6
1 Sajay ya obda, mika pan-atngi si Apo Shiyos ni obda to; isonga iyay i kekshawen mi son si-kayo. Niman na kinaasi-an shakejo nen Apo Shiyos, osal jod pansigshan jo, karejo pekewas sota inkaasi to.2 Alisto-iyon mengosal niyay ya kaasi. Nemnem jo kari sota inkowan nen Apo Shiyos ja naysolat nonta bayag da ja kowan to ey, “Nonta simabi sota koston timpo, kinaasi-an takejo, tinodongan takejo, say maysedakan kayo.” Kowan nonta padto, jet marama ma niman sota inpadto ton timpon kaysedakan; isonga awat jo et ma.
3 Enshiy mika dag-a ja bedawan shakami so ni eshom, ta eg mi kosto ja ikowan sha ey ngaaw iya obda mi. 4 Say mika dagdag-a et ngo mowan, angken nganton banag, mika ipa-sas ey si Apo Shiyos i mika pansilsilbi-i; isonga angken nganton digat, mika itoled. 5 Jet iyay i eshom ma digat ja dina-kaman mi. Dina-kaman miy sepdat, dina-kaman miy balod, dina-kaman mi pay i bonget ni eshakel la totoo. Kamika emebdey ni obda, eg kami pay maka-ogip ni medebi no sin-arom, tan dina-kaman mi pay i agang. 6 Jet say mika pesing pay ja mengipa-sas ey si Apo Shiyos i mika pansilsilbi-i, poro mapteng i pangkep mi, mika pan-itoro sota inpa-amta nen Apo Shiyos son si-kami, na-anos kami pay ja mika todongiy kait min too. Mika ipa-sas ni olay ey sota Ispirito Santo nen Apo Shiyos i emengitoshong son si-kami, jet waray podnon semek mi shi eshom. 7 Sota koskosto, si-katoy mika ikowan, jet say sakey pay, edawag ey sota panakabalin nen Apo Shiyos i ka-ontolong son si-kami. Singa say mika osala ja mekisengo so nonta ira eg makakosto ni mika itoro, saja mapteng nga ogadi mi; jet sajay, kaon-anay, enshiy kolang to. 8 Sota ira eshom, inshayaw shakami, jet sota ira eshom, binedaw shakami. Sota ira eshom, kowan sha ey ngaaw kami, nem sota ngo ira eshom, kowan sha ey mapteng kami. Nem enshi met i ngaaw wa dingka min kabol ja shakami so bedawan. Agpayso i mika ikowan, nem kowan ni eshom kono ey ma-owap kami. 9 Sota karakdan na too, eg shakami am-amta, nem si Apo Shiyos, tan sota ira too to, amtara kami. Inbilang shakami ni karakdan ey etey kami, nem wara kami pay laeng met shi biyag. Pinedigat shakami, nem eg kami ebono met laeng. 10 Kamika emandeshingit, nem wara met laeng ni olay i imdeng mi; ebiteg kami, nem eshakel met i singa inpabaknang mi; enshin polos i kokowa mi, nem singa in-akan nen Apo Shiyos son si-kami i emin na waray banol to.
11 A-akik shi pamati ja i-Korinto, indiritso min inkowan iyay ya dekna mi. Say agpayso, ebadeg i semek mi son si-kayo. 12 Enshiy ngaaw wa wared nemnem mi pangkep son si-kayo, nem si-kayoy eg makakosto son si-kami. 13 Saja naka pan-ikowan son si-kayo, takejoka ikari ey singa annak takejo; isonga angken si-kayo ngo, semek jokami ngo koma.
Pantanshaan kayo tep baka onoran jo et sota totoon enshiy pamati to son Apo Shiyos
14 Karejo ikadwa shorog i bakdang jo so nonta ira eg emati tep eg kayo mankinompasan. Say arig to, sota baken nanparis sa mengojod ja eg nan-inges i kedsang sha. Enshi met i naykamitan ni toon mapteng so nodta toon naykontra son Apo Shiyos i aramid to; jet enshi met laeng i naykaitan ni toon edawagan i nemnem to so nodta toon eg edawagan i nemnem to. 15 Apay mankompas aya i ogadin Cristo tan si Satanas? Enshi met. Jet angken ngon si-katejon emati son Cristo, eg nay-inges i nemnem tayo nodta wared nemnem ni eg emati. 16 Si-katejo i may-eshig ey Timplo nen Apo Shiyos et na-alas no ikadwa i Timplo nen Apo Shiyos nodta inemag ni toon sinan shiyos. Ta si Apo Shiyos, wared biyag. Isonga wara sota naysolat nonta bayag ja esel to, ja kowan to ey, “Panbedin ko ira ja may-eshig ey baley ko et man-iyanak son si-kara say wara-ak ni olay son si-kara. Jet si-kak ma i metopog ga Shiyos sha et si-kara ngo ma i took.” 17 Jet kowan to pay ey, “Isonga ilesin joy bakdang jo et karekayo mekibiyang ma so nodta kedagdag-a nonta ira toon enshiy Shiyos to. Bay-iyo sotan na ngaaw wa aramid sha, say ewaten takejo. 18 No sotan i dag-en jo, si-kak ma i Amejo, jet si-kayo i annak kon daleki, tan annak kon bibii.” Sajay i kowan nen Apo Shiyos ja Manakabalin.