32
Hay Pangaliwan Apo Dios hi Bahol nan Tagun Muntutuyua
Hi David di nangitudo' eten psalm, ya maskilb di style nan tunena.
1 Mawagahan nan tagun ina'alliwam di baholna ya nan ina'inatna.c
2 Ya mipadenol nan tagun adim ibilang an Dios hi nabaholan
ti hiya ya adi munlayah.d
3 Ya hidin agguy'u nangitutuyuan hi bahol'u ya nidugah di lumugwalugwa'a'
4 ti abigabigat ya amahdomahdom ya gunna' moltaon ay He"a, Apo Dios,
at la'tot ya mi'id di bi'ah'u an paddungnay minaganan nan nidugah an potang hinan tiyalgaw.
5 At la'tot ya inabulut'un numbahola' ay He"a,
ya adi' ihaut ta ibaga' an amin ay He"a an muntutuyua', Apu, hi an amin an numbahola' ay He"a,
at ten inaliwam an amin di bahol'u.
6 At an amin nan na'na'unnud an tatagum, Apo Dios, ya gunda munluwalun He"a,
ya namamah nan gutud di punligatanda,
at immannung an mi'id di ma'at ay dida.
7 He"ay punhi'uga', Apu, ta ibaliwa' hinan nappuhin ma'at,
at ikanta' di pun'am'amlonga' hi namaliwam ay ha"in.
8 Inalin Apo Dios di,
“Ituduwa' he"ah atom ta hiyay unudom,
ya tuguno' he"a,
ya halimuna' he"a goh.”
9 At hiyanan maphod hi un ayu un'unnud ta adi ayu umat hinan kabayu unu mule
an mid nomnomda an gahin un guyudon nan gumo' hi timidda ya unda umunud.
10 Nan mangamangat hi nappuhi ya do'ol di punligatanda,
mu nan mange'gon ay Apu tu'u ya mahalimunandah nan munnananong an pamhodna.
11 At umamlong ayun nahamad di pangatna,
ya it'u'yuy umamlonganyu an dumalat nan maphod an inatna!