15
Sigoradon manbiyag kiton emati shi patey jet mesa-datan i bakdang tayo ja ingesen toy bakdang nen Cristo
1 Niman, si-kayon a-akik shi pamati, karejo dibdibkan sota intorok son si-kayo ja mapteng nga shamag maypangkep son Jesucristo ja inewat jo. Sotan i naynadnaran ni pamatiyo, 2 jet sotan i kaysedakan jo, no eg jo ibi-jag. Nem amtak ey eg jo ibi-jag no agpayson pinatiyo.
3 Sota kapatkan ja intorok son si-kayo, si-kato ngo sota inewat ko ja kowan to ey si Cristo, etey ja engikesho ni basol tayo, jet sajay ya edaga, nay-agpayso sota esel nen Apo Shiyos ja naysolat nonta bayag da. 4 Intorok pay ey naybeka shi diyang, jet nonta maykatdon akew, nanbiyag met laeng. Sajay, naytotop met laeng nodta esel nen Apo Shiyos nonta bayag da. 5 Jet inkowan ko pay son si-kayo ey nanpa-sas si Cristo so nen Pedro asan ma manpa-sas so nonta ira emin na apostol to. 6 Jet nanpa-sas ni pinsak so nonta ira dimen dasos ja kait tayod pamati. Jet karakdan so ira niyay ja engasas ket, wara pay laeng ired biyag niman. 7 Nanpa-sas pay so nen Santiago, asan mowan manpa-sas so ni emin na apostol.
8 Shi ka-onoran, nanpa-sas ngo son si-kak. Si-kak, singa nay-anakak shi aliwen timpo to, ta nanbalinak ni apostol nen Jesus jey ekak nin nay-olo-olop son si-kato. 9 Si-kak i singa kababa-an so nonta ira emin na apostol. Ekak koma maykeshin apostol to, ta nontan da, pinedigat ko sota ira emati son Jesus, ja too ma nen Apo Shiyos. 10 Nem ebadeg i kaasi nen Apo Shiyos son si-kak, isonga sajay i nanbalinan ko, jet sotan na kaasi to son si-kak, waray nanbanagan to. No i-inges koy obdak so ira ni kait kon apostol, asdeg to met i dingkak. Nem aliwen si-kak ka mismo i maka-obda nontan, no diket si Apo Shiyos ja engaasi son si-kak ni olay. 11 Si-kak, ono sota eshom ma kait kon apostol, nan-i-inges i toro mi maypangkep ni pamati, jet si-katoy emati-an jo. Angken sipa son si-kamin apostol i mengitosho, saksakey met laeng i torong ni mika ikowan.
12 Apay nga kowan ni eshom son si-kayo ey sota nanketey ket, eg ma manbiyag mowan? Say kowan met ni mapteng nga shamag maypangkep son Cristo, inpanbiyag nen Apo Shiyos shi patey. 13 Jet no agpayso sota kowan ni eshom son si-kayo, ja enshiy etey ja manbiyag, wara met. Si Cristo, nanbiyag shi patey. 14 Agpayso sota mika pan-itoro pangkep son si-kato. Nem no bilang ey eg nan-ongal ket istay enshiy silbi ni inpamatiyo son si-kato. 15 Jet mebedin na ikowan jo ey ma-owap kami ja engikokowan maypangkep son Apo Shiyos, ta inba-ngat miy kowan ey si Apo Shiyos, inpan-ongal tos Jesus. No agpayso sota kowan jo ey eg manbiyag mowan i nanketey, angken si Apo Shiyos, eg to koma inpanbiyag si Cristo shi patey. 16 Ta no say nanketey ket eg manbiyag mowan, angken si Cristo, eg nanbiyag shi patey. 17 Jet no kasta, sota pamatiyo son si-kato, enshi ngoy silbi to jet shosa-en shakejo met laeng nen Apo Shiyos maypangkep ni basol jo. 18 Angken pay sota ira emati ja nanketey da, may-inges met laeng ira so nonta eshom ja shosa-en nen Apo Shiyos. 19 No si Cristo ket eg nan-ongal nontan, saja namnama tayon dag-en to di son si-katejo, enshiy to panbenagan. No eg nan-ongal, para niman bengat gayam ja wara kitod biyag i kawasha tayo son si-kato. Jet si-katejoy ka-kaasi so ni emin na too shiya dobong.
