63
Nabalbalul nan Pamhod Apo Dios ya un nan Pi'taguan hitun Luta
Intudo' David heten psalm hidin immayanah nan mapulun ad Judah.
(I Sam. 23:29-24:2)
1 O Apo Dios, He"ay Dios'u an gun'u nomnomon,
ya gun'u He"a hapuhapulon an umata' hinan lutan nadnga' an munhapul hi danum.
2 Ipattigmu ni' ay ha"in di aatmu an Dios hinan Timplum
ti tinnig'uy anidugah di abalinam ya nan a'e'gonam.
3 Ya dayawo' He"a, Apo Dios,
ti nan pamhodmun adi malumluman di nabalbalul ya un nan ataguan.
4 Ya gunna' munyaman ay He"ah enggana eten atagua',
ya ita'nang'uy ngamay'u an munluwalun He"a.a
5 Ya munlenota' ahan an aya' nangan hinan mumpolhat an ma'an,
at mun'am'amlonga' an mangipabagbagtun He"a.
6 Ya He"ay gun'u nonomnomon hi olo'a' hinan mahdom
7 ti He"ay gun bumadang ay ha"in.
At ikanta' di pun'am'amlonga' ti mundenola' hinan panalimunam ay ha"in.
8 Ya He"ay gun'u ehdol hi mangipapto' ay ha"in,
at immannung an halimunana' ta mi'id di nappuhih ma'at ay ha"in.
9 Mu nan mamhod an mamatoy ay ha"in
ya kulugo' an didaat goh di mun'ahhun an mun'ilubu'
10 ti mun'atoydah nan gubat,
ya pun'a'an di jakalb hi inalahan di odolda.
11 Mu ha"in an ali ya mundenola' ahan, Apo Dios,
ya umat goh hinan waday intulagdan He"a an ipabagbagtu da'a,
mu nan munlayah ya duminongda.