Màtéwò 15

Yèésù wà wíìnyɛ̀ ti nára-ɛ̀kɔ́-gbágbóǹgbàgbò-ŋà ŋa

Náànyì-bɛ́ɛ̀#ɛ́, ɔma-ɛgbɛ́-Fàrísì† kã̀ŋa òŋu akɔ́nɛ nɛ́kpa-Ɔ̀ɖáyé† kã̀ŋa ti ńǹlú-Yèrúsàlɛ́mì wá ńɖi-Yèésù, tsí wà fɔ̀ fúu ní: 2 Kí tse tsí ɔmatsɛ́‐ɛ̀ ŋa wà bàdzɛ́ orò-gbágbóǹgbàgbò ŋa bɛ́ɛ̀ ná? À kà wɔwɔ́ ńǹrɔ́-kíbí ó wà nórò-àŋa gbà#á tã́ná dzɛŋɛ́.

3 Tsí Yèésù wà dzɔ́ŋù fú ŋa ní: Kí tse tsí àŋa gbo, à kò wà rɛ̃̀ si nɛ́kpa-Ɔ̀ɖáyé, tsí à wà tse si ńǹtá-orò tàŋa ká àŋa ni ná? 4 Ɔ̀ɖáyé fɔ̀ si ní: “Nà nɛ́ àrísá fú boba-ɛ̀ɛ òŋu ìnà-ɛ̀ɛ méèdzì.” Tsí ó fɔ̀ gbo ró ní: “Ɛnɛ yèé ré fú boba‐ɛ̀ nàmí ìná‐ɛ̀#ɛ́ ká kpaá nóòkú.”^*

5 Ó ɖi àŋa òŋu, à náa tsɛ̀kɔ́ fú ɔ̀nyà ŋa ní: Bí ɔ̀nyà-kã̀ fɔ̀ fú boba‐ɛ̀ nàmí ìná‐ɛ̀ ní iŋɛ́ yèé òŋu má fúu#ɛ́, òŋu ń tsɔ̀yà fú Ɔ̀ɖáyé, ó sã̀. 6 Kò kpã́dzú ní ɛnɛ nyɛ̀ŋɛ̀ kó nɛ́ àrísá fú boba‐ɛ̀ nàmí ìná‐ɛ̀ ró. Tsí kíbí à wà tse bɛ́ɛ̀#ɛ́, à wà tse àtsùgbé-orò yèé gbágbóǹgbàgbò ŋa ɖá si#ɛ́, tsí wà nɔ afɔ̀-Ɔ̀ɖáyé#ɛ́ ǹɖe ńnɛ̀ɛ́. 7 Ɔ̀nyà-atsendzɔdzú ŋa! Fee, afɔ̀-Yèsáyà† agbáfɔ̀-Ɔ̀ɖáyé fɔ̀†, ó dzàre ìɖéǹɖè kíbí ó gbɔ́ afɔ̀-Ɔ̀ɖáyé fɔ̀ ti nára-ŋɛ́#ɛ́. Ó ní:

8 “Ɔ̀nyà yèé ŋa nyí wà nyɛ òŋu Ɔ̀ɖáyé nákpo bɛ́ gé ni.

Ó ɖi, ìsérè-ŋa kò wà bá òŋu.

9 À wà tse nyɛ̀ŋɛ̀ nákpo gé ní àŋa wà sɛ̃ òŋu ni.

Iŋɛ́ yèé tse#ɛ́, orò yèé ɔ̀nyà ɖá#á, à náa múu kpe ɛkpa-Ɔ̀ɖáyé†,

tsí wà ń tsɛ̀kɔ́ fú ɔ̀nyà ŋa.”^*

Kí náa múnɛ gbɛ̃ɛ̃́rĩ́ nódzú-Ɔ̀ɖáyé?

