5
Sota maypangkep so nen Ananias tan si Sapira, ja san-asewa
1 Wara ngoy dakin manngeshan ni Ananias, jet asewa to si Sapira. Nandako ira ni eshom ma bo-day sha, 2 jet nantolagan sha ey sota eshom ma pilak ja tongkal nontan na bo-day, i-akan sha ni apostol, nem sota eshom, isaot sha et italo sha. 3 Nem si Pedro, kowan to son Ananias ey, “Ananias, apay nga intolok mo ja si Satanas i engitoshay son si-kam? Nakol ni nan-o-owap ka so ni Ispirito Santo nen Apo Shiyos. Isonga intalom i eshom ma dako nonta bo-day. 4 Sotan na bo-day, kokowam met, jet olay toka ngo no idakom ono enshi. Isonga sota dako to ngo, enshiy ememidit ey i-akan mo. Nemnem mo ngon mengi-kan ali. Nem ngantoy kabol la engisaotan mo so ni koskoston tongkal to? Kowan mo emo ey too i i-owapan mo, nem si Apo Shiyos i inba-ngasan jo!”
5 Idi intenengan nen Ananias iyay den inkowan nen Pedro son si-kato, ebiglen eto-dang et etey. Jet emin sota enamag niyay ya epasemak, timakot iren pasiya. 6 Sota ira bedoleki, dimaw ira di ja sha dinibotan i bakdang nen Ananias, jet sha inbeka.
7 Idi waray tedon oras ja dimabas, mimotok ngo ali si Sapira ja asewa nen Ananias, nem eg to amta ey etey si asewa to. 8 Jet si Pedro, inbag-an to si Sapira no sota pilak ja in-akan sha ni apostol ket, sotan i koskoston tongkal nonta bo-day sha. Jet si Sapira, kowan to ey sotan bengat.
9 Jet kowan ma nen Pedro son si-kato ey, “Ngantoy ninemneman jo so niyay? Apay nga nantolagan jon peshasen i Ispirito Santo nen Apo Shiyos no amta to, ono enshi, sota basol jon i-emot jo? Asas mo ita bedoleki ja engibka son asewam; itan ira niman shita sakepan jet angken si-kam, shaka ngo di en ibeka.”
10 Jet si Sapira, eto-dang ngon bigla et etey shi sango-an nen Pedro. Jet idi simekep ira di sota bedoleki, inon-an shen etey si Sapira et binangtal sha jet sha inbeka nodta askang ni naybeka-an nen asewa to. 11 Emin ira sota emati son Jesus, tan sota eshom ja engitneng niyay ya banag, eta-kot iren pasiya.
Sota milagro tan kaskasshaaw wa dingka ira nonta apostol
12 Sota ira apostol, eshakel i kaskasshaaw wa dingkara ja inon-an ira nonta totoo. Jet emin ira sota emati, ireka mesa-nop ni olay ma nodta nay-askang shi Timplo ja kowan sha ey Sishoman nen Solomon. 13 Jet sota eshom ma eg emati, entakot shen may-a-shom so nonta ira emati, nem wara mangoy shaka pengiredjaw son si-kara. 14 Nem asdeg to ngoy daleki tan bibii ja nay-eshom so nonta ira sigod ja emati, jet mas shimakel ira. 15 Jet sota ira emanpansekit, in-ilaw sha ali ira nodta kalsara ja imonong ira nodta shinokolan sha, jet kowan sha ey no ondabas alis Pedro, balang nem dabsan ni adirong to ira, say ma-kal i sakit sha. 16 Jet angken sota ira dogad ja nay-esop shi Jerusalem, ireka emengidaw ni emanpansekit son si-kara, jet angken sota ira toon kawad-an ni dimonyo, indaw sha ira di, jet mimapteng ira.
Sota ira apostol, dina-kaman shay digat
17 Nem sota kangeto-an na pari ni Hodiyos, tan sota ira kait ton Hodiyos ja kowan sha ey Sadosiyo, ireka emanbonget, tep ma-epal ira so nonta apostol. 18 Jet say inpasing sha ma son si-kara, inshel sha jet inbalod sha ira. 19 Nem nonta edabi, sota anghil nen Apo Shiyos, to dino-katan ira sota sakepan ni badoran, jet inpangdo to iren bimo-day. Jet say kowan nonta anghil son si-kara, kowan to ey, 20 “Daw kayo shima Timplo, jet jo itosho so ira nima totoo i maypangkep son Jesucristo, ey si-katoy kedepo-i nonta biyag ja inkari nen Apo Shiyos.” 21 Jet sota ira apostol, pinatira sota inkowan nonta anghil, jet dimaw ira nonta agsapen pasiya shi Timplo ja sha intoro i maypangkep son Jesus.
Jet nontan na agsapa met laeng, sota kangeto-an na pari, tan sota ira kait to, sina-nop sha iren emin sota pangolo ni Hodiyos, jet engibetkag ira ni en mengodop nonta apostol shi badoran. 22 Nem idi onmotok sota inbetkag sha ja en mengodop so nonta ira apostol nodta badoran, enshi la ira gayam. Jet sota istay en mengodop, nay-oli ira, 23 jet sha inkowan ey, “Enshi met da ira sota kowan jo ey mi odopen shi badoran. Sota sakepan ni badoran, naytolbek met, tan angken sota ira kowadja, wara met ira nodta pasbol ja emanbantay; nem idi do-katan mi sota badoran, enshiy mi simbi! Angken sakey son si-kara ket enshi nodta naydaem!”
