Joshua 12

Nan A'alin Inabak nan Holag Israel

¹ Hinakup mahkay tuwalin nan holag Israel nan babluy hi appit hi buhu'an di algaw hidih nan Wangwang an Jordan, at diday nunhituh di. At mete"ah nan Wangwang an Arnon ta engganah nan Duntug an Hermon ya duwa nan alih di an inabakda:

Nan Alin hi Sihon

² Hay oha ya hi Sihon an holag Amor an alid Heshbon. At hay babluy hi hinakupna ya godwan di ad Gilead an mete"ah nan Nundotal an Aroer hidih nan pingit di ad Arnon, ya niddum goh nan gagwan di ad Aroer ta engganah nan Wangwang an Jabbok an hiyah ne igad di babluy nan holag Ammon. ³ Ya nan nundotal an babluy hi appit hi buhu'an di algaw hinan way Lobong an Galilee ta engganah nan Baybay an Arabah, ya ad Beth Jeshimoth ta engganah nan puun di Duntug an Pisgah.

Nan Alin hi Og

⁴ Ya hay miyadwan ali an inabak da Joshua hidi ya hi Og ad Bashan. Hiya ya ohah nan angunuh an o"ongol an tatagu. Ya hay duwan numbabluyana ya ad Ashtaroth ya ad Edrei. ⁵ Ya hay nilagat hinan nun'aliana ya nan Duntug an Hermon, ya ad Salecah, ya ad Bashan, ta engganah nan pogpog di babluy ad Geshur ya ad Maacah. Ya niddum goh nan godwan nan babluy ad Gilead ta engganah nan pogpog di ad Heshbon an nun'alian Sihon.

⁶ At daden duwan ali ya inabak tuwalin da Moses an din baal Apo Dios. At indatna nan babluydah nan holag da Reuben, ya hi Gad, ya nan godwan nan holag Manasseh.

Nan A'alin Inabak da Joshua

⁷ Ya nan babluy hi appit hi alimuhan di algaw hinan Wangwang an Jordan an inabak da Joshua ya nete"ah ad Ba'al Gad hinan Nundotal an Lebanon ta engganah nan Duntug an Halak an neheggon hi ad Edom. At impiyapong Joshua an amin daden babluy hinan numbino'ob'on an holag nan i'ibbanan holag Israel. ⁸ Ya hay niddum hinan indatnan dida ya nan madinuntug, ya nan nundotal an ta"on un nan mapulun. Ya hay nunhituh din hopapna ni' ay daden babluy ya nan holag Heth, ya holag Amor, ya holag Periz, ya holag Hiv, ya holag Canaan, ya nan iJebus. ⁹ At didatu nan ali an inabak nan holag Israel:

Nan alid Jericho,

ya nan alid Ai (an neheggon ad Bethel),

¹⁰ ya nan alid Jerusalem,

ya nan alid Hebron,

¹¹ ya nan alid Jarmuth,

ya nan alid Lachish,

¹² ya nan alid Eglon,

ya nan alid Gezer,

¹³ ya nan alid Debir,

ya nan alid Geder,

¹⁴ ya nan alid Hormah,

ya nan alid Arad,

¹⁵ ya nan alid Libnah,

ya nan alid Adullam,

¹⁶ ya nan alid Makkedah,

ya nan alid Bethel,

¹⁷ ya nan alid Tappuah,

ya nan alid Hepher,

¹⁸ ya nan alid Aphek,

ya nan alid Lasharon,

¹⁹ ya nan alid Madon,

ya nan alid Hazor,

²⁰ ya nan alid Shimron Meron,

ya nan alid Akshaph,

²¹ ya nan alid Taanach,

ya nan alid Megiddo,

²² ya nan alid Kedesh,

ya nan alid Jokneam hi ad Carmel,

²³ ya nan alih nan madinuntug ad Dor,

ya nan alid Goyim hi ad Gilgal,

²⁴ ya nan alid Tirzah.

At hay uyapdan amin ya tulumpulu ta han ohay a'ali.