64
Hay Luwaluh Pun'adawan hi Abaliwan
Hete ya psalm an intudo' David, ya hay intud'ana ya nan ap'apun di muntudtuduh kanta.
1 Apo Dios, donglom ni' ahan tun luwalu'
ta elwanga' hinan aton nan atata'ot an buhul'u.
2 At baliwana' hinan nappuhin ninomnom nan tataguh atondan ha"in.
3 Ya nidugah di gunda hapiton an mipaddung di diladah nan matadom an hanggap,
ya umat hinan pumatoy an pana nan panaphapitda.
4 Ya bota'onda nan tatagun maphod di ugalida
ta himbumagga ya pinanada an mid ta'otda.
5 Ya ihapitanday i'ibbadan mangat hi nappuhi,
ya punhahapitanday pangiyammaandah huluh a'naan di buhuldan alyonday,
“Undan way mannig hi iyamma tu'un hulu?”
6 Ya wa ay di ninomnomdah nappuhian inaliday,
“Nahamad ahan heten ninomnom tu'uh aton!”
At immannung an adi ma'innilay wah nomnom ya puhun di tagu.
7 Mu paddungnay panaon Apo Dios dida,
at himbumagga ya nun'atoyda.
8 At nan hinapitdan nappuhiy mama"in dida,
at an amin di mannig hinan na'at ay dida ya pumpahalda dida.
9 At an amin nan tataguh tun luta ya tuma'otda,
ya nomnomonda mahkay nan umipata'ot an gun aton Apo Dios,
ya hiyay gunda ul'ulgudon di aatna.
10 Ya umamlong an amin nan umunud ay Apo Dios
an paddungnay mihi'ugdan Hiya,
ya ipabagbagtuda an dumalat nan inatna.