(Mákò 7:14-23)

10 Tsí Yèésù kpe ɛnɛ yèé kpérí si ŋa#á, tsí wí fú ŋa ní: Ká rɛ̃tígbè, tsí ká gbɔ́ òkpì-afɔ̀ yèé bɛ́. 11 Kò tsi iŋɛ́ yèé náa lɔ nárũ#ɛ́ ní náa gbɛ̃ɛ̃́rĩ́ ɔ̀nyà nódzú-Ɔ̀ɖáyé#ɛ́. Iŋɛ́ yèé ɔ̀nyà náa fɔ̀ fùɖá nárũ‐ɛ̀#ɛ́ ní náa gbɛ̃ɛ̃́rĩ́‐ɛ̀ nódzú-Ɔ̀ɖáyé#ɛ́.

12 Tsí ɔmatsɛ́‐ɛ̀ ŋa sɔ́ tìmá‐ɛ̀, tsí fɔ̀ fúu ní: Ó mà ní kíbí ɔma-ɛgbɛ́-Fàrísì† ŋa gbɔ́ afɔ̀#ɛ́ ni kò tì ɖɔ́kpɔ fú ŋa bɔ̀ɔ̀?

13 Tsí Yèésù gbo dzɔ́ŋù fú ŋa ní: Egi kí egi yèé boba-òŋu nɔ́ɔ̀rɔ̃ kò lɛ́#ɛ́, à nákó wáa wúu taánù. 14 Ó ɖi, ká kɔ̀ ŋá dzɔ̀ɔ́ bɛ̀. Afɔ́dzú ŋa ní à dzɛ́#ɛ́, tsí à wà fa ɔ̀kpá fú afɔ́dzú ŋa gbo#ɛ́. Tsí bí afɔ́dzú-kã̀ wà fa ɔ̀kpá fú afɔ́dzú òmírɛ̃̀#ɛ́, àŋa méèdzì méèdzì#ɛ́ kpó nákó káà dzì ńfò.

15 Òkúta gboŋù, tsí fɔ̀ fúu ní: Kó nya òkpì-òwe#ɛ́ fú àŋa.

16 Tsí Yèésù ní: Àŋa gbo à kò nɛ́ ìrã̀ã́mà róò? 17 À kò mà ní iŋɛ́ kpó yèé náa lɔ nárũ#ɛ́, náa lɔ ńnɔ́, tsí à náa tsuú ɖà náàgbótsu niì? 18 Ó ɖi, iŋɛ́ yèé à náa fɔ̀ fùɖá nárũ#ɛ́ náa ti ńǹsérè-ɔ̀nyà ni, tsí òŋu ní náa múnɛ gbɛ̃ɛ̃́rĩ́ nódzú-Ɔ̀ɖáyé#ɛ́. 19 Ńǹsérè-ɔ̀nyà ní ìsérè-íbàɖí ŋa náa ti#ɛ́, tsí à náa sɔ́nɛ ní ká kpanɛ nóòkú, ká gbaya gbo, ká gbɔkɔ gbo, ká tse àlòwá gbo, ká tsolè gbo, ká tsòɖòbò gbo, ká kpe ɛ́kɔ-nɛ^* gbo. 20 Iŋɛ́ yèé ŋa wà múnɛ gbɛ̃ɛ̃́rĩ́ nódzú-Ɔ̀ɖáyé#ɛ́ ńnɛ̀ɛ́. Ó ɖi, ká máa wɔwɔ́ ńǹrɔ́-kíbí ó wà nórò gbà#á tã́ná dzɛŋɛ́, kò wà múnɛ gbɛ̃ɛ̃́rĩ́ nódzú-Ɔ̀ɖáyé.