24 Jet idi intenengan nonta apo ni kowadja ni Timplo tan sota apo ni papashi sota kowan sha, nasshaaw iren pasiya, tan ireka emanshanag no ngarantoy panpa-pa-no-an niyay ya epasemak.
25 Jet nontan met laeng nga agsapa, waray sakey ya toon simekep ali nodta esa-nopan ira nonta toray ni Hodiyos jet kowan to ey, “Sota toon inbalod jo, wara ired ma Timplo ja emantosho so ni totoo!”
26 Jet sota apo ni solsharo, en engolop so nonta ira kapitan na too to met laeng, jet dimaw ira so nonta apostol, ja sha ira inadok ja may-odop son si-kara. Eg sha ira pinidit, ta entakot ira so nonta totoo, ta baka et ey onbonget sota totoo, nakol ni kespigan sha ira ni bato.
27 Inodop sha ira sota apostol jet insekep sha ira nodta esa-nopan ni toray, jet sota kangeto-an na pari, kowan to son si-kara ey, 28 “Apay nga eg jokami pati-en? Inkowan mi met son si-kayo ey kenshat ta ibi-jag joy joka pengitosho ni maypangkep so nonta joka itorotoro, nem niman, joka et ma-ma-a, nakol ni inamta-an ni emin na totoo shi Jerusalem! Say piyan jo, si-kamiy pebesolan sha ni inkabono nonta toon joka ingadngadni?”
29 Nem si Pedro tan sota eshom ma apostol, simongbat ira ja kowan sha ey, “Mesepol la si Apo Shiyos i pati-en mi; aliwen sota kowan ni too.” 30 Tan kowan pay nen Pedro ey, “Si Apo Shiyos ja pinati ira nonta ametayo da nonta bayag, inpan-ongal to si Jesus, ja binonoyon indansa shi koros. 31 Si Apo Shiyos, inpanbiyag tos Jesus, jet niman, inpansaad to; isonga wara shi apit ni kanawan nen Apo Shiyos, ja si-katoy Pangolo tan Mengisedakan. Jet in-aknan toy tood Israel ni waya sha ja manbebawi, say omasen nen Apo Shiyos i basol sha. 32 Jet niman, si-kami i mismon engasas ni maypangkep niyay ya banag; isonga peneknekan mi. Jet wara pay i onpaneknek so ja Ispirito Santo nen Apo Shiyos, ja in-akan to ja man-iyan so nonta ira toon emati son si-kato.” Sajay i insongbat nen Pedro so nonta kangeto-an na pari.
33 Jet idi intenengan ira nonta toray ni Hodiyos iyay ya inkowan nen Pedro, epaladoy bonget sha so nonta ira apostol, ja piyan sha iren bono-en.
34 Nem waray sakey son si-kara ja Parisiyo ja manngeshan ni Gamaliel ja maistoro ni dinteg ni Hodiyos, ja shaka ibaingi. Dimayat shi sango-an sha jet kowan to ey, “Pabo-day jo nin ira.” Jet idi inpabo-day sha nin ira sota apostol, 35 kowan to so nonta kait ton toray ey, “Si-kayon kait kon Hodiyos, karejo iba-ngat ja dag-en i piyan jon dag-en son si-kara. 36 Ta nonta bayag da, waray edaga ja inges niyay. Si Tiyodas ja kowan to ey matekal ja mengi-ibong ni gobirno, waray epat ta dasos ja toon imonod son si-kato. Nem sajay ya too, binonora, jet idi etey sota pangolo sha, nansisi-jan ira sota totoo to, jet eg timoloy sota pangkep sha. 37 Idi enshiy bayag to, wara mowan i i-Galilia nonta timpo ni sinsos ja si Judas i ngaran to. Eshakel mowan i imonod son si-kato, nem binonora met laeng, jet sota imonod son si-kato, nansisi-jan met laeng ira. 38 Isonga no sota maypangkep ni sajay ya banag niman, bay-iyo ira ngo, angken itoloy sha sota shaka dagdag-a. Ta no sajay ya pangkep sha, ono shaka pandag-a ket tooy edapo-an to, eg onbayag, no diket ma-omas sa shagos. 39 Nem no si Apo Shiyos i edapo-an to, eg mebedin na ebaken jo ira, no diket si-kayo et ngo mowan i ememekal son Apo Shiyos.”
Jet sota inkowan nen Gamaliel, pinati ira nonta toray. 40 Inpaskep sha mowan sota apostol, jet inpasepdat sha nin ira asan shaka ikowan son si-kara ey kenshat ta eg sha ma itorotoro i maypangkep son Jesus shi totoo, asan shaka ma ira ibodos.
41 Jet sota ira apostol, indekjas sha ira sota esa-nop pa toray ja ireka eman-imdeng nga pasiya tep si Jesus i kabol ni ebebaingan sha. Ninemnem sha ey sajay i ka-asan to ey kinosto-an ira nen Apo Shiyos. 42 Jet nontan ma, intoloy shen en nantoro ni inakew ni maypangkep son Jesus shima Timplo tan shima kebalebaley. Kowan sha ey si Jesus, si-katoy ketongpalan nonta kowan nen Apo Shiyos nonta bayag da ey ibetkag to di ja mengisedakan.