48
Ad Zion an Babluy Apo Dios
Hete ya kantan intudo' nan linala'in holag Korah.
1 Nidugah di abalinan Apu tu'u,
at Hiya ya anggay di ipabagbagtu tu'uh dih nan babluynah nan duntug an me'gonan.
2 Ya ma"aphod ahan di tigawna ti wah nan nabagtun duntug hi appit di buhu'an di algaw.
At an amin nan tataguh tun alutaluta ya popohdondan tigon,
ya henen Duntug an Zion di ihinan nan na'abbagtun Ali.
3 Ya wagwah dih nan Abungnah Apo Dios,
at Hiyay manalimun hi mamaliw hinan wah di.
4 Ya nunlalammung an amin nan a'alih tun lutah din nangubatandah nan babluy,
5 mu unat goh tinnigda nan babluy ya timma'otda,
at limmayawda,
6 ya nidugah di wimmogwoganda
an umatdah nan babain muntungaw an womogwog hi ha'it di puntungawana!
7 Nan inatmu ya umat hi inat nan mabi'ah an puo' an nalpuh appit hi buhu'an di algaw
an numpa"ina nan do'ol an pupul ad Tarshish.
8 Hidin nadnoy ya dengngolmiy na'at eten babluy,
mu ad ugwan ya ten hinamhamadmin tinnig di na'at hitun babluy Apo Dios an nidugah di abalinana ete han babluy nan Dios tu'u.
Heten babluy ya baliwan Apo Dios hi mid pogpogna.
9 Hitun Timplum, Apo Dios, ya wa ay ta humigup amin mundayaw ay He"a
ya gunmi nomnomon nan nidugah an adi malumluman an pamhodmu.
10 Ya nundongol di aat nan ngadanmu, Apo Dios,
at ipabagbagtu da'an amin hitun lutah gunmu pangabakan hinan bumuhul.
11 Ya dumalat nan ama'andong nan pumpanuhmu ya nipadenol nan tataguh nan Duntug an Zion
ya nan tataguh nan ahigihigib ad Judah.
12 At umuy ayu ta le'donyu nan Duntug an Zion,
ya le'wohonyu nan babluy,
ya enyapyu nan do'ol an atata'nang an abung an pun'adugan,
13 ya ihamadyun tigon an nihamad an allup ya nan nun'ihamad an abung an ipo"oyan nan tatagu
ta way ulgudonyuh nan holagyuh udum di algaw!
14 Ti hiyah ne pangat Apo Dios an Dios tu'uh mid pogpogna,
ya Hiyay mangipapto' ay ditu'uh enggana.