Ɔnɔbɛ̃̀ɛ̃-ìlú-àledzò-kã̀ gba Yèésù gbɔ́

(Mákò 7:24-30)

21 Náànyì-bɛ́ɛ̀#ɛ́, Yèésù ǹɖe ńlɛ̀-ɔma-Ìyúɖà† ŋa, tsí lɔ nɔ́wɔ́-erè-Tíre òŋu Sìɖɔ̃́nì. 22 Ɔnɔbɛ̃̀ɛ̃-kã̀ wà ńlɛ̀-Kànàŋá bɛ̀, tsí ɔnɔbɛ̃̀ɛ̃#ɛ́ wá ńɖɔ̀‐ɛ̀, tsí kpé igbe ɖíɖá tɛ̀ náànyì‐ɛ̀ ní: Ɔ̀gá, ɔmalɔ́ma-Ɖàfíɖì† kó rí ànyínɔ́ fú òŋu ɖé ooò. Edzò†-kã̀ wà ɖɔ́kpɔ fú ɔma-òŋu ɔnɔbɛ̃̀ɛ̃, tsí wà múu réré kpíkpɔ̀.

23 Ó ɖi, Yèésù kò tsí arũ si ńnɛ̀ fúu. Tsí ɔmatsɛ́‐ɛ̀ ŋa sɔ́ tìmá‐ɛ̀, tsí wà fɔ̀ fúu ní kó lé ɔnɔbɛ̃̀ɛ̃#ɛ́ lɔ.^* Ó ɖi, bɛ́ɛ̀ gé ní ó wà ɖúgbe tɛ̀ náànyì-àŋa bàa#á ńnɛ̀ɛ́.

24 Tsí Yèésù dzɔ́ŋù ní: Ɔma-ìlú-Ìsàràyɛ́lì† ŋa wà si kíbí àgùɖã̀ yèé nɔ̀ ŋa#á. Tsí Ɔ̀ɖáyé bɛ òŋu wá fú ŋa.

25 Ó ɖi, ɔnɔbɛ̃̀ɛ̃#ɛ́ tédzú lɔ káà kálɛ̀ nábɛ́‐ɛ̀, tsí ní: Ɔ̀gá, kó gbà fú òŋu ɖé.

26 Tsí Yèésù dzɔ́ŋù ní: Kò sã̀ ní ká kɛ́ dzídzɛ yèé ɔma ŋa nákó dzɛ#ɛ́, tsí ń sɔ fú adzá ŋa.

27 Tsí ɔnɔbɛ̃̀ɛ̃#ɛ́ gbo fɔ̀ fúu ní: Ɔ̀gá! Òtítɔ́ ni. Ó ɖi, adzá ŋa náa sì dzɛ àbùbɔ̀ yèé ŋa náa tsubú ńkpɔ̃rɔ̃-olówó-ŋa#á nɔ̀.

28 Tsí Yèésù wà fɔ̀ fúu ńǹkɛ̀ɛ́ ní: Ɔnɔbɛ̃̀ɛ̃ yèé, ó karalé si ńǹtá-Ɔ̀ɖáyé héŋú. Ó ɖi, iŋɛ́ yèé ó wà wò#ɛ́ kó tsɛ fúu. Tsí náàsòkò nyɛ̀ŋɛ̀ tútútú#ɛ́, àrɔ̃̀#ɛ́ tã́ fú ɔma‐ɛ̀#ɛ́.

Yèésù bɔ àkɔ̃̀rɔ̃̀ kpíkpɔ̀, tsí sɛ̃̀ ɔnɔkɛ̃̀ɛ̃ ɛgbàá ɛgbàá ɔ̀nà méèdzì (4000) ńdzídzɛ

