31
Hay Luwaluh Pange'kodan ay Apo Dios
Hete ya psalm an intudo' David, ya hay intud'ana ya nan ap'apun di muntudtuduh kanta.
(Psa. 71:1-4)
1 O Apu, He"ay ihi'uga' hi mamaliw ay ha"in,
ya adim ni' ahan iyabulut an mabainana'
ti He"a ya nahamad di pangatmun Dios,
at baliwana'.a
2 At donglom ni' tun iluwalu' ta punnaudom an mamaliw ay ha"in
ti He"ay umat hinan batun pangihi'uga',
ya umat'a goh hinan nihamad an allup an mamaliw ay ha"in.b
3 He"a, Apu, di paddungnay batun punhi'uga' ya baliw'u,
at ipanguluwa' ta ituduwana' hinan pohdom ta way adayawan nan ngadanmu.c
4 Ya adim ni' iyabulut an paddungnay mahulua' hinan nidadaan an huluh pangnadan ha"in
ti He"a ya anggay di manalimun ay ha"in.d
5 At e'kod'un He"ay nitagua'e
ti He"ay baliw'u an makulug an Dios.
6 Abohla' nan mundayaw hinan bulul
ti He"a ya anggay di makulug.
7 At mundenola' ya umamlonga' hinan adi mapogpog an pamhodmun ha"in
ti hinalimunana' hidin nunligligata'.
8 Ya agguya' impatiliw hinan buhul'u ti binaliwana'.
9 O Apo Dios, hom'ona' ni' ti ten maligligatana',
ya ten numpangalatunnu tun mata' an lumugwalugwa,
ya ten ahihaha'it di odol'u.
10 Ya ten munlunglungtuya' hitun nidugah an aligligata',
ya ta"on un tun tungal'u ya limmungtuyda goh.
11 Ti an amin nan buhul'u ya pihupihulona',
ya inyal'allanah nan heneggon'u.
Ya nan liligwa' ya tuma'otdan ha"in ti wa ay ta tigona' hinan kalata ya inhingngiday pange'wanda,
12 at inaliwana' ay dida an paddungnay unna' natoy
an umata' hinan naphal an bangan nitapal.
13 Ya gun'u donglon di hapihapiton nan do'ol an buhul'un ha"in,
ya tuma'ota' ti ninomnomdan mamatoy ay ha"in.
14 Mu He"ay pange'koda' an amin, Apu, ti He"ay Dios'u,
15 ya He"ay okod hinan ma'ma'at hitun nitagua',
at baliwana' hinan aton nan buhul'un mamaligat ay ha"in.
16 Tigona' ni', ya igohgohana' an baalmu,
ya baliwana' an dumalat nan nidugah an pamhodmu,
17 ya adim ni' abuluton di abaina', Apu, ti ten munluwalua' an mumpabadang ay He"a.
Mu hay bainom ni' ya hanan mangamangat hi nappuhi ta engganah unda middum hinan wadan di nun'atoy
18 ta mun'apogpog nan pumpahpahiyaandan lumayalayah,
ya nan pumihupihulandah nan tatagun nahamad di aatda.
19 Immannung an nidugah an mun'aphod nan indadaanmun pumhodan nan mundayaw ay He"a.
Ya inilan nan tataguy anahamad di pangipapto'mu ya nan pamaliwam hinan mange'kod hi nitaguandan He"a.
20 Ya He"ay ihi'uganda,
at gunmu dida halimunan hinan nappuhin nomnomon nan tatagun aton ay dida,
ya ili"udmu didah nan pamihupihulan nan buhuldan dida.
21 Madayaw hi Apo Dios ti impattignan ha"in nan nahamad an pamhodnah din nunli'uban nan buhul'un ha"in.
22 Ya hidin timma'ta' ya alyo' hi unna' ingnganuy ay He"a,
mu maphod ni' ahan ta dengngolmu nan numpahpahmo'a' hidin numpabadanga'.
23 At da'yun mundayaw ay Apo Dios ya ipattigyuy pamhodyun Hiya ti baliwana nan tatagun un'unnud ay Hiya,
mu nidugah di pummoltanah nan mumpahpahiyan tagu.
24 At mahapul an ditu'un amin an manahalimid ay Apu tu'u
ya pabi'ahon tu'uy punnomnoman tu'u.