2
Nemnem jo sota inpaspasing mi nonta µara kami shita kawad-an jo
1 Si-kayon a-akik shi pamati, amtayo met ja mismo ey sota indaw mi shita kad-an jo, asdeg toy nanbanagan to. 2 Nonta inpanshalan mid Pilipos ja ondaw shita kad-an jo, ngaaw i inpaspasing ni tood man son si-kami; binebaingan shakami. Nem amtayo, in-aknan shakami nen Apo Shiyos tayo ni toled ja mengikowan son si-kayo nonta mapteng nga shamag ja edapo so nen si-kato. Eshakel shitan i makakontra son si-kami maypangkep ni mika pan-ikowan, nem angkena. 3 Sajay ya mika pengadok so ni too, podno; aliµen edapod ngaaw wa pangkep ono sikap. 4 Si Apo Shiyos, inapolbaran tokami et sota mapteng nga shamag pangkep so nen Jesus, inpiyal to son si-kami, ey si-kamiy mengikowan so ni totoo. Jet say mika pengitosho, eg mi i-anam nodta kowan ni too ey piyan sha, no diket emay-enam nodta piyan nen Apo Shiyos sa maytosho say man-imdeng si Apo Shiyos, ta si-kato bengat i maka-amta ni µared nemnem mi. 5 Amtayo met ey enshiy esel min emengantiyok; tan amta nen Apo Shiyos ey enshiy mi inosal la kekaskasin mapteng nga esel ja pengeda-an mi ni pilak son si-kayo. 6 Aliµen sota pengiredjaw jo son si-kami i mika kamkamkami nonta µara kami shita kawad-an jo, ono sota pengiredjaw ni eshom. 7 Nontan da, mebedin na sota ibilin mi, si-katoy pilit ta dag-en jo, ta apostol kami nen Cristo; nem na-anos kamin singa sota ina ja emengajowan ni anak to. 8 Ebadeg i semek mi son si-kayo, isonga piyan min pasiya ja itoro son si-kayo sota mapteng nga shamag ja edapo son Apo Shiyos. Jet aliµen sajay bengat, no diket esagana kami pay ya mengosal ni biyag min ontolong son si-kayo. Sotan i ka-asan to ey bima-deg i semek mi son si-kayo!
9 Jet si-kayon a-akik shi pamati, mebedin na eg jo dinibkan pay laeng sota itsora ni mika pansepol ni panbiyag mi nontan. Angken edabi, tan ka-akawan, kamika man-obda ni panbiyag mi, ta en-asneng kamin µaray mankastos son si-kayo maypangkep son si-kami, ni mika pengikowan nonta mapteng nga shamag ja edapo so nen Apo Shiyos. 10 Si-kayon mismo i maka-amta, tan kasta met son Apo Shiyos ngo, amta to ey sota piyan ton mapteng nga dag-en mi, si-katoy dingka mi ni olay son si-kayon emati et enshiy mebedaw nonta emin na dingka mi. 11 Amtayon mismo met sota inpasing mi son si-kayo, ja inges toy kepesing ni ama ja memidin ni annak to. 12 Isonga binidin miy sakey tan sakey son si-kayo, say onkedsang i nemnem jo. Jet in-adok mi pay nontan ey say dag-en jo koma ni olay, sota mapteng ta si-katoy anam ni toon emati son Apo Shiyos. Sajay i inkowan mi, ta si Apo Shiyos i emili son si-kayo ja mayda-kam shi pantoshayan to, ono shi shayaw to.
13 Jet kamika man-iyaman ni olay so nen Apo Shiyos maypangkep ni sajay, ta idi intenengan jo sota inkowan mi ja esel nen Apo Shiyos, ineµat jo. Jet sotan na ineµat jo, indasin jo ey aliµen edapod nemnem ni too, no diket si Apo Shiyos i edapo-an to. Jet sotan na esel nen Apo Shiyos i emengitoshong son si-kayo, ta emati kayo. 14 Si-kayon a-akik shi pamati, sota dina-kaman jon digat, inges to sota dina-kaman ira nonta tood Jodia ja kait tayo met laeng shi pamati son Cristo Jesus, ja pinedigat ni kaidiyan shen Hodiyos, ta say emaligat met laeng son si-kayo, sota kaidiyan jo. 15 Sota apo ira niya Hodiyos, si-karay bimono so nonta ira para padto nen Apo Shiyos nonta bayag da. Jet niman, sajay ngo iren annak sha, si-karay bimono so nen Apo Jesus et si-kara pay i emaligat son si-kami. Nem eg kosto nen Apo Shiyos iya shaka dagdag-a. Eg sha pay nemnemen i pansigshan ni kait shen too shiya dobong, 16 ta shakamika dingdinga ja mengikowan nonta esel nen Apo Shiyos so ira nonta toon aliµen Hodiyos, say maysedakan ngo ira koma. Sajay i nay-eshom pay nodta basol sha ja shaka ma-ma-ma-a et anongosto ma ey shanshanin shosa-en ira nen Apo Shiyos.
Piyan kon amta-en i kasesaad jo, isonga inbetkag ko la si Timoteo
17 Si-kayon a-akik shi pamati, simpi-an mikejo, isonga piyan min pasiya ja asen mikejo mowan. Angken nonta ikaydekjas mikejo so, ingkato niman na nan-i-inaraµi kito, epaladoy nemnem mi son si-kayo. 18 Piyan min pasiya ja on-oli son si-kayo mowan shitan et si-kak, naka memasig ey ondawak da son si-kayo, nem si Satanas toka kolkolkola. 19 Say naka pemasigi ja ondaw da son si-kayo, enshiy eshom ma kawad-an ni namnama mi, ono imdeng mi, ono singa primiyo mi ni idaw ali nen Apo Jesus, no eg si-kayo bengat. 20 Ta agpayso ja si-kayoy kawad-an ni shayaw mi, tan emengi-kan ni imdeng mi.