5
1 Amta tayo met ey saja bakdang tayo, ja may-eshig ey kampo ja tayoka pan-iyani ni sanka-atikan, mesheshal ngo eshan. Nem wara i dingka nen Apo Shiyos ja koston pan-iyanan shi naykayang ja aliwen dingka ni too. Sajay, eg mesheshal, wara ni olay ingkatod ingka.2 Shiya dobong, singa kitoka man-ingag ni digat tayo; isonga kitoka man-a-agag ga pasiya ja no mebedin, ondaw kito ma shi dangit ja kawad-an ni koston pan-inan.3 Sotan may osalen tayo say aliwen na may-eshig ey dabos kito.4 Niman na kawasha tayod ja bakdang tayo, ja may-eshig ey kampo ja tayoka pan-iyani, singa kitejoka mannged-as ta edigat i biyag shiyay. Nem aliwen say piyan tayo, maydekjas iya bakdang tayo niman, ta nakol ni singa dabos kiton enshi may pan-inan. Say piyan tayo, mayta-kep koma sota bado, ta si-katoy pilmi, jet say saja bakdang tayo niman na emetey, mesa-datan na kolpi ni biyag ja wara ni olay ingkatod ingka.5 Esagana kiton ma-aknan niyay ta si Apo Shiyos met laeng i engisedakan son si-katejo. Jet sota Ispirito Santo to ja wara son si-katejo, si-katoy penigorado-an tayo ey tongpalen to di.
6 Isonga eg kito medismaya, makedsang ni olay i namnama tayo, no pay arawi kito nin son Cristo. Amta tayo ey no wara kito pay laeng shiya bakdang tayo, ja wara kito pay laeng shi biyag, enshi kito nin shima koston pan-inan. 7 Ta shiyay, kitoka memati bengat son Cristo; eg tayo nin inon-an. 8 Nem makedsang i namnama tayo, jet say piyan tayo, angken maydekjas iya bakdang tayo say on-akad shima kad-an nen Apo Jesus. 9 Isonga say wared nemnem tayo, angken niman na wara kitod jay, ono shiman da, piyan tayon sota pan-imdengan nen Apo Shiyos i dag-en tayo. 10 Ta emin kito, onsango kito so nen Cristo, jet bisna-en toy dingdingka tayo nonta kawasha tayod biyag shiya dobong, no mapteng ono ngaaw, jet ewaten tayoy sobadit nonta dingka tayo.
11 Amta mi ey si Apo Jesus, si-katoy mesepol la metekotan; isonga mika ad-adokay toon memati nonta kowan mi. Jet si Apo Shiyos, amta to ey enshiy ngaaw wa pangkep mi; naka pay namnama-a ey angken si-kayo, amtayo ngo. 12 Nem baka kowan jo ey mika pan-isagot mowan i bakdang mi shorog son si-kayo. Enshi. Kina-agpayso to, piyan min ipa-amta son si-kayo iyay, say wara ngoy ikowan jon mapteng nga itsora mi so nodta totood tan ja say shaka shedjawa ket sota toon mengipa-sas ni nandasinan tod eshom, aliwen sota toon podnon mapteng i wared nemnem to. 13 Jet no bilang ey kowan sha ey edabas i mika pesing, ja singa kamika man-engaw, mebedin; nem dingka mi sotan maypangkep so nen Apo Shiyos. Nem niman, no koskosto iyay ya mika pan-ikowan son si-kayo, ja aliwen edabas, pansigshan jo met laeng. 14,15 Sota semek nen Cristoy emengitoshong son si-kami, isonga aliwen bakdang mi bengat i mika nemnemnema, angken ngarantoy dag-en mi. Ebadeg i semek to son si-katejo, isonga etey para so ni emin na totoo. Isonga mika kowinta-a ey singa etey kiton emin et no sotan, eg mi nemnemen i pansigshan mi shorog. Jet aliwen si-kami bengat, no diket si-katejon emin ja wara pay laeng shi biyag, aliwen tayo nemnemen ma i pansigshan tayo shorog, no diket si Cristo i nemnemen tayo, ta etey maypangkep ni pansigshan tayo, nem nan-ongal met laeng.
16 Isonga say kowan mi, no kowinta ey etey i totoo, eg mi ma ibilang i kasesaad ni angken sipen too shiya dobong. Angken si Cristo, kowan mi nem too bengat nontan da, nem niman aliwen sotan ma i wared nemnem mi pangkep son si-kato. 17 Jet angken sipen too ja memati so nen Cristo, mebediwan i wared nemnem to; singa badon palsowa ma. Sota sigod ja ogadin ngaaw, enshi mala, jet sota bado, si-katoy naysa-dat ma. 18 Jet emin iyay, si Apo Shiyos i dimaga so, ta si-kato met laeng i engawat son si-katejo pangkep nonta inkatey nen Cristo, jet in-esop shakito met laeng son si-kato say dag-en tayo may piyan to. Jet say piyan to ngon dag-en min apostol, itod-an miy eshom ma totoo say may-a-sop ngo ira son si-kato. 19 Say olog nonta inkowan ko la, nonta etey si Cristo, si Apo Shiyos, toka pandag-a i pesing ton mengi-sop met laeng so ni emin na totoo son si-kato, say eg to ma ibilang sota ngaaw den aramid sha. Jet sajay i inpiyal ton itoro mi. 20 Shinotokan shakami nen Apo Shiyos ja mengi-edagey son Cristo, isonga no mengadok kami ni too, aliwen nemnem mi ni abos, no diket nemnem nen Apo Shiyos sota mika pan-i-adok. Isonga shewaten mi ngarod son si-kayo kabol so nen Cristo ey ipalobos jon i-esop shakejo nen Apo Shiyos son si-kato met laeng. 21 Si Cristo, enshin polos i ngaaw wa aramid to, nem si Apo Shiyos, inkowan to ey si-kato et ngo mowan i mengikesho nonta basol tayon totoo, say no memati kito son si-kato, ibilang shakito ma nen Apo Shiyos ey mapteng kito, ja inges ni ogadi tayoy ogadi to met laeng.