4
Iyay i ikowan min pesing jo
1 Niman ma, si-kayon a-akik shi pamati, iyay i keshaw mi, ono shawat mi son si-kayo, maypangkep ni inpankagait tayo so nen Apo Jesus. Sota koma inashal jo son si-kamin ogadi ja mengi-kan ni pan-imdengan nen Apo Shiyos, si-kato komay onnaynayon ja itoltoloy jon dag-en. 2 Amtayo met sota intoro mi son si-kayo et sotan i toro met laeng ja edapo so nen Apo Jesus.
3 Say piyan nen Apo Shiyos maypangkep son si-kayo, piyan ton maypilmi kayo son si-kato, ja eg kayo ma manbesol. Isonga karekayo memii ono mekileki. 4 Si-kayon daleki, mesepol la dimpiyo i pesing jon mengesawa, nemnem jo sota mapteng nga ka-aporbali nen Apo Shiyos. 5 Say pengesawa, aliµen na en nemnemnemen i pandadsakan shi bii bengat, ja inges toy itsora ira nonta toon eg emati so nen Apo Shiyos. 6 Isonga mesepol la angken sipa son si-kayo, aliµen kayo memii. Ta say toon sajay i aramid to, toka pandoko-a i kait ton too. Mesepol la nemnemen jo ni olay ey si Apo Shiyos i onshosa so nonta toon sajay i aramid to. Isonga insigod min inbanshaan iyay son si-kayo. 7 Ta si Apo Shiyos, pinidi shakiton manbedin ni too to say manbiyag kito ja eg manbesol ma. Onkawas sota inpamidi to son si-katejo no mandeka kito ni edogit ja aramid. 8 Jet sota eg memati niyay ya toro, aliµen na sota toon emengitosho niyay i eg to pinati, no diket si Apo Shiyos, ja engi-kan son si-kayo ni Ispirito Santo to.
9 Nem no sota maypangkep ni penmek jo ni kait jon emati, eg mesepol la µaray en maysodat ja pengamta-an jo ni pesing jo, ta si Apo Shiyos, si-katoy mismon engitosho son si-kayo ey sesmeken joy kait jo, 10 jet siya, dingkayo. Ta ensemek joy kait jon emin na emati shita intiron Masidonia. Jet say kowan mi, sajay komay itoloy jon dag-en, ja onnaynayon. 11 Jet daga jon emin i kabaalan jon manbiyag ga etalna; karekayo mekibiyang shi kedagdag-a ni kait jo. Nem pan-obda kayo et ni panbiyagan jo. Ta sajay i inbilin mi son si-kayo nontan pay laeng. 12 No sajay i pesing jo, sota ira toon enshiy pamati to, rispito-en shakejo. Jet no sota pangkep ni panbiyag jo, aliµen sota eshom i jo panshindan.
Sota maypangkep ni nanketey ya kait tayod pamati, no ondaw mowan ali si Cristo
13 Si-kayon a-akik shi pamati, piyan min amta-an jo ey sota ira kait jo len emati ja nanketey, mapteng met laeng aliy panpa-no-an sha. Isonga aliµen na si-kato komay en pansekitan ni nemnem jo, ja inges toy µared nemnem ira nonta toon enshiy namnama sha shi ma-onod alin biyag. 14 Kitejoka memati ey si Jesus, etey, nem nan-ongal met laeng. Jet kitejoka memati met laeng ey si Apo Shiyos, panbiyag to ngo ali sota ira nanketey ja emati so nen Jesus et peki-odop to ira son Jesus no maykadµen idaw to mowan ali. 15 Jet say planon inpa-amta nen Apo Jesus son si-kami, sajay. Si-katejon ebay-an ja µared biyag ni sajay alin i-oli mowan nen Apo Jesus, aliµen si-katejo i mepangdon may-aspol son si-kato. Nem say mepangdo, sota ira kait tayon emati ja nanketey da. 16 Sotan alin idaw nen Apo Jesus, mepangdo nin ja µaray keljaw wa maytetnengan alid dangit, ja si-kato sota bilin na ikeljaw nonta kapitan ni anghil, tan µara pay i maytetnengan ja janget ni trompita nen Apo Shiyos, jet sotan ma aliy idespag nen Apo Jesus, ja medepod dangit. Jet say dag-en to ma, panbiyag to ira sota nanketey ya emati so nen Cristo. 17 Jet si-katejon ebay-an na emanbibiyag pay laeng, ma-da kito met laeng et ontened kito et aspolen tayo shi kad-an ni kolpot sota ira biniyag nen Apo Shiyos ja nanketey nontan, asan kito ma may-aspol so nen Apo Jesus shima naykayang nga dinespagan to. Jet no meksheng ma iyay, µara kito ma son si-kato ingkatod ingka, pati ira sota nanketey da nontan. 18 Jet niman ma, sajay ya inkowan ko la, si-katoy idiwdiwa jo so nonta ira emandeshingit ja eteyan ja kait jon emati.