Matthew 2

Chin nundayawan hachi mun-anomnom an linala-e ay Hesus

¹ Netoˈkhong hi Hesus ad Betlehem an provincian chi Judea, an nun-ap-apugwan Ari Herod. Ja gwacha han mun-anomnom an linala-e an narpu hichi pfutajan omarkhaw ja immuy cha ad Jerusalem. Ja khun cha epfokha hachi tatakhu hi, ² “Chaad mah hinuy unga an netoˈkhong an Ari ju an Hudju? Ti tinnig mi han pfittuwan hichi pfutajan omarkhaw an hinjar ni nituˈkhungana, hijaot un ami immali ta i mi dayawon hija.” ³ Unot chengngor Ari Herod hitay khun allon hachi linala-e, ja napukhit hi punnomnomana, ja amat khu hina an amin hachi tatakhu ad Jerusalem. ⁴ Empa-ajag Herod an amin hana a-ap-apon chi papachi ja hana memehtolon chi urchin Moses, ja empfokha na nu ngay pituˈkhungan ni Hennag Apo Jos an Mamahhod. ⁵ Tempfar cha ja inali cha hi, “Metoˈkhong ad Betlehem an provincian chi Judea. Ti amat heto chin impatulaˈ Apo Jos ay profeta Micah hi nangarjana hi, ⁶ ‘Hichuy pfuglay ad Betlehem an provincian chi Judea, ja achi matalili-an ti mumpfalin hi ma-ar-ali an pfuglay. Ti gwa han mun-ap-apo an marpu ad Betlehem an mangpaptoˈ hana tatakhuˈ an holag Israel.’”

⁷ Amat hichi ja empa-ajag Ari Herod hachi mun-anomnom an linala-e ta un cha umi-igway ta enhanhana ay chicha nu aˈ-anuna chin nahhun an nannikhan cha chin pfittuwan. ⁸ Napfalin ja hennag na chicha an umuy ad Betlehem ja inali na hi, “Umuy aju ta ep-ephod ju an i hingiton hinuy an unga. Chinakngan ju ayya ja numpfangngad aju ta ipa-innila ju ay ha-in ta miˈjujaˈ khu an i mundayaw ay hija.”

^9,10 Napfalin an chengngor cha hitay inalin Ari Herod ja entoloy cha an umuy ta i cha hingiton hichin unga. Ja tinnig cha khu chin pfittuwan an narpu hichi pfutajan omarkhaw, ja achi anhan chin an-anla cha. Ja khun cha un-unuchon chin pfittuwan ingkhana hi intaˈchug na chin agawwachaan chin unga. ¹¹ Himmikhop cha ay chuy an pfalay ja tinnig cha chin unga ja hi Mary an ammod na. Nunheppe cha an nundayaw ay hija ja nun-ipapfutay cha hachi isagot cha an pfalituˈ, ja insenso, ja mira. ¹² Ja numpa-enop hi Apo Jos ay chicha ja inali na hi achi cha mumpfangngad ay Ari Herod. Hotti empacheh cha an umanamut an nab-on chin enenggwa cha.

Chin nangpfakgwitan cha ay Hesus hichi ad Egypt

¹³ Nakak hachi linala-e ja nun-enop khu hi Josep ja tinnig na han angher Apo Jos. Ja inalin chin angher hi, “Pfumangon a ta ipfakgwit mu hini unga ja hi ina na. Umuy aju ad Egypt ja nihihidchi aju ingkhana hi ha-in chi mangali hi mumpfangngad aju. Ti tan hay nenomnom Ari Herod ja honakhona hana umali an maningit ay tay unga ta epapatoy na.” ¹⁴ Hotti pfimmangon hi Josep ja enekak na chin unga ja hi Mary ay chuy an lapfi, ja immuy cha ad Egypt. ¹⁵ Ja nihihidchi cha ingkhanah chin natajan Ari Herod. Na-at hay hato ta mipa-annung chin inalin Apo Jos an impadtun han ohan profeta hi nangarjana hi, “Ajakhaˈ hini empfalay u ta makak ad Egypt.”

¹⁶ Unot inannilan Ari Herod an un pfinarpfalijan hachi mun-anomnom an linala-e hija ja nunhegla chin pfungot na. Hennag na hachi hinchalo na ta umuy cha ad Betlehem ja hana nun-ehnot an pfuglay ta i cha patajon an amin chi ung-ungungnga an linala-e an chugway tagwona ja mumpababa. Ti impa-innilan hachi mun-anomnom an linala-e chin timpo an nituˈkhungan ni unga. ¹⁷ Na-at hitay ta mipa-annung chin impadtun profeta Jeremiah hi nangarjana hi, ¹⁸ “Gwa han mun-okhab an magngor ad Ramah, an kumila ja omepfer. Hi Rakel ja khuna kilaan hachi empfapfalay na. Ja achi na podhon an mumpa-ay-ajub.”

Chin numpfangngachan cha Josep ad Israel

¹⁹ Nihihidchi cha pay ad Egypt chin natajan Ari Herod. Nun-enop khu hi Josep ja tinnig na han angher Apo Jos. Inalin chin angher hi, ²⁰ “Pfumangon a ta ekak mu hini unga ja hi ina na, ta mumpfangngad aju ad Israel. Ti natoy hini mamhod an mamatoy ay ni unga.” ²¹ Hotti pfimmangon hi Josep ja empacheh cha an mumpfangngad ad Israel. ²² Muti chengngor Josep an hi Arkelaus an empfalay Herod chi nepallog an mun-ap-apo ad Judea, ja temma-ot an mumpfangngad hichi. Numpa-enop khu hi Apo Jos ja inali na hi achi cha umuy ad Judea ta un cha umuy ad Galilee. Ja inunud Josep. ²³ Immuy cha ad Nazaret an provincian chi Galilee. Hot nipa-annung chin inalin hachi profeta an “Ma-ali hija an oha an eNazaret.”