8
Paddungnay Mun'ayag nan ay Babain hi Anomnoman
1 Ya intuluy Solomon an nangulgud hi nipa"el hinan imbaluynan inalinay,
“Mu wadah Anomnoman an paddungnay umaya'ayag ay da'yu,
ya Hiyay gun humapit an mangipa'innilah atonyu.
2 Ya numbino'ob'on di tuma'dogana ti tuma'dog an mangayag ay da'yuh nan ata'nang an duntug
ya hidih nan way nunhappangan di dalan,
3 ya hidih nan delloh di pantaw hinan pange'wan an umuy hinan babluy,
ya hidi goh hinan way pantaw.
Ya olto'oltonan umaya'ayag an alyonay,
4 Da'yun linala'i ya ta"on un da'yun ami'amin an tatagu,
5 ya namama ay da'yun nakudang di nomnomna unu manangpah,
ya donglona' ni' ta luma'eng ayu ta manomnoman ayu!
6 Donglonyu ahan heten nahamad an tugun'u
ti an amin nan itudu' ay da'yu ya makulug.
7 Immannung an amin di alyo' ya ma"akkulug
ti ha"in ya pahiwo' di layah.
8 An amin di hapito' ya immannung an mi'id ah nibahhawana
ti adi' ahan hapiton di layah unu napiku.
9 Ya inila' an nan nanomnoman ya nan nanginnila ya abulutonday alyo'
ti immannung an nepto' an madadawoh hi innilaon.
10 Hay alyo' ay da'yu ya pa'appohdonyu nan tugun'u ya un nan silver,
ya pot'onyuy bumadang hi luma'enganyu ya un nan na'ahhamad an balitu'.
11 Ti nahamhamad hi Anomnoman ya un nan mapla'an an batu,
ya mi'id ah udumnah amnawanyuh nipaddung ay Anomnoman.
12 Ya humapit hiya, ya inalinay, Ha"in an hi Anomnoman ya ihnay mi'hitun Ha"in hi abung'u an da Pun'awat ay Panginnila,
ya hi Abalinan an Manginnilah nan Na'ahhamad.
13 Ya kulugonmi an hay pange'gonan ay Apo Dios di hiyay pamahiwan hinan nappuhin pangat,
ya abohlanmi da Mumpahpahiya ay Munlayah,
ya hi Mangamangat hi Nappuhi, ya Hi Nibahhaw di Panapitna.
14 Ya Ha"in di mangipanomnom hi maphod an punnomnoman ya nan maphod an tugun,
ya Ha"in goh di alpuwan di panginnila ya nan nidugah an abalinan.
15 Ha"in di mangidat hi abalinan nan a'alih nan punhaadanda,
ya badanga' goh nan a'ap'apun mangiyammah nan makulug an uldin.
16 An amin di mumpapto' eten luta ya Ha"in di bumadang ay didah nan tamuda
an ta"on un nan linala'in imbabaluy di ali unu nan malgom an a'ap'apu.
17 At Ha"in an hi Anomnoman ya hay pohdo' ya nan immannung an mamhod ay Ha"in,
ya an amin nan manganap ay Ha"in ya ah'upana'.
18 Ya ma"aphod nan gun mitnud ay Ha"in an da Umipa'adangyan ay Me'gonan,
at maphod di itaguan nan mangunud ay da'mi,
ya ta an amin di gunda aton ya nahamad di pumbalinana.
19 Ya hay ato' an munwagah ay da'yu ya mapmaphod ya un nan na'ahhamad an balitu'
unu nan silver an mi'id ahan di nilamut.
20 Ya hay gun'u aton ya nan na'ahhamad,
ya hay pohpohdo' ya nan ma'andong an ma'at.
21 Ya manu ay munle'le'oda' hidi ya ta way ato' an mangidat hi ma"aphod an ataguan hinan mamhod ay Ha"in
ta nan ataguanda ya umat hinan alang an na"apnuh paguy.
22 Ha"in ya wagwadaa' ay Apo Dios hidin nangete"anan nuntamu
ti Ha"in di nahhun ya un nan udumnan limmuna an wadad ugwan.
23 Ya pepento'a' tuwalih nahhun hidin hopapna ya un malmu tun luta.
24 Ha"in ya wagwadaa' tuwali ya un mawada nan baybay ya nan obob an bumuhubuhu' di danumna.
25 Ya wagwadaa' goh ya un ma'amman nan atata'nang an aduntuduntug unu nan i"ittang an dudunduntug,
26 unu nan payaw an wah tun luta, unu ta"on un nan hupu'.
27 Ya binadanga' hi Apo Dios an nunlumud daya,
ya immannung an tinnig'u Hiyan nunlumuh nan igad hi nundammuwan ad daya ya tun luta.
28 Ya tinnig'u goh nan inatnan nangammah bunut ta inhinanad daya,
ya ta"on un nan inatnan nun'ammah nan numbino'ob'on an obob hinan baybay.
29 Ya wagwadaa' hidin nangiyammanah ihinan di baybay ta adi middum hitun luta,
ya wagwadaa' goh hidin nangiyammanah nan pognad tun luta.
30 Makulug ahan an wadaa' hinan delloh Apo Dios
ta bimmadabadanga' ay Hiyah din nunlumuwanan amin hinan nun'almun wadad ugwan,
ya abigabigat ya immamlo'amlonga' hinan way hinagangna.
31 Ya mun'am'amlonga' an dimmalat an amin hinan nunlumuwana an ta"on nan tatagu.
32 At Ha"in an hi inayun hi Anomnoman ya alyo' ay da'yun imbabaluy'u ta ihamhamadyun donglon nan itugun'u
ti immannung an mawagahan nan mangunud ene.
33 Makulug an manomnoman ayuh unyu unudon nan tugun'u ta adiyu inganuy an aton.
34 Ya mawagahan nan tatagun binigat ya gunda umalih nan pantaw di abung'u ta donglona' hi unna' lumahun
35 ti nan manganap ay Ha"in ya hiyay mangah'up hinan pi'taguana,
ya iyam'amlong Apo Dios hiya.
36 Mu nan adi manganap ay Ha"in ya un hay odolnay pina"ina,
ya nan tagun mamohol ay Ha"in ya paddungnay hay atayanay penhodna.
Hiyah ne inalin Anomnoman.”