5
Hay Lumugwaan ya A'al'alu'an nan i'Israel an Muntutuyu
1 Ya ha"in an hi Amos ya inali' di, “Da'yun i'ibba ad Israel ya donglonyuh ten kantan mikantah nan way matoy an ikanta' ay da'yu:
2 Da'yun i'ibba' ad Israel an pohpohdo'
ya mipaddung ayuh nan nagah ya nunnonong hinan nagahana
ti mi'id di bumadang hi mamangon ay da'yu!
3 Ya manu ay umat hinay ikanta' ti nan Dios an na'abbagbagtu ya inalinay,
Nan i'Israel di mannag hinan hinlibun tindalun umuy mi'gubat
mu un hinggahut di ma'angang hi mumbangngad.
Ya honogonda ay goh di hinggahut an umuy mi'gubat
ya un himpuluy ma'angang hi mumbangngad.
4 At hiyanan mahapul an mumbangngad ayu ta Ha"in di unudonyu,
at matagu ayu!
5 Mu adi mahapul an umuy ayud Bethel, ya ad Gilgal, unu ad Beersheba an umuy mundayaw
ti ad Bethel ya mapa"i, at mi'id hulbin nen babluy.
Ya nan bimmabluy ay ad Gilgal ya miyuydah udumnan babluy!”
6 At ha"in an hi Amos ya ten alyo' di,
“At hiya nongkay an mahapul an mumbangngad tu'un Apo Dios,
at matagu tu'u!
Ti adi tu'u ay umunud ay Hiya at umali an ay apuy ta ubahon ditu'u,
mu mi'id hinan dayawonyud Bethel di way olognan mangdop enen ay apuy!
7 At da'yun nappuhiy pangatna an numbalinonyuy immannung hi layah
ya adi maphod di pangatyuh nan nun'awotwot an mipaligligat!
Ya nomnomnomonyu an hi
8 Apo Dios an nunlumuh nan bittuan an mungngadan hi Pleiadesa ya Orionb
ya Hiya goh di mangipapatal hinan hehellong,
ya umat goh an Hiyay mangipahelong hinan mapatal.
Ya ta"on un nan danum ya akuponah baybay,
ya enggahnah tun luta.
9 At undan adi hin'emat di pumpama"ianah
nan nun'ihamad di allupna an babluyc
10 ti da'yun i'ibban holag Israel ya abohlanyu nan tatagun makulug di pamanuhna
ya nan mangibaag hi makulug.
11 Ya hay oha goh ya paligatonyu nan nun'awotwot ti pilitonyu didan umidat hi inhabaldan da'yu.
At hiyanan ta"on hi un nihamad nan mun'aphod an binattun a'abungyu
ya adi ahan miyabulut an munhitu ayun dane.
Ya ta"on hi un ayu nuntanom hi greyp an ma"aphod di tigawna
mu bo'on da'yuy manginum hinan miyamman ma'inum an malpun danen intanomyu
12 ti inila' an nidugah di baholyu ti nan do'ol an gunyu ina'inat an nun'appuhih nan i'ibbayu.
Ya abohlanyu goh nan tatagun makulug di pangatda,
ya abulutonyu nan mili"ud an lagbuyu,
ya pikuwonyuy makulug an pamanuhdah nan nun'awotwot.
13 At hiyanan da'yun adi me'yat hinan nun'appuhi
ya maphod un nonong ya didindinong ayu.
14 At hay itugun'un da'yu ya nan maphod di atonyu ta bo'on nan nun'appuhi ta way atonyun tumagu!
At umannung an hi Apo Dios an nidugah di abalinana ya mimiddum ay da'yu
an hiyah ne din gunyu inali!
15 At pahiwonyu nan nun'appuhi ta nan maphod di pa'appohpohdonyu,
ya nan makulug di pangabakonyuh nan punhumalyaan!
At olom man ya hom'on ditu'un holag Israel an na'angang ay Apo Dios an nidugah di abalinana.
16 Mu dumalat nan numbaholanyu ya umat goh hituy hinapit Apo Dios an inalinay,
Do'olday nidugah an umanebel an kumanilah nan akalakalata ya hinan plasa,
at ta"on nan munhabal ya middumdan ahi'e'ebel.
17 Ya umat goh hinan tatagun mumpuntamuh nan galden an ahipopokawda.
An amin hatu ya ma'at hi pummoltaa' ay da'yu!
Hiyah ne hinapit Apo Dios.”
Nan Gutud di Algaw Apo Dios
18 Ya ha"in an hi Amos ya inali' di,
“Mahmo' ayun manahalimid hi adatngan di algaw an punhumalyaan Apo Dios!d
Ti henen gutud ya umipata'ot ahan an ay helong an adi mapatal!
19 Ti henen gutud goh ya umat ayuh nan tagun lumayaw ta melwang hinan layon,
mu unnaat damuwon goh nan mata'tan an bear!
Ya ta"on goh un hay abungnay lumayawana
mu wa ay ta eh'anay ngamaynah nan da'lig ya inalat di ulog!
20 Ya henen gutud goh an punhumalyaan Apo Dios
ya nidugah an paddungnay pa'ahhelong nongkay an mi'id di amlong!”
21 Ya hay hinapit goh Apo Dios ya inalinay,
“Ma'abbungota' hinan ngilinyun a'am'amunganyu an alyonyuh pundayawanyun Ha"in!
22 Ti wa ay ta onngana' hinan Onong an Moghob ya Onong an Ma'an ya adi' ahan abuluton,
ya umat goh hinan animal an impatabayun e'nongyun Ha"in hi Onong di Pi'lenggopan!
23 At idinongyu nan malgom an kantayu,
ya ta"on un nan gangoh di bi'ungyue ti adi' pohdon an donglon!
24 Mu hay pa'appohpohdo' ya nan nahamad ya ma'andong an pangat di inaynayunyu
an umat hinan danum hinan wangwang an adi matmatdu'!
25 Da'yun i'Israel,
bo'on Ha"in di nange'nongan din o'ommodyuh nan gunda ene'nong
hidin awadandah nan mapulun an mid ah nunhituh din napat an tawon.f
26 Ti henen bulul an hi Molekg di ngadanan nihinan nan balballuy an inta'ita'inyu di dinayawyu,
ya dinayawyu goh nan umat hi bittuan an hi Rephan!
Didanay bulul hi inyammayu ta dinayadayawyu an bo'on at goh Ha"in!h i
27 At agayu ta diday odnanyuh nan pangipa'aya' ay da'yuh nan niyadagwin babluy an malauhan ad Damascus.j
Hiyah ne hinapit Apo Dios an nidugah di abalinana.”