13
Hay Nipa'innilah Amoltaan ad Babylon
(Isa. 21:1-10; Jer. 50:1-51:64)
1 Hiyah te impa'innilan Apo Dios ay ha"in an hi Isaiah an hina' Amoz hi ma'at hi ad Babylon.a 2 An inalinay,
“Itayunyu nan bantilah nan tulid di duntug
an mi'id di ayiw ta ma"attig.
Ya nun'it'u'yuh nan titindalu ta hogpondad Babylon
an babluy nan mumpahiyan tatagu.
3 Ti Ha"in an Dios di nannag hinan na'na'unnud an tindalu'
an mun'abungot ya nun'atulid ta pa"ionda nan numpunhituh dib
ti nidugah di bohol'un dida.”
4 At ha"in an hi Isaiah ya inali' di,
“Madngol di helhel nan do'ol an tatagun na'amung hinan duntug.
Ti nan nidugah di abalinanan Dios ya inamungna daten titindalun nalpuh nan abablubabluy
ta midadaandan mi'gubat.
5 Dida ya nalpudah adagwin babluy
ta diday honogon Apo Dios an mama"in amin hinan babluy ad Babylon
an gapuh nan nidugah an boholna.
6 At da'yun amin an tataguh tun luta ya oltonyuy kilayuc
ti adi mahkay madnoy at madatngan nan algaw an pama"ian nan nidugah di abalinanan Dios ay da'yu.
7 At awniat nidugah an wumogwowogwog di taguh ta'otda,
8 at mami'id di tulidda an umuy mi'gubat.
Ya nidugah di holtapondah dogoh
an umat hinan babain maligatan an muntungaw.
At gunda muntoto"olan,
ya ma"attig hi angahday ta'otda.
9 Mu anakkayah henen algaw an umalian Apo Dios
an mipattig nan nidugah ahan an bungotna ti pa"iona tun luta,
at adi mahkay mababluyan.
Ya ni'yubahnan amin nan nun'abaholan.
10 Ya nan numbino'ob'on an bittuan ad daya, ya bulan, ya algaw
ya adida mahkay bumnang.”
11 Ti inalin Apo Dios di,
“Moltao' tun luta ya an amin nan tatagun nun'abaholan.
At mapogpog an amin nan mahapit ya mumpahpahiyan tatagu
ya nan mangipaligligat hi ibbadan tagu.
12 At hay gutud hi a'atana ya nahnotday ma'angang hinan tatagu
an umat hi a'itang di balitu' ad Ophir.
13 Ti Ha"in an nidugah di abalinanan Dios ya ipa'dam'uy bungot'u
ta iwogot'ud abuniyan ya tun luta ta mahlig hinan nipabunana.”
14 Ya ha"in an hi Isaiah ya inali' di,
“Hanan niyuy ad Babylon ya lumayawdah babluyda
an umatdah nan ulha an anuponda dida.
Ya umatda goh hi kalnilun mi'id di mangipapto' ay dida.
15 At wa ay atog ta ah'upanda dida ya pinatoyda,
16 ya hana ay an ung'ungungngan imbabaluyda ya pumpolohda,
ya nun'ihaplatda didah hinagangda.
Ya nunhogopday a'abungda,
ya nun'aladay gina'uda.
Ya ta"on hi un nan binabain ahawada ya pilitonda didan elo'.”
17 Ya inalin Apo Dios di,
“Ta"on hi un umat hinay ma'at ta pabungto' nan iMediad ta gubatonda nan iBabylon.
Dida ya adi mabalin hi unda mabayadan hi silver unu balitu',
18 at pumpanada nan mumpangilog an linala'i,
ya mi'id di homo'dah nan ung'ungungnga ya nan ungunga.
19 Manu ti ad Babylon di ma"aphod an babluy hitun luta,e
at hiyay ehngel nan bimmabluy hidi.
Mu Ha"in an Dios ya pa"io' ta umat hi ad Sodom ya ad Gomorrah.
20 At hiyanan mumbalin nongkay hi mapulun hi enggana,
at ta"on hi un nan Arabo an lumane'le'od ya adida mungkampuh di.
Ya umat goh hinan mumpumpapto' hi kalnilu an adida iyuy hidiy kalniluda.f
21 Mu hay umuy hidi ya nan animal hinan mapulun
an umat hi gandeng, ya kuup, ya nan udum.
22 At hay madngol mahkay hidi ya nan alawaaw di animal an ma'alih hayina ya jakal
hinan mun'aphod an a'abung hidi ti dida mahkay di munhituh di.
At heten apa"ian ad Babylon ya adi madnoy at madatngan.”