6
Hay Apa"ian ad Israel
1 Ya ha"in an hi Amos ya inali' di,
“Mahmo' ayun malenggop an ma'al'alina tatagud Jerusalemb
ya ad Samariac an pumbagan di tataguh badang!
2 Nomnomonyuy na'at hinan siudad ad Calneh,d ya ad Hamath,e ya ta"on hi un ad Gath hidid Philistia.
Ta"on ahan unyu alyon di nidugdugah di abalinanyu ya un danen babluy
mu undan adi ayu goh mapa"i?
3 Ya manu ti adiyu pohdon an nomnomnomon nan umalin ligat ay da'yu,
mu hay immannung ya ag'agan madatngan nan punhumalyaan Apo Dios ay da'yun
dumalat nan nun'appuhin ato'atonyu.
4 At da'yun adadangyan an nun'angina ya mun'aphod di kamana
an un hay mali'li'uh an mangih'ihdah nan mun'ataban kalnilu ya baka
ya nidugah di ma'at ay da'yu.
5 Ya ta"on goh un da'yun malgom di ikankantana ya pina'unudanah nan alpa,
ya wa ayan nun'amma ayuh kantayun ay ayu nala'eng an umat hi anala'eng din Alin hi David.
6 Ya inumonyun amin di ma'inum an pohdonyun inumon,
ya mun'usal ayuh nan na'angnginan bangbanglu,
mu awniat munlungdaya ayuh a'ubahanyun i'Israel.
7 At hiyanan da'yuy mahhun an miyuy hinan adagwin babluy an ay ayu balud hidi,
at mapogpog din gunyu umamlo'amlongan.
8 Ti nan na'abbagbagtun Dios ya inalinay,
Adi' ahan pohdon nan pumpahiyaan nan tatagu' an i'Israel ya an amin nan ipahiyada.
At hiyanan idat'uh nan buhulda nan kapitulyuda ya an amin nan wah di.”
9 At ha"in an hi Amos ya inali' di, “Gulat ta waday himpuluh nan tatagun na'angang hinan ohan abung ya matoyda goh. 10 Ya gulat ta umuy nan tulang nan natoy an napto' an mangipapto' an manghob hi odolnaf ya hanhananah nan ohan na'angang an alyonay, Waday na'angang hi agguy natoy hi ibbam? ta alyonay, Mi'id! ya alyon nen ibanan hiyay, Dindinongta ta adita haphapiton nan ngadan Apu tu'u ta adina innilaon hi unta wah tu!
11 Mu wa ay ta hi Apo Dios di humapit
at umannung an mun'apa"i nan o"ongol unu i"itang an a'abung!
12 Ya nomnomonyu an undan mabalin an bumi'ah nan kabayuh nan mabinatu unu ma'aladu?
Mi'id ahan di nomnom nan mangibagah umat hina!
Mu umat hina ayu an mi'id di nomnomyun pumbalinonyuy nepto' an pangat hi umat hi bininu,
ya pumbalinyu goh di maphod hi adi.
13 Ya nidugah di pangiyamlonganyuh nan nanakupanyud Lo Debarg
ya inaliyu goh di mabi'ah ayu tuwalih din nanakupanyud Karnaim.”h
14 Mu inalin Apo Dios an nidugah di abalinanay,
“Da'yun i'Israel ya ag'aga mahkay at ipa'ali' di tindalun malpuh udum an babluy
ta hakuponday babluyyud Lebo Hamath hi engganah nan Nundotal an Arabah hi appit hi agwan.”