2 I-Tisalonika 1

SOTA MAYKADWEN SOLAT NEN SAN PABLO PARA SO NONTA IRA

I-TISALONIKA

¹ Si-kak si Pablo ja makasolat niyay et say kadµak, si Silas nen Timoteo. Sajay ya solat, para son si-kayon tood ta Tisalonika ja kait min emati son Cristo, ja µara ma son Apo Shiyos ja Ametayo, tan si Apo Jesucristo. ² Jet say shawat mi son Apo Shiyos, sapay koma ta ma-shoman sota kaasi, tan talna, ja µara son si-kayo ja edapo son Apo Shiyos ja Ametayo, tan si Apo Jesucristo.

Inenosan joy digat et sobalitan ali nen Apo Shiyos no ka-onoran

³ A-aki mi shi pamati, mika nemnema ni olay ey mesepol la man-iyaman kami son Apo Shiyos ni maypangkep son si-kayo. Anam ton man-iyaman kami, ta say pamatiyo, emanba-deg ga pasiya et angken sota semek jo ni sakey tan sakey, emanba-deg ngon pasiya. ⁴ Isonga angken si-kami, µaray mika pengiredjaw son si-kayo so ni eshom iren emati son Apo Shiyos no ondaw kami shima ka-ili-ilin kad-an sha. Mika ikowan son si-kara i naynay ja pamatiyo, ta na-anos kayon mengitoded ni ebadeg ga digat ja joka da-da-kami.

⁵ Saja inpangitoled jo ni digat, ni eg jo engibi-jagan ni pamatiyo, si-katoy ka-asan to ey µares Apo Shiyos son si-kayo. Jet ma-sas pay ey no ka-onoran ali, sigoradon mapteng i pengesas to son si-kayo et ibilang tokejo shi pantoshayan to met laeng, tep si-katoy kabol ni dina-kaman jo so ni digat. ⁶ Si Apo Shiyos, enshiy toka pankodangi ni toka pengigsheng. Isonga sota ira emalikat son si-kayo, shosa ngoy isobadit to son si-kara. ⁷ Jet si-kayon nandigat, si Apo Shiyos aliy mengi-kan ni pannam-ayan jo, kasta met son si-kami. Sajay i pesing to ni imotok mowan ali nen Apo Jesus ja medepod dangit. Odopen to ali sota anghil to et ma-on-an na mismo sota ebadeg ga panakabalin to tan µara pay i apoy ya emanshedang. ⁸ Jet shosa-en to ira sota toon makadedamsis son Apo Shiyos, tan eg memati pay ni toro pangkep son Apo Jesus, ⁹ jet say shosa sha, maysi-jan ira son Apo Jesus et eg sha asen i mismon kinashiyos ton emenenili. Eg ira may-aknan ni biyag ja enshiy to engintegan, no diket meshosa ira ingkatod ingka. ¹⁰ No timpo alin imotok to, ishayaw ira nonta emin na too ton emati et si-kayo i sakey pay son si-kara tep pinatiyo sota inkowan mi son si-kayo. ¹¹ Nem say shawat mi ni olay son Apo Shiyos tayo ni maypangkep son si-kayo, sapay koma ta ipakat toy panakabalin ton ontolong son si-kayo, say maykeshi kayo nodta insagana to met laeng ja para son si-kayo no ka-onoran. Say tongpalen jon emin i mapteng nga joka nemnema niman na emati kayo son Cristo, ¹² tan say mayshedjaw i ngaran nen Apo Jesus ni sajay ya dag-en jo, jet kasta met ngo son si-kayo, mayshedjaw kayo ngo pangkep son si-kato. Enshiy eshom ma kedepo-i ni mesepol tayo nem eg sota kaasi nen Apo Shiyos tayo, tan si Apo Jesucristo.