2 I-Korinto 12

¹ No sota maypangkep ni pandastog, enshiy to i-akan na panmaptengan ko. Nem mesepol la itoloy kon ikowan sota epaspasemak son si-kak. Niman, sodsoren ko sota inpa-sas nen Apo Jesus, tan inpa-amta to son si-kak.² Waray amtak ka toon emati so nen Cristo, jet nonta epalabas den sampolo tan epat ta tawen, indaw nen Apo Shiyos sotan na too shi mismon dangit. Jet ekak amta no mismon sota kabakbakdang nontan na too, ono aliwen mismo ja bakdang to i dimaw shiman, nem si Apo Shiyos, amta to.³ Sajay ya too, amtak ey agpayson dimaw shima kad-an nen Apo Shiyos, nem say ekak amta, no mismon sota bakdang to, ono enshi. Si Apo Shiyos bengat i maka-amta niyay.⁴ Jet shiman, waray intenengan ton esel ja eg mebedin na mayteshos shi esel ni si-katejon too, asan naykowan son si-kato ey parit i pengi-odog to.⁵ Jet sajay ya too, waray mebedin na idastog ko pangkep son si-kato. Nem no si-kak ka mismo, enshiy eshom ma nak idastog nem eg sota inkowan ko la, ja emengipa-amta ni kakapoy ni bakdang ko.⁶ Nem no istay piyan kon mandastog, aliwen pampamaayan, ta agpayson eshakel i koston dingdingkak. Nem ekak ma mandastog, ta baka et ey pasiya-en ni totoo i shayaw son si-kak. Piyan kon say nemnemen sha koma ja ogadik, sota asen sha son si-kak, tan sota itenengan shen ikowan ko.

⁷ Eshakel la pasiyay inpa-amta nen Apo Shiyos son si-kak, nem say inpasing to say ekak ikayang shorog i bakdang ko, waray inpalobos ton digat ni bakdang ko ja naka da-da-kami, ja singa waray tebek ni olay shiya daman ko. Singa waray toka ibetbetkag ja anghil nen Satanas ja emenekit son si-kak, say ekak ingato i bakdang ko shorog. ⁸ Jet emintedo ja nanshawatak so nen Apo Jesus ey a-kalen to koma iyay ya naka da-da-kami. ⁹ Nem eg to ingkal. Say songbat to et, kowan to ey, “Sota kaasik son si-kam, on-anay ja pekedsang son si-kam. Ta sota panakabalin kon mengaasi, agdalon naka i-akan so nonta ekapoy.” Kowan nen Apo Jesus. Isonga naka man-imdeng nga pasiya ja mengenos niyay ya digat ko, say sota panakabalin nen Cristo ja toka penodong, ipakat to ngo son si-kak. Jet angken ekapoyak, si-katoy naka idastog. ¹⁰ Isonga niman ma, napnekak; angken ekapoyak, enosan ko. Jet enosan ko pay no bebaingan sha-ak, ono pedigaten sha-ak, ono angken nganton digat i da-kaman ko. Ta amtak ey emin iyay ja emedegdeka son si-kak, pangkep so nen Cristo ja naka pansilbi-i. Amtak ey no timpon ikapoy ko, si Cristo met laeng i mengi-kan ni kedsang ko.

¹¹ Si-kayo met i emilit son si-kak, isonga sajay i inkokowan ko la; nakol ni singa wara may kolkolang ko. Istay si-kayo komay mengikowan ni kamapteng ko, say aliwen na si-kak koma et ngo mowan i mengisodat ni maypangkep ni bakdang ko. Ta si-kak, amtak ey angken ootik bengat, eg sha-ak ebaken nonta kowan sha ey kangeto-an konon apostol shitan, angken bilang ey agpayso sota kowan sha ey enshiy silbik kono, ta enshi ngo met kariy silbira! ¹² Say ka-asan to ey koskoston apostolak, wara met i koston dingkak ja kaskasshaaw tan milagro nonta kawashak son si-kayo, tan sakey pay, inenosan ko i eshom son si-kayo ja makakontra son si-kak. ¹³ Jet enshi met i nak inpabor so ni emati shima eshom ma dogad ja ekak ngo inpabor son si-kayo. Say amtak bengat ja singa inpabor ko son si-kara, sota inpangados sha ni kasapolan ko. Jet pakawani jowak ni sajay ya nankolangan ko, ta eg takejo ngo inpangados!

¹⁴ Jet sajay ya maykatdon idaw ko la son si-kayo, ekak met laeng koston mankastos kayo pangkep son si-kak. Ta aliwen sota pilak jo i piyan ko, no diket mismon si-kayo i piyan ko. Ta say kay-eshigan to, aliwen na sota ira a-anak i mengi-kan ni kasapolan nen amesha, no diket sota amesha i mengi-kan ni kasapolan ni annak to. ¹⁵ Aliwen entapik ja kastosen i nganton wara son si-kak, tan mebedin pay ya osalen ko iya bakdang ko, ja ontolong son si-kayo. Jet no bilang ey sajay i kaba-deg ni semek ko son si-kayo, eg jowak ngo ngata sesmeken?

¹⁶ Mebedin na imanogot kayo nonta inkowan ko la, ey enshiy kastos jo ni kawashak shitan. Nem say kowan kono ni eshom son si-kayo, sotan i intapang ko say may-owapan kayo jet say si-kak i onoren jo. ¹⁷ Nem enshi met i nak inolbod son si-kayo nonta waray inbetkag ko la ja ondaw son si-kayo. Nemnem jo kari. ¹⁸ Si-kak i mismon engikowan so nen Tito ey ondaw son si-kayo, jet engibetkagak pay ni nay-olop son si-kato ja agi shi pamati. Jet enshi met i amtak ja sha inda son si-kayo. Nan-inges met i pangkep mi son si-kayo, ta nan-inges kamin emengonod son Cristo.

¹⁹ Sigosho say wara mowan shi nemnem jo, kowan jo ey kamika mandeson son si-kayo pangkep nonta inkowan jon nankolangan mi. Enshi, si Apo Shiyos bengat i maka-amta no kostoy dingka mi, ono enshi. Jet amta to ey wara kami son Cristo. Emin iyay ya inkowan mi la son si-kayon a-aki mi shi pamati, panmaptengan jo met. ²⁰ Ta naka manshanag ta baka et ey no onmotokak da son si-kayo, eg jo pay laeng tinongpal sota naka namnama-a ja dag-en jo. Nakol ni ekak dag-en sota joka namnama-a, ja enosan takejo. No onmotokak da, baka eg jo pay laeng binediwan sota sigod ja ogadiyo, ja kayoka manbabakal, waray apal jo ni kait jo, waray mabonget, waray ma-isew, waray mayamjam, waray masomang, waray edastog. Baka ngalawngaw kayo, ja enshiy olnos jo. ²¹ Naka manshanag ta baka no ondawak da son si-kayo, mandeshingitak pangkep so nonta ira eshakel la nanbasol ja kait jo nontan da, ja eg pay laeng nanbebawi. Baka ingkato pay laeng niman ket ireka pay laeng ememii ono wara pay laeng son si-kara sota eshom ma kilasin edogit ta aramid, nakol ni say pedekna nen Apo Shiyos son si-kak, ibaing takejo.