapang hi pumpattu-an cha.” 21 Ja immuy khu han oha an disipolo na, ja inali na hi, “Apo, miˈjaliyaˈ koma ay he-a muti unchani mah ta umanamotaˈ pay ta ujaˈ ilupfuˈ hi ama.” 22 Muti inalin Hesus ay hija hi, “Achi ti tan enajakhaˈ he-a ta mitnud a ay ha-in, ti hay hana agkhuy namati chi manikhaw hay hana i-ibpfa cha an natoy.”
Chin nangpataˈchukhan Hesus han puwoˈ
23 Amat hichi ja nunlukhan hi Hesus chin pfalangay ja nitalinud khu hachi disipolo na. 24 Empacheh cha ta umuy cha ad Gadara ja himpfumagkha ja gwacha han mapfi-ah an puwoˈ. Nuntipjaˈ-ong chin chanum ja nittugwan chin pfalangay ja gwa an munlinong. Hi Hesus ayya ja gwa an nanalloˈ. 25 Immuy hachi disipolo na ja pfinangon cha hi Hesus. Ja inali cha hi, “Apo, tulungan chaˈmi! Ti tayya an marteng ta-o!” 26 Enelan Hesus ja inali na hi, “Anagkha ta toma-ot aju? Un kaykhu it-ittang hini pammati ju!” Lemmeggwat ja inhingar na chin puwoˈ ja chin chanum an khun muntipjaˈ-ong. Khemmenong cha ja munnaud an malenong. 27 Nanor hachi tatakhu an nannig ja khun cha allon hi, “Nga chah chi atakhuwan tay an takhu? Anong un puwoˈ ja chanum ja unuchon cha hini allona!”
Chin nangpakakan Hesus hachi napukhit an ispiritu an nun-ehoˈlong chin chugwa an lala-e
28 Emmatam cha Hesus hichi chammangna, an pfuglay hachi eGadara. Ja chinittum na han chugwa an linala-e an narpu cha hachi lijang an lupfuˈ ja nun-ahuˈlungan cha hi napukhit an ispiritu. Hay hachi chugwa an linala-e ja munnaud an mun-apfungot cha hotti ma-id aton chi takhu an maloh ay ni agawwachaan cha. 29 Ja iniˈgwap cha an nangali hi, “He-a an Empfalay Apo Jos! Nga chah ni atom ay chaˈmi? Un a chah immali an mamalikhat ay chaˈmi an un agkhuy pay nachakngan hini timpo na?” 30 Ja cho-or hachi apfapfupfapfuy an nenebtaw ay chuy agawwachaan cha an khun cha munhu-oy. 31 Ja numpakpaka-ahi hachi napukhit an ispiritu an inali cha ay Hesus hi, “Nu pakakon chaˈmi, ja un ami mah niˈ mehoˈlong hachi pfapfuy.” 32 Ja inalin Hesus hi, “Umuy aju!” Hotti nun-a-akak hachi napukhit an ispiritu ay cha chuy chugwa an lala-e ja i cha nun-ehoˈlong hachi apfapfupfapfuy. Ja nungkhakhayyat hachi pfapfuy an nunchayyu ja nun-ilipaw cha ay chuy baybay ja nun-arteng cha. 33 Hachi khun mumpfantay hachi pfapfuy ja nungkhakhayyat cha an nakak. Ja immuy cha hichi pfuglay an i nangpa-innila an amin chin tinnig cha an na-at hachi nahuhuˈlungan an linala-e ja hachi pfapfuy. 34 Hotti napfu-ar hachi tatakhu an i nanittum ay Hesus. Un chaot tinnig hi Hesus ja numpakpaka-ahi hachi tatakhu an nangali hi makak hi Hesus ay nuy pfuglay cha.