24
1 Mu i'innilan Balaam an nan holag Israel di pohdon Apo Dios an wagahan, at agguy mahkay immuy an ni'hapit ay Apo Dios an adi umat hidin numpidwan numba'iana. At hay inatna ya nunligguh ta inamangna nan mapulun. 2 Ya unat goh inyamang Balaam ya tinnigna nan holag Israel an na'uhi'uhig di nungkampuan di hinohhan himpangapu, ya niyo'odol nan Na'abuniyanan an Lennawan hiya. 3 At impahapit goh Apo Dios hiya, ya inalinay,
“Hiyah te ipa'innilan Balaam an imbaluy Beor,
ya hiyah te ipa'innilan han tagun mapatal an mabi'ah di panigawna,
4 ya hiyah te ipa'innilan han tagu an ay donglonay nolo'a',
mu agguya' nalo' an dinidiat'u an titiggo' di ipa'innilan nan na'abbagbagtun Apo Dios ay ha"in.
5 Anakkayah an mun'aphod di numpunhituwan
nan holag Jacob an hi Israel!
6 Ya hay punhituwanda ya umat hinan ambibilog an numpundotal,
ya umatdah nan galden hinan pingit di wangwang!
Ya umat goh hinan ayiw an nabangluy hunghungna an intanom Apo Dios,
ya umat goh hinan atata'nang an ayiw an cedar hinan pingit di danum!
7 Ya mawaday do'ol an udan,
at do'ol di pananumdah nan intanomdah nan payaw,
ya adi makudangan hi danum di itanomda!
Ya nabagbagtu nan alida ya un hi Agag,a
ya hay pumpapto'ana ya mipabagbagtu!
8 Ya hi Apo Dios di nangekak ay didad Egypt,
ya hay bi'ahda ya umat hinan bi'ah di atap an baka ta abalinandan abakon di binuhulda,
ya pun'ipungday tungal di buhulda,
ya hay pamatoydah nan buhulda ya nan panada!
9 Ya nan holag Israel ya umatdah nan ma'abbi'ah an buta'al an layon an munlulu'bub an nidadaan hi buhul,
ya umatda goh hinan tennan layon an mi'id ah mangitulid an umuy mamangon ay hiya!
At nan mungwagah hinan holag Israel ya mawagahan goh,
ya nan mangidut ay dida ya ma'idutan goh!”b
10 Ya unat goh dengngol Balak an agguy damdama inidutan Balaam ya nunheglan ma'abbungot ahan ay Balaam, ya nunggomgomnay ngamaynah bungotna, ya init'u'nan inalinan Balaam di, “Impa'ayag da'a ta idutam danen binuhul'u! Ya unmuat goh tinuntunud an winagahan didah numpitlu! 11 At umanamut'aat hi nunhituwam! Alyo' at goh un da'a lagbuan hi ongol, mu agguy inyabulut Apo Dios di pangidata' hi lagbum!”
12 Ya tembal Balaam an inalinay, “Undan agguy'u tuwali inali ay danen hennagmun mangawit ay ha"in di, 13 Ta"on un idat Balak ay ha"in an amin di silver an pihhuna ya an amin nan balitu' an wah nan palasyuna ya adi ahan mabalin hi un'u ibahhaw nan intugun Apo Dios hi ato' an dumalat nan pangata' hinan logom! At nan inalin Apo Dios di hapito' ya anggay. 14 Ad ugwan ya ten mumbangngada' hinan babluymi, mu padana' he"a ta ipa'innila' di aton nan holag Israel hinan tatagum hi udum di algaw!”
Hay Miyapat hi Inulgud Balaam
15 Ya impahapit goh Apo Dios hiya, ya inalinay,
“Hiyah te ipa'innilan Balaam an imbaluy Beor,
ya hiyah te ipa'innilan han tagun mapatal an mabi'ah di panigawna,
16 ya hiyah te ipa'innilan han tagu an ay donglonay nolo'a',
mu agguya' nolo' an dinidiat'u an titiggo' di ipa'innilan nan na'abbagbagtun Dios ay ha"in.
17 Ya innilao' an udum hi algaw ya waday malpuh nan holag Israel hi ohan ali
an umat hi ma"abnang an bittuan.c
At pun'abakna nan a'ap'apun di iMoab,
ya punggumi'nay ulun nan tatagud Sheth.d
18 Ya nan holag Israel ya abakonda nan binuhulda an holag Edom,
ya hinakupda nan babluyda ta diday munhituh di,
ya iddumdan hakupon ad Seir.
At dida an holag Israel di mangab'abak.
19 Ya malpuh nan holag Israel di ohan mumpamatoye
hi an amin an na'angang hinan siudad.”
Hay Miyaleman Inulgud Balaam
20 Ya intigaw Balaam hinan holag Amalek, ya himmapit an inalinay,
“Nan holag Amalek di hiyay ongol di abalinana ya un nan udum an babluy.
Mu udum di algaw at mapogpog ti ma'ubahdah enggana.”
Hay Miyonom an Inulgud Balaam
21 Ya intigawnah nan holag Ken, ya hinapitna han nipa"el an inalinay,
“Nan lugal an nunhituwanyu ya na'ihhamad an mi'id di al'ali,
ya nan nipabunan di abungyu ya nan gungit.
22 Mu udum di algaw at mun'atoy ayun holag Ken ti umali nan holag Ashur,
ya hinakup da'yu ta iyuy da'yuh nan babluyda,
ya pumbalinon da'yuh himbutda.”
Hay Miyapitun Inulgud Balaam
23 Hiyah te goh hinapit Balaam an nipa"el an inalinay,
“Undan nin way mataguh un ipa'annung Apo Dios di umat hina?
24 Mu wadaday umalin nunlugan hi pupul an malpuh Cyprus,
at gubatonda nan holag da Ashur ay Eber,f
mu ta"on un dida ya ma'ubahda goh.”
25 Ya unat goh nalpah nan hinapihapit Balaam ya numbangngad an umanamut hi babluyda, ya immanamut goh hi Balak.