3
1 Si-kayo ngon bibii ja waray asewa to, iyay i shawat ko son si-kayo. Patiyoy asewayo, say no waray mengesas son si-kayo ja eg pay laeng emati nonta esel nen Apo Shiyos, balang nem memati ira ngo, angken enshiy jo ikowan son si-karen maypangkep ni pamati.2 Tep asen sha ey maronong kayo, tan asen sha ey joka pati-a iray asewayo.3 Si-kayon bibii, aliwen jo ipangkep ey sota peningsingpet jo ni bowek jo i mapteng nga pengidmang ni totoo son si-kayo, ono sota pengosal jo ni ebalitokan, ono epalit ta dopot.4 No diket say epateg ga mesepol la ma-sas son si-kayo, sota mapteng nga nemnem ja agpayso, tan sota talna. Sajay ya itsora ni ogadi, si-katoy on-onong son si-kayo ni olay, eg ma-enshi, jet sajay i epateg son Apo Shiyos.5 Ta nonta bayag da, sota bibiin eshiyosan, say inpasing sha, say mapteng i pengidmang ni totoo son si-kara, si Apo Shiyos ni olay i shaka nemnemnema, tan pinatira ni olay sota inkowan ni asewara.6 Nontan da, sota asewa nen Abraham, ja si Sara, pinati to ni olay si Abraham. Inewagan to pay si asewa to ey apo to. Jet si-kayo ngon bii niman, no mapteng i ogadiyo, tan etalna kayo, si-kayoy maybidang ey annak nen Sara.
7 Inges to ngo son si-kayon daleki ja waray asewa to, mesepol la ajowanan jo ira, tan singpeten jo ira, ta say bibii, aliwen inges jon makedsang. Tan say sakey pay, in-aknan ngo ira nen Apo Shiyos ni biyag ja enshiy to engintegan ja inges to sota wara son si-kayo. Sajay komay pesing jo say sota joka panshewat so nen Apo Shiyos ket eg medingding.
8 Say piyan na a-selen nonta emin na inkowan ko la, sajay. Mesepol la man-i-inawatan kayo, tan mesepol la waray pengisekit jo ni sakey tan sakey son si-kayo. Semek joy sakey tan sakey son si-kayo, ta san-a-aki kayo shi pamati. Nemnem joy pansigshan ni eshom jet pankikinombaba kayo. 9 No bilang ey waray too ja ngaaw i dingka to ono inkokowan to son si-kayo, aliwen jo ibales ja ngaaw ngoy dag-en jo ono ngaaw ngoy ikowan jo son si-kato, no diket ikowan jo koma ey si Apo Shiyos i onbindisiyon son si-kato. Ta say kabol ni pinidi-an nen Apo Shiyos son si-kayo, piyan ton mapteng komay pesing jo so ni eshom, say bindisiyonan tokejo. 10 Isonga waray naysolat nonta bayag da ja esel nen Apo Shiyos ja kowan to ey,
“Sota toon piyan ton mapteng i biyag to shiya dobong, tan piyan to ja mewad-an ni imdeng, mesepol la enshiy to ikokowan na ngaaw wa esel ono to dag-en na pengi-owap. 11 Mesepol la isalsheng to sota aramid ton ngaaw, ja sa-datan to ni mapteng, jet say nemnemen to koma, sota mengi-kan ni pan-i-inawatan ni totoo. 12 Ta si Apo Shiyos, eg to i-oway sota ira maronong; toka i-akan sota shaka shewata. Nem sota toon ngaaw i aramid sha, eg kosto nen Apo Shiyos; kontra to ira.” Sajay i inkowan ni naysolat nonta bayag da.
Si Cristoy nemnemen jo no onmotok i digat son si-kayo
13 No sota mapteng ni olay i edisto-an jon dag-en, manmanoy mengitoded ja menekit son si-kayo. 14 Nem no bilang ey manda-kam kayo ni digat pangkep nonta dingkayon piyan nen Apo Shiyos, mebindisiyonan kayo. Isonga eg kayo koma ontakot so ni kait jon too, ono kayo manshanag pangkep ni pena-kot sha. 15 Si Cristoy nemnemnemen jon ishayaw, jet itodok jo ta bakdang jon itorayan to. Mesepol la esagana kayo ni olay ja mengilewag nodta toon mansedodsod no apay nga si-kayon emati son Cristo, wara ni olay i ebadeg ga namnama jo. Nem dododop jon menongbat son si-kara; karekayo mandastog. 16 Mesepol la tanshaaniyoy ogadiyo say enshiy jo dag-en na kaydaw-anan jo. No mapteng ni olay i ogadiyo, mebebaingan sota menoyshoy son si-kayo ja kowan to ey enshiy kowinta ni inpamatiyo son Cristo. 17 Nem no kenshat ta pedigaten shakejo ni totoo, angkena, no maypangkep ni eg sha so kosto-i ni mapteng nga ogadiyo, ta no sina-shom, sotan i piyan nen Apo Shiyos ja medeka son si-katejo. Say aliwen koston mepesamak, sota ipalikat shakejo so ni too, kabol ni basol jo. 18 Nemnem jo sota inkatey nen Cristo. Ta si Cristo, si-katoy engitodok ni bakdang to shorog ja metey say ikaro ton emin i basol ni totoo, tan say i-esop shakito so nen Apo Shiyos. Jet si Apo Jesus, enshin polos i basol to, nem etey ni maypangkep son si-katejon toon eshakel i basol to. Etey nin mangon pinsak i bakdang to, nem sota dinawa to, eg etey. 19 Jet sotan na dinawa nen Cristo, dimaw nodta naybaloshan ira nonta dinawa ira nonta nanketey ya too nonta bayag da, jet to tinod-an ira. 20 Sotan ira sota dinawa ni totoo nonta bayag da ja nanketey ja eg emati so nen Apo Shiyos nonta timpo nen Noe. Ta si Apo Shiyos, singsingked to no memati ira nonta maramen pandag-a nen Noe sota barko to. Nem eg emati ira sotan na totoo; isonga walo bengat i simekep nodta barko ja toon naysalakan ja engilesat nonta shanom. 21 Sajay i arig nonta shanom ma ebonjagan jo, ta si-katoy naysalakanan jo. Say bonjag, aliwen maypangkep ni inkalinis ni bakdang jo, no diket sota inshawat jo so nen Apo Shiyos ey pekawanan to sota naksheng den dingkayo tan say todongan shakejon mandisi ni basol. Isonga waray kedsang ni bonjag ja mengisedakan, ta nan-ongal si Jesucristo. 22 Idi nan-ongal si Jesucristo, dimaw da shi dangit jet wara niman shi petek ni kanawan nen Apo Shiyos, ja emekitoshay son si-kato. Intorayan ton emin sota wared dangit: sota ira anghil tan sota eshom ma waray saad to ono panakabalin to.