35
Hay Nungwagahan Apo Dios ay Jacob ad Bethel
1 Ya la'tot ya inalin Apo Dios ay Jacob di, “Makak ayuh tu ta umuy ayuh ad Bethel ta hidiy ihinanyu. Ya iyammam hidi ah pun'onnganyu ay Ha"in an Dios an din numpattig ay he"ah din limmayawam hi bimmungtan han agim an hi Esau.”
2 Ya nun'alih Jacob ay didan hina"ama ya an amin hinan ni'yibbadan inalinay, “Pumpa"iyuy numbino'ob'on an bulul an hinamhamyu an inta'inyu, ya numpun'amoh ayu, ya nunlubung ayuh nan maleneh ta panginnilaan hi un tu'u maleneh an mundayaw ay Apo Dios. 3 Ti ad ugwan ya makak tu'uh tu ta umuy tu'uh ad Bethel, ta hidiy pangiyamma' hi pun'onngan ay Apo Dios an din namadang ay ha"in hidin nunligata', ya Hiyay nangipangpanguluh an amin hinan immaya'.”
4 At pun'idatda mah ay Jacob an amin nan bulul an wan dida ya ta"on nan hingatda, at pun'ilubu' Jacob hinan way puun di ayiw an ma'alih oak hi ad Shechem. 5 Ya heden nakakan da Jacob ya hi Apo Dios di nangipata'ot hinan tataguh nan babluy hinan enengwada, at mi'id di inatdah nappuhin da Jacob 6 ta nangamung unda dimmatong hi ad Luz an ma'alih ad Bethel hi ad Canaan. 7 At hidiy nangiyammaan Jacob hi pun'onngan, at ngadnana ta ad El Bethela ti hidiy numpa'innilaan Apo Dios hi aatnan hiyah din limmayawanah din bimmungtan aginan hi Esau.
8 Ya palpaliwan ya natoy han na'in'innan hi Deborah an din nangipapto' ay Rebekah.b At inyuyda inlubu' hinan way puun di ayiw an ma'alih oak hinan ampan di ad Bethel, ya ngadnanah deh ad Allon Bakuth.c
9 Ya hidin awadan da Jacob hi ad Bethel hi nalpuwanah ad Paddan Aramd ya hin'alina ya numpattig goh hi Apo Dios ay hiya, at wagahana hiyan 10 inalinay, “Ad ugwan ya bo'on mahkay hi Jacobe di ngadanmu ta he"ah Israel.”f At hiya mah di ingngadana.
11 Ya inalin goh Apo Dios di, “Ha"in hi El-Shaddaig an nan Dios an abalina' an amin di logom, ya punhologo' he"a ta dumo'ol di holagmu ta he"ay ommod an amin nan numbino'ob'on an holag, ya hay udumnah nan holagmu ya diday mumpun'ali. 12 Ya heten lutan indat'uh nan o'ommodmun da Abraham ay Isaac ya ipaboltan'un he"a, ya boltanon goh nan holagmu.” 13 Ya unat nalpah an inalin Apo Dios hana ya immolegoy.
14 At ay inummal hi Jacob hi batu, at ha"adonan de han potto' nan nanniganan Apo Dios ta panginomnomanan den na'at, ya hiniitanah bayah an me'nong ay Apo Dios ya lana. 15 Ya ipidwan Jacob an ngadnan heden lugal ta ad Bethel.h
Hay Natayan Rachel
16 Ya palpaliwan ya inhi'al da Jacob an taynan ad Bethel ta umuydah ad Ephrath. Mu agguyda dimmatong hi ad Ephrath ya hin'alina ya nidugah an dinumgoh nan inhabin Rachel, 17 ya mumpaligat an muntungaw. Ya unat goh bimmuhu' ya inalin nan babain nanawat di, “Maphod ta lala'i goh tun intungawmu!”
18 Mu hi Rachel ya mun'aguguyud di hodohdanan matoy, at iyab'abu'abnan hay ngadan nan ung'ungnga ya hi Ben-Oni.i Mu hay nungngadan Jacob ya hi Benjamin.j
19 Ya unat goh natoy hi Rachel ya inlubu'dah nan pingit di owon an umuy ad Ephrath (an ad Bethlehem ad ugwan). 20 At inha"ad Jacob goh han batuh nan nilubu'ana ta way panginomnomana. Ya engganah ad ugwan ya wah dih den batu.
21 Ya wan nalpah ya intuluy da Jacob an mungngadan goh hi Israel nan pumbaatanda. Ya nidatongdah ad Migdal Eder an linauhanda nan ata'nang an binattu ta hidiy nangiyamman Jacob hi tuldan abung hi nihinanda.
Nan Imbabaluy Israel
(I Chron. 2:1-2)
22 Ya hidin nihinandan den babluy ya hiyay nangelo'an Reuben ay Bilhah an ohah nan ahawan amana. Ya waday nangibaag ay Israel.
Hi Israel ya himpulu ta duway imbabaluyna mahkay. 23 Ti hay imbaluyda ay Leah ya hi Reuben an pangpangullu, ya hi Simeon, ya hi Levi, ya hi Judah, ya hi Issachar, ya hi Zebulun. 24 Ya hay imbaluyda ay Rachel ya da Joseph ay Benjamin. 25 Ya hay imbaluyda ay Bilhah an tagalan Rachel ya da Dan ay Naphtali. 26 Ya hay imbaluyda ay Zilpah an tagalan Leah ya da Gad ay Asher.
An aminda hanan imbabaluynan linala'i ya ad Paddan Aram hinan babluy hi ad Mesopotamia di nitungawanda.k
Hay Natayan Isaac
27 Ya la'tot ya dinatngan da Israel hi amanan hi Isaac an nihihinnah din nunhituwan amanan hi Abraham hi ad Mamre an neheggon hi ad Kiriath Arba (unu ad Hebron). 28 Hay tawon hi ni'taguan Isaac hi engganah natayana ya hinggahut ta han nawaluy tawona. 29 Hiya ya na'alla'ay ya un matoy, at niddum hinan o'ommodna.l Ya nan imbabaluynan da Esau ay Jacob di nangilubu' ay hiya.