29 Yèésù ǹɖe nérè-bɛ̀, tsí lɔ nétí-oɖò-Gàlìlé. Kíbí ó tó ńbɛ̀#ɛ́, ó káà gu òkè-kã̀ lɔ, tsí lɔ káà dzokó si bɛ̀. 30 Tsí ɔ̀nyà ŋa tsɛ́ kì, tsí wà lɔ ńɖɔ̀‐ɛ̀. À gbɛ̃́ arɔ ŋa òŋu afɔ́dzú ŋa, tsí gbɛ̃́ ɛnɛ yèé kò nɛ́ ìwàlɛ̀ ŋa#á òŋu mùnù ŋa má nára-àkɔ̃̀rɔ̃̀ òmírɛ̃̀ ŋa gbo wáa sɔ nábɛ́‐ɛ̀, tsí ó bɔ ŋá. 31 Tsí kíbí ɔ̀nyà ŋa rí ní ó tse tsí mùnù ŋa wà wíìnyɛ̀, tsí ɛnɛ yèé kò nɛ́ ìwàlɛ̀ ŋa#á gbo wà ɖi abarakpá, tsí arɔ ŋa gbo wà rɛ̃̀ rere, tsí tse tsí afɔ́dzú ŋa gbo wà rírã#á, ó mù ŋá, tsí à nyɛ Ɔ̀ɖáyé yèé ɔma-Ìsàràyɛ́lì† ŋa wà sɛ̃̀#ɛ́.

(Mákò 8:1-10)

32 Yèésù kpe ɔmatsɛ́‐ɛ̀ ŋa, tsí fɔ̀ fú ŋa ní: Inɔ́-ɔ̀nyà ŋa#á wà nyɔ́ òŋu, iŋɛ́ yèé tse#ɛ́, títí ńǹdzɛ́ɛta ní à wà bá òŋu si#ɛ́, tsí dzídzɛ kò wà fú ŋa ró, tsí ká dzɛ. Ó ɖi, òŋu kò wò ní òŋu kó fɔ̀ fú ŋa ní ká bɔ̀ lɔ bɛ́ɛ̀ nébi, àtsùgbée ara kó máa káà kú ŋa, tsí ká káà kí nɔ́ɔ̀nà.

33 Tsí ɔmatsɛ́‐ɛ̀ ŋa bèrèé ní: Ńbisí àŋa nákó rí dzídzɛ ti, tsí ɔ̀nyà ɛ̀gbɛ̀lɛ́ɛ̀gbɛ̀ yèé kó dzɛ, tsí yó kíbí ńbíbɛ́ kí taánù#ɛ́.

34 Tsí Yèésù wà bèrè ŋá ní: Kpɔ̃́nɔ́ mɛ́ɛló wà nɔ́wɔ́-ŋa bɛ̀? Tsí à ní: Kpɔ̃́nɔ́ méedze òŋu ɛdzã gbo oɖé.

35 Tsí Yèésù fɔ̀ fú ɔ̀nyà ŋa#á ní: Ká dzokó ńlɛ̀ lɔ. 36 Tsí ó kɛ́ kpɔ̃́nɔ́ méedze#ɛ́ òŋu ɛdzã ŋa#á, tsí ó ɖɔ́kpɛ́ fú Ɔ̀ɖáyé, tsí ó tsɛ́ ŋa, tsí ń bɔwɔ́-ɔmatsɛ́‐ɛ̀ ŋa, tsí àŋa gbo à ń kpɛ̃́ fú ɔ̀nyà ɛ̀gbɛ̀lɛ́ɛ̀gbɛ̀ ŋa#á. 37 Tsí àŋa kpó à dzɛ títí yó. Tsí à se àbùbɔ̀ yèé kílɛ̀ ŋa#á kɔ̃́ agbã̀ méedze. 38 Ɛnɛ yèé ŋa dzɛŋɛ́#ɛ́, à wà dzɛ́ ɔnɔkɛ̃̀ɛ̃ ɛgbàá ɛgbàá ɔ̀nà méèdzì (4000). Ó ɖi, à kò kã ɔnɔbɛ̃̀ɛ̃ ŋa òŋu maɖé ŋa si ńnɛ̀. 39 Tsí Yèésù fɔ̀ fú ŋa ní ká lɔ ńǹkɛ̀ɛ́, tsí ó káà wɔ̀ nɔ́kɔ̃̀-odzómi, tsí lɔ ńlɛ̀-Màgàɖánì.