47
Nan Dios an Na'abbagbagtun Mumpapto'
Heten psalm ya intudo' nan linala'in holag Korah, ya hay intud'anda ya nan ap'apun di muntudtuduh kanta.
1 Tumalpu' ayun amin an Hentil,
ya it'u'yun mungkantah umamlonganyun mundayaw ay Apo Dios!
2 Ti nidugah an mata'tan hi Apu tu'u an na'abbagbagtu,
ya nidugah di abalinana an Alin amin hitun luta!
3 Hiya ya binadangan da'min Hudyu ta inabakmin amin nan buhulmin tataguh nan abablubabluy,
4 ya pinilin Apo Dios nan maphod an babluy hi banohmi
an nan iyamlong nan holag Jacob an popohdona.
5 Ya hidin timmuluwan Apo Dios ya init'u' nan tataguy pun'am'amlonganda,
ya denedehhandan impagangoh din talampet
ya inaliday,
6 “Ikanta tu'uy ipabagbagtuan Apo Dios an Ali tu'u,
ya ikantaan tu'u Hiyan mumpapto' an amin hinan tataguh tun luta!
7 ti hi Apo Dios di Alin amin hitun luta,
at ikanta tu'uy ipabagbagtuana!”
8 At wah din inumbun hinan me'gonan an umbunanan mumpapto' hinan tataguh tun luta,
9 at na'amung an amin nan a'ap'apun Hentil ta middumdah nan tatagun mundayaw hinan Dios Abraham
ti an amin nan a'alih tun luta ya nipihakupdan Apo Dios,
at Hiya ya anggay di mipabagbagtu.