3
1 Niman, ta badoy biyag jo, ja may-eshig ey ekibiyag kayo son Cristo, tan nayda-kam kayo son si-kato ni inpan-ongal to, mesepol la say toshongen ni poso jo, sota pengonod ni mapteng nga ogadi nen Cristo. Ta si Cristo niman, wared dangit, ja in-aknan nen Apo Shiyos ni panakabalin ton mantoshay.2 Sota maypangkep son Cristo shi dangit, si-kato komay nemnemnemen jo, ja aliwen inges toy nemnem ni karakdan na tood ja dobong,3 ta si-kayo, may-eshig ey singa etey kayo ja enshi may kaybiyangan jo nodta nemnem ni karakdan shi dobong. Niman ma, say biyag jo, si Cristo shi dangit i engegshi, ta wara kayo son Apo Shiyos.4 Si Cristo i koston kawad-an ni biyag jo, jet no man-odi ali mowan, mesa-datan i bakdang tayon may-inges son si-kato; onniyal, ja inges toy wared dangit.
Sota anam ma dag-en, tan sota aliwen anam ma dag-en ni toon Cristo
5 Niman, ta enshiy kaybiyangan jo nodta nemnem ni karakdan shiya dobong, ibiyang jo sota dingdingkayon ngaaw. Karekayo memii, ono mandeka ni eshom ma ensekig ga aramid; karejo nemnemen ja dag-en sota ngaaw wa pangkep; karejo pingitan sota banag ga pipiyan jon pasiya, ta sotan, singa inges toy panshedjaw ni sinan shiyos. 6 Karejo dag-en iyay, tep sota mandeka ni olay niyay ya ngaaw wa aramid, shosa-en nen Apo Shiyos tep eg ira memati ni bilin to. 7 Nontan den eg kayo pay laeng memati, nay-inges i ogadiyo nodta toon nandagdaga ni ngaaw wa ogadi. 8 Nem niman ma, apil. Isonga ibi-jag jon dag-en ira jay ya aramid: sota igem, bonget, somang, tan sota eshom ma esel ja menekit ni eshom; 9 tan ibi-jag jo pay sota pan-i-inolbod. Sina-datan jo met sota sigod ja ngaaw ja wared nemnem jo, isonga enshi komay ngaaw wa ogadiyo. 10 Jet wara ma son si-kayoy badon nemnem, ja pinalsowa nen Apo Shiyos ja nay-inges son si-kato. Jet toka bado-i ni olay, say amta-an jon pasiya i ogadi to. 11 Isonga niman ma, enshiy en nandasinan ni angken sipen too ja binado-an nen Apo Shiyos. Nan-i-inges i toon aliwen Hodiyos ono sota Hodiyos, nan-ashal ono eg nan-ashal, baga-en ono aliwen baga-en. Nan-i-inges ta say menemnem ma, si Cristo i wara son si-katejon emin.
12 Jet niman ma, tep too shakejo nen Apo Shiyos, ja ensemek to, mesepol la isa-dat jo sota mapteng nga ogadi nodta sigod ja ngaaw, jet iyay i eshom: mesepol la wara son si-kayo i kaasi, anos, tan penodong ni kait ta too; mesepol la eg jo ipilit i kostoyo. 13 Pan-i-inanos kayo, mesepol la esagana kayon memekawan ni eshom, no waray eg jo pan-i-inawatan. Si Apo Jesus, pinekawanan shakejo, isonga mesepol ngon pekawanan jo sota nanbasol son si-kayo. 14 Jet niman, say epateg komen pasiya ja wara son si-kayo, sota penmek jo ni sakey tan sakey, ta si-katoy emengi-kan ni panseksekeyan jo ni olay. 15 Jet sota olnos ja wara son si-kayo ja edapo son Cristo, mesepol la si-kato komay nemnemen jo. Karejo dibdibkan ey si Apo Shiyos, inpansaksakey shakejo met nonta inpanbalin shakejo ni too to, jet singa sakey kayo men bakdang. Tan karejo dibdibkan ja man-iyaman ni olay son Apo Shiyos, kabol niyay ya dingka to son si-kayo. 16 Jet niman, say eg jo dibdibkan sota toro ja intenengan jo ja esel nen Cristo, osal jon emin sota amtayon pesing nga mengitosho, tan memanshaan, ni sakey tan sakey son si-kayo. Tan i-shom jo pay shi iyaman jo son Apo Shiyos sota kankansiyon ja pengiredjaw son si-kato, pati sota ira salmo. 17 Jet emin na dag-en jo, ono ikowan jo, nemnem jo nin koma sota kayshedjawan nen Apo Jesus. Pan-iyaman kayo ni olay son Apo Shiyos ja Ametayo, ta too shakejo pangkep son Cristo.
18 Si-kayon bibiin waray asewa to, patiyoy asewayon daki, ta sajay i anam ma dag-en ni emati son Cristo. 19 Jet angken si-kayon daleki ja waray asewa to, mesepol la sessesmeken jo ni olay i asewayon bii; karejo ira penginda. 20 Si-kayon a-anak, mesepol la pati-en jo ni olay sota kowan ni maka-anak son si-kayo, ta sajay i kekosto-i nen Apo Shiyos. 21 Jet si-kayo ngon a-ama, karejo ida-karan i annak jo ni seg-ang, say eg ira medismaya.
22 Si-kayon baga-en, patiyo ni olay ja emin i ikowan ni apo jo; aliwen man-edisto kayo bengat nem wara sota apo jo ja emanbantay son si-kayo, say ikowan jo ey ikowan nonta apo jo ey ma-obda kayo. Ta aliwen sota aporbal ni too bengat i jo nemnemen. Pan-obda kayon kosto ja mandepod poso jo, ta sotan i anam ni toon memati son Apo Shiyos. 23 Angken nganton obda, karejo nemnemen ey too bengat i joka pansilbi-i, no diket nemnemnemen jo koma ey joka pandag-a sotan kabol son Apo Jesus. 24 Amtayo met ey si Apo Jesus, waray isobadit ton konkona jo kabol nonta dingkayo son si-kato, jet say i-akan to son si-kayo, biyag shi dangit. Si Cristoy joka pansilbi-i, 25 jet no eg jo onoren iyay, ja ngaaw i pesing jo, ikaro jo son Apo Shiyos. Si Apo Shiyos, nan-i-inges i toka pesing shi totoo; enshiy toka pabori.