2
Sota mepesamak nin, asan kemotok mowan ali si Jesucristo
1 Niman, no sota maypangkep ni imotok ali mowan nen Apo tayo ja si Jesucristo, tan sota ka-olnong tayon may-aspol son si-kato, iyay i ibanshaan mi son si-kayon a-aki mi shi pamati. 2 Karekayo mebiglen ma-adilaw shorog ni nemnem jo, ono karekayo manshanag nonta kowan sha ey enaksheng den mimotok si Apo Jesucristo. Ta baka sajay i inkowan ni sakey ya kait jod tan ja inpa-amta kono nen Apo Shiyos son si-kato, ono inkowan ni sakey ya engitosho, ono baka µaray engikowan ey edapo iyay son si-kami ja insolat mi. 3 Angken ngarantoy ikowan sha, karejo kari patpati-en. Ta aneng nin kari sota timpon imotok nen Jesucristo ali. Mesepol la mepangdo nin kari ja metongpal iya inkowan ko la ey okesen ni karakdan na totoo si Apo Shiyos, tan onbo-day pay nin kari sota toon tima-nil ja ngaaw i aramid to. (Nem say pantongpalan niyay ya too, mepilshin kenshat.) 4 Kontra-en ton emin i kompormin kowan ni angken sipen too ey shiyos sha, tan sota kompormin pesing shen mengiredjaw ni shiyos sha. Ikayang to shorog i bakdang to ja kowan to ey si-katoy kangeto-an so ni angken sipen too, tan iba-ngat ton ontongaw ja mantoshay shima Timplo nen Apo Shiyos ja kowan to pay ey si-katos Shiyos. 5 Apay dinibkan jo aya? Inkowan ko met iyay ja emin nonta µara-ak son si-kayo, 6 jet amtayo met no apay nga eg nin mepesamak niman iyay ya banag. Ta aneng nin i koston timpo to. Nem onsabi di sota timpo, sajay ya toon tima-nil la ngaaw i aramid to, ma-amta-an. 7 Sota ngaaw wa aramid, si-katoy emanketongpal niman na timpo, nem dibas. Eg nin ondagsheng iyay ya ngaaw wa aramid tep µaray emeniptiped niyay ya ngaaw wa aramid, say eg maykagshen onbo-day. 8 Jet no ma-kal sotan na emeniptiped, sotan na toon kawad-an ni aramid ja ngaaw, onbo-day ma. Nem si Apo Jesus, no onmotok ali, si-boken to bengat iyay et metey, jet onsalsheng ma sota ngaaw wa toro to. 9 Sota toon kawad-an ni ngaaw wa aramid, ja itorong ali nen Satanas, no onmotok ali, µara son si-kato i panakabalin, isonga kalkalasiy pesing ton mengolbod tan mengi-owap, ja singa kaskasshaaw noman. 10 Enshin polos son si-kato i mapteng nga aramid; isonga na-na-jew i toka pesing nga mengolbod nonta ira toon emantoshong shi keshosa-an sha. Ta sajay ira, inasneng sha sota kinapodnon istay kaysedakan sha koma. 11 Sajay i kabol la binay-anan son Apo Shiyos son si-kara ey angken sota o-owap i pati-en sha, ja pan-i-awis nonta toon tima-nil ja ngaaw i aramid to. 12 Jet emin sota eg memati ni maypangkep nonta kinapodno, ja say pipiyan sha et ngo mowan, sota aramid ja ngaaw, kenshat ta meshosa ira.
Salamat son Apo Shiyos tep insalakan shakejo ja too to
13 Nem si-kayon a-aki mi shi pamati ja ensemek nen Apo Jesus, anam ton man-iyaman kami ni olay son Apo Shiyos ni maypangkep son si-kayo, ta sigod ja pinidi shakejo nen Apo Shiyos ja maysedakan. Jet naysalakan kayo nontan, ta intorong shakejo ni Ispirito Santo nen Apo Shiyos say metopog sota podno ja maypangkep son Cristo i pati-en jo. 14 Say nayda-kaman jo son Apo Shiyos, sota inkowan mi son si-kayo, ja mapteng nga shamag maypangkep son Jesucristo. Jet si-katoy nayda-kaman jo nonta biyag nen Apo Jesucristo shi dangit. 15 Isonga niman, si-kayon a-aki mi shi pamati, nemnemnem jo sota inkowan min toro son si-kayo ja intenengan jo, ono binasayon insolat mi; karejo dibdibkan.
16,17 Jet niman, say shawat mi, sapay koma ta si Apo Jesucristo, tan si Apo Shiyos ja Ametayo, si-karay pekedsang so ni nemnem jo, say eg kayo medismaya, tan say mapteng ni olay i dag-en jo, tan ikowan jo. Sajay i shawat mi ja pesing nen Apo Shiyos, ta ensemek shakito, tan si-katoy mismon engaasi son si-katejo ja engi-kan ni naynay ya kedsang ni nemnem, tan sota ebadeg ga namnama.