9
Nan Maphod an Pangayagan nan ay Babain hi Anomnoman hinan Tatagu
1 Ya intuluy Solomon an nangulgud hi nipa"el hinan imbaluynan inalinay,
“Hi Anomnoman ya paddungnay impiyammanay abungna an pituy tu'udnah appit
hi dola ta way mamdon hi atap.
2 Ya indadaanay ma"aphod an gotad ti impipaltinay animal,
ya hinubulana nan bayah,
ya impaphodna nan lamehaan hi pangananda.
3 Ya unat goh nidadaan an amin ya hennagna nan binabain tagalana ta umuydah nan
atata'nang an lugal eden babluy an mangayag hinan tatagu ta ibugawdan alyonday,
4 Da'yun nawongwong ya da'yun nakudang di nomnomna!
Ma ayu ta me"an ayun Ha"in hi abung'u
5 ti impidadaan'u nan mapolhat an ma'an,
ya wada goh di hinubula' an bayah!
6 Maphod ahan hi unyu taynan nan nawongwong
ti umannung an ma"aphod di nitaguanyuh un ayu manomnoman
ta way atonyun manginnilah maphod hi atonyu!
7 Gulat ya tugunonyu nan ma'angohhoy an tagu at da'yuy angadnana,
ya wa ay goh ta ihingalyu nan tagun nappuhiy ato'atona at ipabangngadnay nappuhin da'yu.
8 At adiyuat ni' tugunon nan ma'angohhoy an tagu ti abohlan da'yu.
Mu nan nanomnoman an tagu ya adi umat hina ti ta"on hi unyu ihingal hi un way ibahhawana ya un da'yuat pa'appohdon.
9 Immannung an od'odolnah unyu itudtuduwan nan nanomnoman an tagu ti iyal'allanan manomnoman,
ya ta"on hi unyu itudtuduwan nan tagun nahamad di pangatna ta ma'ud'udman di inilana.
10 Ya gulat ta pohdonyun luma'eng at hay mahhun hi atonyu ya e'gonanyuh Apo Dios
ti nan tagun nanginnilah aat nan nahamad an Dios ya hiyay nanginnilah nan nepto'.
11 Innilaonyu an nan anomnoman di dumalat hi pi'taguanyu ta ma'ud'udman di algawyuh tun luta.
12 Ya gulat ta manomnoman ayu at umannung an waday lagbuyu,
mu gulat ta pahiwonyuy luma'enganyu at hiyay dumalat hi pumuhianyu.
Hiyah ne inalin Anomnoman.”
Hay Pangibagan nan ay Babain hi Anomnoman hi Aat nan Nappuhin Ayag nan ay Babain hi Umilugtap hinan Tatagu
13 Ya intuluy goh Solomon an inalinay, “Wada han ay babain putan hi Umilugtap di ngadana
an mango"ongol an humapit, ya nawongwong,
ya mi'id ahan di baina.
14 Hiya ya un u'umbun hinan pantaw di abungnan wah nan nabagtun lugal hinan babluy,
15 ya umaya'ayag hinan way maluh an manapdapuh hinan ayanda.
16 Ya al'alu'ona nan nawongwong an alyonan diday,
Humigup ayuh tun abung'u!
Ya alyonah nan nakudang di nomnomnay,
17 Munlameeh nan na'akaw an danum hi inumon,
ya maphod di tamtam nan na'akaw an tinapay hi onon hi un mi'id di mannig!
Hiyah ne hapitona.
18 Mu Ha"in an hi Anomnoman ya alyo' ay da'yuy,
Ihamhamadyu ni' ti danen gun ma'ayagan ya agguyda inilah un an amin di umuy hinan abung Umilugtap
ya mun'atoydan wah didah nan maluhung an wadan di nun'atoy!”
Hiyah ne angunuh ten nipa"el an intugun Solomon hinan imbaluyna.