17
Hay Luwalun David
Hete ya psalm an inluwalun David.
1 Donglom ni' ahan di luwalu', Apo Dios.
Iluwalu' an badangana' ni' ahan ta nan nahamad di ma'at ay ha"in,
ya immannung an nan inluwalu' ya makulug an hay nalpuh nomnom'u ya puhu'.
2 Ya ibilanga' ni' an mi'id di bahol'u
ti He"a ya inilam nan tatagun nahamad di aatda.
3 Ya i'innilam di wah puhu' ya nomnom'u ti ta"on hinan mahdom ya tapngana',
mu mi'id di inah'upam hi nappuhih aat'u,
ya topngo' di ato' an humapit ta adia' mumbahol.
4 Ya inunud'u nan Tugunmu,
at agguy'u inyunnud hinan ato'aton nan tatagun mi'pattoy ya nan mangamangat hinan numbino'ob'on an nappuhi
5 ti inaynayun'un mangun'unud ay He"a,
ya mi'id ah imbahhaw'uh nan Tugunmu.
6 Ya manu ay munluwalua' ay He"a, Apo Dios, ti inila' an abulutom,
at ihamadmu ni' an donglon nan iluwalu'.
7 At ipattigmu nan nidugah an pamhodmuh nan pamaliwam ay ha"in,
ya dumalat goh nan abalinam ya baliwam nan mumpabadang ay He"a
ta mi'id di nappuhih aton nan buhuldan dida!
8 At halimunana' an ipapto' ahan,
ya baliwana' an umat hi aton di hamuti an paddungnay obobana'
9 hinan mamohol ay ha"in
an nan buhul'un wah nan nunlene'woh an mamhod an mamatoy ay ha"in.
10 Ti mi'id di homo'da,
ya mumpahpahiyadan humapit.
11 Ya wagwadada an unu'unudona'
ta hahalepatanday pampapandan ha"in.
12 Ti umatdah nan munhinaang an layon an mamannod ay ha"in ta pumbi"ia'.
13 At umali'a ni' ahan, Apo Dios, ta hanggaom tun buhul'u ta abakom dida,
ya usalom nan hanggapmu ta baliwana' hi aton hanan nappuhiy pangatdan tatagu!
14 Baliwana' an dumalat nan nidugah an abalinam, O Apo Dios,
hinan tatagun hay gamgamonda ya an amin nan numbino'ob'on an wah tun luta ya anggay.
Mu inila' an idatam nan tatagun nahamad di ugalidah tanudda ta adida munhinaang,
ya ta"on un nan imbabaluyda ya mun'olog di tanudda ti mipabnoh ay diday inadangyanda.
15 Ya ha"in ya mundenola' hi un'u tigon nan angahmu ti mi'id di inat'uh nappuhi,
ya wa ay ta mamahuana' ya mun'am'amlonga' an mamannig hi aatmu.