13
1 Sajay i maykatdon dawan ko la son si-kayo, jet no ondawak da, i-anam koy pemidin nodta sigod ja wared bilin nen Apo Shiyos nonta bayag da, ja kowan to ey, “No waray kowan ni too ey nanbasol, mesepol la waray showa ono tedon onpaneknek so, asan joka pati-a.”2 Nonta naykapinshowa ja indaw ko shita kad-an jo, sota inbanshaan ko so nonta nanbasol nontan, tan si-kayon eshom, si-kato met laeng; ekak bediwan. Ta say inbanshaan ko met nontan son si-kayo, kowan ko ey no ondawak mowan da, shosa-en kon emin ira sota nanbasol, enshiy nak pesinsiya-an son si-kara. Jet angken niman na enshi-ak son si-kayo, sotan met laeng i isolat kod jay.3 Ipa-sas ko son si-kayo ey podnon si Cristo i enotok son si-kak ja apostol, ta sotan konoy piyan jo. Jet eg jowak koma damsisen, ta aliwen na ekapoy si Cristo ja memidin son si-kayo. Mebedin ton ipa-sas i panakabalin to son si-kayo.4 Agpayso ja nonta naydansa shi koros, ekapoy ja inges tayo, nem nonta nan-ongal, Manakabalin ma ja inges tos Apo Shiyos. Jet angken si-kamin apostol, ekapoy kami ja inges tos Jesus nonta wared biyag pay laeng; nem makedsang i pemidin mi son si-kayo, ta nayda-kam kami nonta panakabalin nen Jesus ja wared dangit.
5 Piyan jo konon asen no si Cristo ket wara son si-kak. Nem say kowan ko son si-kayo, asas jo shorog i ogadiyo, no wara kayo pay laeng son Cristo ja emati. Ta say ekak amta, no si-kayo ket aliwen agpayson emati kayo. Istay mebedin komen idasin jo no si Cristo, wara son si-kayo. 6 Jet no dag-en jo iyay, naka namnama-a ey amta-en jo met laeng ey agpayson wares Cristo son si-kami. 7 Say shawat mi son Apo Shiyos pangkep son si-kayo, onmapteng koma i ogadiyo. Say kabol la sajay i shawat mi pangkep son si-kayo, aliwen say ikowan ni totoo ey “Siya, agpayson apostol noman si Pablo ta mapteng i ogadi noman ira nima inewis ton emati!” Enshi, sajay i shawat mi ta piyan mi bengat sota panmaptengan jo. No onmapteng i ogadiyo, enshiy kabol la keshosa-an jo, nakol ni toy-an shakami pay laeng ni eshom, ta kowan sha ey enshiy mi inpa-sas sa panakabalin min menosa ja ketekotan sha. Nem say kowan mi, angken damsisen shakami, no onmapteng kayo et. 8,9 Jet say shawat mi son Apo Shiyos, piyan min onmapteng i ogadiyo; eg mi nemnemen ey eg kayo koma manbebawi say ipa-sas miy panakabalin nen Apo Shiyos ja wara son si-kami ja menosa son si-kayo. Enshi, eg mebedin na piyan min medeka sota maykontra nodta podnon toro nen Apo Shiyos. Say piyan mi, sota podno ni olay i medeka. Mas pay komay imdeng mi no si-kamiy ekapoy, ey si-kayo ngoy makedsang. 10 Insolat ko iyay niman na ka-enshik pay laeng son si-kayo, ta piyan kon no onmotokak da, eg mesepol la ida-karan takejo ni bilin. Ta sota saad kon in-awat nen Apo Jesus, say kowan to ey osalan ko so, sota ontolong son si-kayo say onkedsang i pamatiyo; eg to koston sheshalen takejo.
11 Jet siya, niman ma, si-kayon a-aki shi pamati, pan-imdeng kayo. Pannemnem kayo say man-i-inawatan kayo. Patiyo sota inbilin ko son si-kayo. Pansaksakey joy nemnem jo say waray olnos jo. Jet no sajay i dag-en jo, si Apo Shiyos ja kedepo-i ni semek tan talna, si-kato i mewesha pay son si-kayo ni olay. 12 Ipa-sas joy semek jo shi sakey tan sakey son si-kayo. 13 Jet emin ira sota ematid ja ilin kawad-an ko, inkowan sha ey pekisodat kod jay i semek sha son si-kayo.
14 Jet say shawat ko son Apo Shiyos, sota kaasi nen Apo Jesucristo, tan sota semek nen Apo Shiyos, ja wara son si-kayon emin, sapay koma ta si-katoy ma-shoman, tan kasta met sota inpankagait jo ta wara sota Ispirito Santo nen Apo Shiyos so ni sakey tan sakey son si-kayo.