10
Nan Holag nan Imbabaluy Noah
(I Chron. 1:5-27)
1 Hiyatuy holag nan tulun linala'in imbabaluy Noah an diday nunholag hidin nalpahan di lobong.
Nan Holag Japheth
2 Hay holag Japheth ya da Gomer,a ya hi Magog,b ya hi Madai,c ya hi Javan,d ya hi Tubal,e ya hi Meshek,f ya hi Tiras.g
3 Ya hi Gomerh ya nunholag ta da Ashkenaz ay Riphath, ya hi Togarmah.
4 Hi Javan ya nunholag ta da Elishah,i ya hi Tarshish,j ya nan tatagun numpunhitud Cyprus, ya nan tatagun numpunhitud Rhodes. 5 Ya nan holag Japheth di o'ommod nan numpunholag an numbino'ob'on di hapitda an numpunhituh nan abablubabluy hinan pingit di baybay.
Nan Holag Ham
6 Nan linala'in holag Ham ya da Cush,k ya hi Mizraim,l ya hi Put,m ya hi Canaan.n
7 Ya hay holag Cusho ya da Seba, ya hi Havilah, ya hi Sabtah, ya hi Raamah, ya hi Sabteka. Ya nan holag Raamah ya da Sheba ay Dedan.
8 Hi Cushp ya wada han ohan imbaluynan lala'i an hi Nimrodq an hiyay hopap di nangameh an amin hinan abablubabluy hitun luta. 9 Ya nala'eng an manganup ti hi Apo Dios di namadang ay hiya. At hiyanan inalin nan tataguy, “Maphod ahan un'a umat ay Nimrod an manganup an binadangan Apo Dios!” 10 Hay hopap di babluy hi numpapto'ana ya ad Babylon, ya ad Uruk, ya ad Akkad, ya ad Kalneh an hakup di ad Shinar.r 11 Ya ilagatna nan babluy ad Assyria ta hidiy numpangipaphodanah nan siudad an umat ad Nineveh, ya ad Rehoboth Ir, ya ad Calah, 12 ya ad Resen an numbattanan ad Calah ya ad Nineveh ya nundongol an siudad.
13 Hi Mizraims an imbaluy Ham ya nunholag ta nan tatagud Lydia,t ya ad Anam,u ya ad Lehab,v ya ad Naphtuh,w 14 ya ad Pathrus,x ya ad Casluh (an nalpuwan nan iPhilistiay), ya nan i'Crete.
15 Hi Canaan an imbaluy Ham ya nunholag ta hi Sidon an pangpangullu ya un hi Heth.z 16 Ya nunholag goh hi Canaan ta nan himpampun an holag Jebus, ya nan holag Amor, ya nan holag Girgas, 17 ya nan himpampun an holag Hiv, ya nan holag Ark, ya nan holag Sin, 18 ya nan holag Arvad, ya nan holag Zemar, ya nan iHamath. Ya hanan holag Canaan ya diday niwa'at an nepongdah nan udumnan babluy 19 an nete"ah ad Sidon ta numpa'uy ad Gerar ta nangamung ad Gaza. Ya inipluy di udumnan immuy ad Sodom, ya ad Gomorrah, ya ad Admah, ya ad Zeboyim ta nangamung ad Lasha. 20 Hiya hanay holag Ham hi nun'epong hinan do'ol an abablubabluy ya numbino'ob'on di hapitda.
Nan Holag Shem
21 Nunholag goh hi Shem an pangpangullu ya un hi Japheth, ya hiyay ad holag hinan dana' Eber. 22 Hiyatuy holag Shem an da Elam,a ya hi Ashur,b ya hi Arphaxad,c ya hi Lud,d ya hi Aram.e
23 Hay holag Aram ya da Uz, ya hi Hul, ya hi Gether, ya hi Meshek.
24 Hi Arphaxad ya nunholag ta hi Shelah an ad imbaluy ay Eber.
25 Hi Eber ya duwaday linala'ih holagna. Nan oha ya nginadnanda ta hi Pelegf ti hidin ataguna ya na'uhi'uhig nan tataguh tun luta. Ya nan oha ya hi Joktan. 26 Ya hay holag Joktang ya hi Almodad, ya hi Sheleph, ya hi Hazarmaveth, ya hi Jerah, 27 ya hi Hadoram, ya hi Uzal, ya hi Diklah, 28 ya hi Obal, ya hi Abimael, ya hi Sheba,h 29 ya hi Ophir,i ya hi Havilah, ya hi Jobab. Hiyanay holag Joktan.
30 Ya hay babluy hi nunhituwanda ya nete"ah ad Mesha ta nangamung ad Sephar hidih nan dudunduntug an niyappit hi buhu'an di algaw. 31 Didanay ahimpahimpangapu an holag Shem an numbino'ob'on di numbabluyanda ya ta"on nan hapitda.
32 An amin dane an tatagu ya hi Noah di napu'aganda ti ma'alah nan patad. Ti hidin nalpahan di lobong ya anggay nan imbabaluy Noah di numpunholag ya unda dumo'ol an niwa'awa'at hitun luta.