11
1 Sigosho kowan jo ey si Apo Shiyos, singa inbiyang to iray Hodiyos ja too to. Nem enshi, arawi sotan! Kinapodno to, angken si-kak, Hodiyosak, ta poli towak nen Benjamin ja mismon anak nen Israel da; isonga poli towak ngo met laeng nen Abraham.2 Si Apo Shiyos, eg to inbiyang sota too ton sigod ja pinidi to, nem ootik nin i imonong ja emati, jet arig to ngo sota timpo nen Elias. Ta si Elias nonta bayag da, inkowan to son Apo Shiyos sota aramid ira nonta tood Israel,3 ja kowan to ey, “Apo, binonora ira sota para padton inbetkag mo, jet binagbag sha pay sota ira panshedjawan ni totoo son si-kam. Si-kak bengat i ebay-an ja emansilbi son si-kam, jet piyan sha pay ja bono-en sha-ak.”4 Nem say songbat nen Apo Shiyos son si-kato, kowan to ey, “Waray piton dibon too ja ekak intolok ja manshedjaw so nen Baal ja sinan shiyos.” Sajay i kowan nen Apo Shiyos.5 Jet angken niman, inges to met laeng nontan. Wara iray Hodiyos sa pinidi nen Apo Shiyos ja kinaasi-an to, nem aliwen eshakel.6 Nem sota toon pinidi nen Apo Shiyos, dibshiy inkaasi to, aliwen sobadit nonta mapteng nga dingkara. Ta no say pemidi nen Apo Shiyos so ni too to ket, sota sobadit nonta mapteng ja dingkara, aliwa malen kaasi sotan.
7 Sota naksheng den inkowan ko la, sajay i esa-nopan to. Sota ira Hodiyos, eg sha kinon-od sota kinosto-an so nen Apo Shiyos son si-kara, angken sotan i istay shaka kamkamkami. Waray eshom son si-kara ja pinidi nen Apo Shiyos, jet si-karay kinosto-an to; nem sota ira eshom, timangken i nemnem sha, eg sha kosto sota kowan nen Apo Shiyos. 8 Sajay i kaytoshongan nonta kowan ni naysolat nonta bayag da, ja kowan to ey, “Si Apo Shiyos met laeng i inpatangken so ni nemnem sha, jet angken niman, singa eg ira man-esas, tan singa eg ira makateneng.” 9 Jet angken si Ari David nonta bayag da, kowan to ey,
“Sota eshakel la inkaasi nen Apo Shiyos son si-kara, sotan et ngo mowan i kabol la keshosa-an sha tep binedaw sha. Siya, singa mekna ira, singa mesol-an ira, tep anam shen meshosa! 10 Angken mekimit ja eg man-esas sota matesha! Jet mayda-karan ira ni digat ni olay ingkatod ingka!”
11 Jet idi singa nayko-bilan sota karakdan na Hodiyos ni eg sha pemati son Cristo, kowan jo emo nem sotan ni olay? Eg ira makabangon? Kinapodno to, mebedin na on-oli ira mowan son Apo Shiyos. Nem kabol nontan na eg sha pemati son Cristo, mebedin men maysedakan ngo iray aliwen Hodiyos. Jet balang nem ma-epal ira sota Hodiyos ja mannemnem ngo ira. 12 Ta say kowan ko, singa sota basol ni Hodiyos ni eg sha pemati-an son Cristo i kabol ja panmaptengan ni emin na tood ja dobong, tan sota kakodang ni pamatira i kabol la kinaasi-an nen Apo Shiyos ira sota aliwen Hodiyos. Nem mas ebadbadeg i kaasi ali nen Apo Shiyos, no onsabi sota timpon kay-odi ni Hodiyos shi koston pamati!
13 Niman ma, iyay i piyan kon ikowan son si-kayon aliwen Hodiyos, agdalo ta si-kak i apostol ja inbetkag nen Apo Shiyos para son si-kayo. Jet saja naka penosho son si-kayo, naka ipakat i kabaalan kon pasiya, say eshakel aliy memati. 14 Nem say pangkep ko pay, piyan kon asen ira nonta kait kon Hodiyos, say maynemneman ira, jet balang nem maysedakan ngo ira sota eshom. 15 No bilang ey maysedakan i Hodiyos, asdeg toy kaasi nen Apo Shiyos son si-katejon emin! Ta say nanpa-no-an ni engibiyangan nin nen Apo Shiyos so ni Hodiyos, nan-esop i eshakel la totood dobong tan si Apo Shiyos. Jet ngaranto emoy panpa-no-an ni pan-odira son Apo Shiyos? Enshiy eshom nem eg sota panbiyag mowan ni nanketey! 16 Sigod ja too ira nen Apo Shiyos tep pinidi tos Abraham nonta bayag da jet ontaron ja too to met laeng sota ira poli to. Arig to sota kepesing ni Hodiyos nonta tinapay. Shaka idaton son Apo Shiyos sota pilmiron edoto jet da-kaman ton singa naydaton ja emin sota eshom alin tinapay ja medoto pay. Tan say arig to pay, sota kadasan. No pinidi nonta makakokowa sota damot, mayda-kam ngon singa epili sota panga nonta kadasan na makadamot nonta epili.