20 Nem say agpayso, si Cristo, nan-ongal. Jet sotan i kesigorado-an to ey manbiyag ira di ngo sota nanketey. 21 Say kabol la ewara-an ni patey, ja keteyi ni emin na too, edapo so nonta sakey ya too, ja si Adan, jet say kayda-kaman ngo ni too ja manbiyag shi patey, sota sakey ya too, ja si Cristo. 22 Say nanshogi-an ni ketey ni too, si Adan jet si-katoy singa tinewid ni emin na too son si-kato. Nem say nanshogi-an ngo ni panbiyag mowan shi patey, si Cristo jet emin na toon wara son si-kato, nayda-kam ngo ira son si-kato. 23 Nem si Cristo i epangdon nanbiyag shi patey. Sota ira emati son si-kato, si-karay man-onod ja manbiyag ngo di nem on-oli si Cristo ali.
24 Jet shi ka-onoran, sheshalen nen Cristo sota ira waray toray to, ono saad to, tan sota ira waray panakabalin to ja makakontra son si-kato. Jet no si Cristo may mengitoshay ni emin, pa-elbat to so nen Apo Shiyos ja Ameto. 25 Ta si Cristo, mesepol la si-katoy mantoshay nin ingkatod emin na makakontra son si-kato ket, ma-ebak. No ma-ebak ma ira panpetokan ma ni sedi to ira. 26 Say ka-onoran ja ma-ebak, sota patey, tep enshi may metey, jet sota ira nanketey, manbiyag ngo ira. 27 Amta tayo ey itorayan nen Criston emin, pati sota patey, ta say kowan nonta padton naysolat nonta bayag da, “Si Apo Shiyos i engigsheng ey sotan aliy mengitoshay ni emin.” Jet sajay ya kowan to, edawag ey aliwen pati si Apo Shiyos ket, itorayan nen Cristo. 28 No meksheng ma ja pansaad nen Apo Shiyos si Cristo ja mengitoshay ni emin, pa-elbat nen Cristo ja si Apo Shiyos i mengitoshay ni emin, pati si-kato shorog, say si Apo Shiyos i mayshedjaw so ni emin, enshiy eshom.
29 No aliwen agpayso sota inkowan ko la, jey manbiyag i nanketey, ngaranto ngarod i panbonjagan ni eshom maypangkep so ira nonta etey? Ngaranto ngarod i silbi to? 30,31 Jet si-kak ngay? Dilikaroy biyag ko ni inakew tan angken inoshas. Jet no say etey ket, eg manbiyag mowan, ngantoy en-enosan ko so pay laeng ni digat? A-akik shi pamati, amta nen Apo Shiyos ey say biyag ko, dilikaro, jet amta to pay sota naka pengiredjaw son si-kayon nanbanagan ni obdak pangkep son Cristo Jesus ja Apo tayo. 32 Ngarantoy kon-oren ko no sajay ya biyag ko niman bengat i pengintegan to, ja ekak mowan manbiyag shi patey? No sotan, singa inges ko sota nemnem ni karakdan! Shiya Ipiso, makedsel iray toon makakontra son si-kak; mabonget iren singa atap pa animal. Jet no bilang ey sota etey ket, eg manbiyag mowan, agpos ey i-onod koy kowan sha. Say pesing et ma, mandaladsak kito et, ta no ekay, metey kito met laeng jet sotan may pengintegan to!
33,34 Nem ayshi! Kay-oli kayo mowan na mannemnem ni siged, karekayo pai-owap nonta kowan sha ey eg manbiyag mowan sota nanketey. Karejo ma pati-en sotan na toro ta basol i panpa-no-an to. Sajay iren too, eg sha bigbigen si Apo Shiyos, nem joka ira sintila! Sajay i inkowan ko say amta-an jo ey kabebaing iyay ya inpasing jo. Ibiyang jo ira jay ya o-owap i toro sha, ta sota ira toon ngaaw i ogadiren pekikadwa-an, edinan sha sota mapteng i ogadira, jet manbedin ngo iren ngaaw.
35 Nem baka kowan ni eshom son si-kayo ni salodsod sha ey, “Toway pesing ni nanketey ja manbiyag mowan? Ngarantoy itsora ali ni bakdang sha?” 36 Kolang i nemnem nonta toon nansalodsod niyay! Ta no manbiyag mowan i toon etey, aliwen sota sigod ja itsora ni bakdang toy onbo-day mowan ali, no diket mebediwan. Arig to sota botil. No i-esek moy botil, aliwen sota botil mowan aliy onbo-day, no diket mola ma. 37 Jet no bilang ey manmoda kayo ni trigo ono kompormin mola, say imola jo, sota botil bengat, aliwen sota bakdang ni mola. 38 Nem si Apo Shiyos i mengi-kan ni mapteng nga bakdang nonta botil ja maymoda tep emin na kalasin botil, nan-i-inapil i itsora ni bakdang shen onba-deg ali. 39 Sajay i kay-eshigan ni bakdang, nem emin na bakdang, aliwen na nan-i-inges: waray bakdang ni too, waray bakdang ni animal, waray bakdang ni titit, waray bakdang ni paideng. 40 Jet sota bakdang ira nonta wared naykayang, apil ngo: aliwen inges toy bakdang tayo. Say itsora ni kamapteng ni bakdang sha, aliwen inges toy itsora ni bakdang tayo. 41 Say kay-eshigan to pay, sajay: Sota sekit, apil ngoy boya to, jet sota bolan, apil ngoy boya to. Jet angken sota ira talaw, aliwen na nan-i-inges i boya sha.
