16
Sota pesing jon mengi-kan ni tolong jo so nonta kait jon emati ja ebiteg
1 Niman, iyay i pesing jo nonta alos ja itolong jo so nonta ira kait tayon emati shi Jodia. Onoshiyo sota inkowan ko so nonta ira emati shi Galasia ja pesing sha. 2 Domingko komay ka-eda ni alos ni sanseskey son si-kayo, jet akew ni Domingko ngoy pengi-kan jo nontan na alos. Eg nagshengan i i-akan jo; sota wara, si-kato. Sajay i pesing jo say angken eg kayo mengedos no onmotokak da. 3 Jet no onmotokak da, sota toon joka piyala, si-karay pengi-idaw jo niyay ya alos jo shi Jerusalem, jet taksholan ko ni solat. 4 Nem no ngantoy pannemnem ko, baka ondawak met laeng shi Jerusalem, jet meki-odop ira son si-kak.
5 Ninemnem ko ey nak manbisita son si-kayo, nem onshalanak nin shi Masidonia. Jet no meksheng, mandiritso-ak da shita kad-an jo. 6 Piyan ko ja meki-iyan son si-kayo, sigosho ingkatod bekas ni oran, say asen joy ida-jat ko ja ondaw shi eshom ma dogad. 7 Sajay i pesing ko, ta ekak koston ondabas shita kad-an jo ja asen takejo bengat ni sanka-atikan. Say piyan ko, meki-iyanak son si-kayo ni mebedjag koma, no ipalobos nen Apo Jesus ja metongpalak da. 8 Nem man-iyanak shiya Ipiso nin ingkatod onsabi sota piyasta ni Pintikostis. 9 Say kabol la pan-iyanan ko nin shiyay, asdeg toy mapiyan ja mengitneng niya naka pan-itoro, jet mesepol la ishingan ko, ta eshakel ngoy makapiyan na meneshal niya obdak.
10 No onmotok da si Timoteo shita kad-an jo, singpet jon sintilen, ta say obda to, inges to met laeng iya obdak ja emansilbi so nen Apo Jesus. 11 Aliwen jo koma damsisen, no diket tolongiyo et ja ondaw shi dawan to, say mariwes. Ta piyan kon on-olin shagos ali son si-kak, jet waray kait kon emansessesked son si-kato shiyay.
12 No si Apolos ja agi tayod pamati, inkowan kon pasiya son si-kato ey may-odop so nonta mengidaw niyay ya solat ko son si-kayo. Nem say kowan to, kenshat ta aliwen niman i timpon idaw tod tan. Asan nem waray waya to kono.
13 Say kowan ko son si-kayo shiya ma-onod ja parti niya solat ko, pantanshaan kayo: baka adilawen shakejo nonta eg emati son Cristo; nemnem joy pamatiyo; karekayo ontakot; pakedsang joy nemnem jo. 14 Emin komen dag-en jo koma, metaksholan ni semek.
15 Amtayo met ey si Istipanas ja sanpamilja, si-karay pilmiron emati shita Akaya. Jet niman ireka mansilbi ja ontolong so nonta ira too nen Apo Jesus. Jet kekshawen ko son si-kayon a-akik shi pamati, 16 ey si-kara et ngo i songoren jon pati-en, tan angken pay sota inges nen Ispipanas ja matodong tan masdo. 17,18 Naka man-imdeng ni indaw ali nen Istipanas, si Fortunato, tan si Akaikos, ja kaidiyan jo. Simpi-an takejon emin, nem na-o-onito may naka pannemnemnem son si-kayo, ni kawashara. Wara komay joka pengipateg so ira niyay ja timolong son si-kak, tan sota eshom ma inges sha ja kait jo.
19 Sota ira ematid ka-ili-ili shi Asiya, piyan shen pekikowan ko shiya solat ko sota semek sha son si-kayo. Jet angken si Akila nen Prisilla, tan sota ira eshom ma emati ja emesa-nop shi baley sha, kowan sha ngo ey ebadeg i semek sha son si-kayon a-akira shi pamati son Apo Jesus. 20 Jet angken sota ira emin na ematid jay, inkowan sha ngo ey pekikowan kod ja solat koy semek sha son si-kayo.
Jet say kowan ko, ipa-sas joy semek jo ni sakey tan sakey son si-kayo met laeng.
21 Si-kak si Pablo ja mismon makatakday ni engisodat niyay ya ka-onoran niyay ya solat. 22 No sipa iray toon enshiy semek sha so nen Apo Jesus, si Apo Shiyos komay onshosa son si-kara.
Apo Jesus, angka et nem magenon ondaw ka di!
23 Jet say shawat ko son Apo Shiyos, sota kaasi nen Apo Jesus, ja wara son si-kayo, sapay koma ta si-katoy ma-shoman.
24 Jet angken sota semek ko, si-katoy mewesha son si-kayon emin na emati son Cristo Jesus. Siya, satan da.