17 Saja kadasan, i-arig ko maypangkep ni kasesaad jon aliwen Hodiyos. Sota naymola ja kadasan, si-katoy may-eshig so ni Hodiyos, jet si-kayon aliwen Hodiyos, may-eshig kayo ey kadasan bengat, ja aliwen koston mola. Jet say edaga niman na timpo, sota eshom ma panga nonta sigod ja naymola, epotol. Jet naysilpo kayo nodta sigod ja mola, jet nayda-kam kayo ma nodta biyag nonta mola. 18 Nem si-kayo, karekayo on-itek ja damsisen jo sota sigod ja panga, ta aliwen si-kayoy engi-det nonta kadasan, no diket sota damot, si-katoy emengi-kan ni kedsang jo. 19 Karejo ikowan ey, “Siya, sota sigod ja panga, epotol say si-kak i maysa-dat ja maysilpo.” 20 Agpayso ja sajay i epasemak son si-kara, nem say kabol, eg ira memati, jet say kabol ngon naysa-datan jo son si-kara ja naysilpo nodta kadasan, emati kayo son Cristo. Isonga aliwen kayo on-itek ni maypangkep niyay ya edaga son si-kayo, no diket man-anad kayo koma. 21 Ta say nemnemen jo, sota koston panga, pinotol nen Apo Shiyos nodta kad-an sha, ey si-karay sigod. Nem si-kayo, aliwen koston panga kayo, isonga mas nam-ay ya ma-kal kayo, no onbaki kayo. 22 Mesepol la amta-an jo ey si Apo Shiyos, manangaasi, nem eg to ngo baybay-an ja shosa-en sota mandeka ni ngaaw. Epaladoy inpasing to so nonta ira Hodiyos ni inpankolang sha, nem si-kayo, itoloy ton kaasi-an tokejo pay laeng no itoloy jon sota kaasi toy nemnemnemen jo. Nem no eg jo itoloy, mebedin ngon isi-jan tokejo ja potolen nodta naysilpo-an jo. 23 Jet sota ira Hodiyos ja naysi-jan, no may-odi iren memati, may-odin maysilpo met laeng ira mowan nodta sigod, ta si Apo Shiyos, waray panakabalin ton mengi-odi met laeng son si-kara. 24 Jet mebedin na may-odi ira, ta no sota may-eshig ey panga ni kadasan ja aliwen mola ket naysilpo nodta bakdang ni mola ja kadasan, mas namnam-ay sota sigod ja panga ja may-odi mowan nodta edapo-an sha. Mas nam-ay ta nodtan i sigod ja edapo-an sha, nem si-kayo, singa eg kayo may-enam.
25 Si-kayon a-akik shi pamati ja aliwen Hodiyos, piyan kon amta-an jo iya badon toro ja edapo so nen Apo Shiyos. Nemnem jo nin na pasiya say eg jo iba-ba-ngat i kokowan ey waray nandasinan jo shi Hodiyos. Sota eg pemati ni eshom ma Hodiyos, aliwen sotan ni olay, no diket ingkato bengat nodta kakosto ni bilang ira nonta aliwen Hodiyos ja memati ali. 26 Jet no metongpal ma ira jay, sota ira karakdan na Hodiyos, maysedakan ma ira. Sajay i kaytoshongan nonta esel nen Apo Shiyos nonta bayag da ja kowan to ey,
“Sota Mengisedakan, medepo met laeng alid ili ni Hodiyos, jet say pesing ton mengisedakan ira nonta poli nen Jacob, a-kalen toy ngaaw wa aramid sha jet sota mapteng may maysa-dat. 27 Jet say ikarik son si-karen took ja tood Israel, omasen koy basol sha.” Kowan nen Apo Shiyos.
28 Saja ira Hodiyos, eg ira memati nonta mapteng nga shamag maypangkep son Jesus, isonga kontra ira nen Apo Shiyos niman. Jet kabol niyay, naysa-dat kayon aliwen Hodiyos son Apo Shiyos. Nem ensemek to pay laeng ira sota Hodiyos, tep totoo toy makapoli son si-kara, jet eg bediwan nen Apo Shiyos i inpili to son si-kara. 29 Tep no ngarantoy inkari nen Apo Shiyos, si-katoy medeka, eg mesa-datan; jet sota Hodiyos ngo eshan i pinidi to ja engi-watan to ni kari to. 30 Nontan da, eg kayo emati son Apo Shiyos jet sota ngo ira Hodiyos, too to ira. Nem niman, kinaasi-an shakejo et ngo mowan nen Apo Shiyos, tep sota ira Hodiyos, ja sigod ja too to, eg sha tongpalen niman i piyan nen Apo Shiyos. 31 Sota ira Hodiyos, eg sha pinati si Apo Shiyos, isonga kinaasi-an shakejo nen Apo Shiyos ni inpamatiyo. Jet inges to ngon kaasi-an to sota ira Hodiyos no man-odi ira mowan ja mematin kosto son Cristo. 32 Isonga emin na too, angken ngantoy katoo to, intolok nen Apo Shiyos ja angken eg ira nin memati, say man-i-inges ja kaasiy pesing to son si-karen emin.
33 Angken nganto, amta nen Apo Shiyos; isonga sota wared nemnem to, si-katoy kosto. Jet angken sipa, enshiy maka-awat nonta emin na pangkep to, ono sota toka dagdag-a. 34 Si-katoy kaytoshongan nonta naysolat nonta bayag da ja kowan to ey,
“Enshiy maka-amta ni wared nemnem nen Apo Shiyos, jet enshi pay i mebedin na mengitosho son si-kato ni pesing to. 35 Jet angken sipa, enshiy to inpa-otang son Apo Shiyos, ja to ikowan ey bayshan nen Apo Shiyos son si-kato.”
36 Ta emin na banag, si Apo Shiyos i pimalsowa so, jet si-kato pay i emengajowan so, tan si-kato met laeng i panshedjawan sha. Siya, si Apo Shiyos i mayshedjaw ni olay ingkatod ingka. Siya, satan da.