42 Sajay ira den inkowan ko, si-katoy kay-eshigan nonta nanketey ja manbiyag mowan, ja apil i itsora ni bakdang sha di. Say bakdang nga maybebka, mebojok, nem no manbiyag shi patey, eg ma metey. 43 Saja bakdang tayon too, no metey, ngaaw wa mayshedmang, enshiy silbi to; nem no manbiyag ali shi patey, mesa-datan ni mapteng tan makedsang. 44 Saja bakdang tayo niman, anam to ngon man-iyan shi dobong, nem sota maysa-dat alin bakdang tayo, anam to ngon man-iyan shi dangit. Waray bakdang tayod ja dobong, wara met laeng i bakdang tayod dangit. 45 Naytotop shiyay met laeng sota naysolat nonta bayag da ja kowan to ey, “Si Adan ja pilmiron too, nay-aknan ni biyag.” Si Cristo, singa paris nen Adan, jet si-kato ngoy emengi-kan ni biyag, nem sajay ya biyag, anam ton man-iyan shi dangit. 46 Nem say epangdon in-akan nen Apo Shiyos son si-katejo, saja bakdang tayo niman, asan maysa-dat sota anam ton manbiyag shi dangit. 47 Sota pilmiron tood ja dobong ja si Adan, depok i edapo-an to. Nem sota paris nen Adan ja si Cristo, edapod dangit. 48 Jet emin na too shiya dobong, sota bakdang sha, singa sota bakdang met laeng nen Adan ja edapod depok nem si-katejon too nen Cristo, ingesen tayo aliy bakdang nen Cristo shi dangit. 49 Si-katejo, inges tayo sota toon edapod ja depok, nem mebediwan ali iya bakdang tayo ja ingesen to si Cristo ja edapod dangit.
50 Iyay i piyan kon ewatan jo koma, si-kayon a-akik shi pamati. Saja bakdang tayo niman, mesepol la mesa-datan, ta eg mebedin na ondaw sotan na bakdang shi pantoshayan nen Apo Shiyos. Saja emetey ya bakdang tayo niman, aliwen si-katoy man-iyan shiman, ta say itsora ni bakdang tayod man, eg metmetey ingkatod ingka.
51,52 Jet niman ipa-amtak iya plano nen Apo Shiyos ja medeka ali son si-katejo. Eg kitejo metey ya emin, nem emin kito, mesa-datan iya bakdang tayo ni sankakimshatan. Magenon pasiya ja singa kimkim ni mata. Onjanget nin sota trompita ja amta-an so ey tapos ma ni dobong. No onjanget sotan na trompita, sota ira nanketey, manbiyag ira jet eg ira ma metmetey. Jet angken si-katejon wared biyag, mesa-datan ngoy bakdang tayo ja eg ma metmetey. 53 Ta mesepol la saja bakdang nga emetey, ja emebojok, mesa-datan ni eg metey. 54 No meksheng ma iyay, sajay may itongpal son Apo Shiyos nonta inkowan to met laeng nonta bayag da, ja kowan to ey, “Jet sota patey, na-abak mala!” 55 Isonga say kowan ko, inges to sota kowan ni para padto ey eg mengebak malay patey, enshi malay panakabalin ton mengipked ni toon man-ongal. Isonga enshi malay sha tekotan! 56 Tep say ketekoti so ni too ni patey, si-kato may keshosa ni nanbasol, jet say singa emengi-kan ni kedsang ni basol, sota bilin nonta bayag tep eg baalan ni toon onoren ja emin. 57 Isonga naka man-iyaman son Apo Shiyos, ta tokitoka pengebak ni olay, pangkep ni kaasi nen Jesucristo ja Apo tayo!
58 Isonga niman ma, si-kayon a-akik shi pamati ja ensemek ko, iki-det joy pamatiyo, say enshiy jo ka-ewisan na kompormin adilaw. Pan-alisto kayo et ja man-obda para son Apo Jesus, ta amtayo met ey asdeg toy kon-oren jo din sobadit ni obdayo maypangkep son si-kato.