4
Binistigal nonta pangolo ni Hodiyos si Pedro nen Juan
1 Nonta maramen eman-a-sel si Pedro nen Juan so nonta totoo, dimaw ira di sota papashi ni Hodiyos, apo ni kowadja nodta Timplo, tan sota ira kowan sha ey Sadosiyo, 2 ja ireka onbanonget. Ta si Pedro nen Juan, intoro sha so nonta totoo ey si Jesus, nan-ongal jet si-katoy inbasalan sha so ey angken sota ira eshom ma nanketey, manbiyag ngo ira ali. 3 Jet inshel sha si Pedro nen Juan ja sha ira pebistigal. Nem nontan, ta mankedabi, enshiy pesing shen memistigal son si-kara; isonga inbalod sha nin ira.
4 Nem eshakel mala iray toon emati nonta inteneng sha sota inkowan nen Pedro nen Juan pangkep so nen Jesus, jet say kabebilang ira nonta ematin daleki, dimen dibo.
5 Nonta ewa-wa, sota ira toray ni Hodiyos, tan sota eshom ma pangolo sha, pati sota ira mamaistoro ni dinteg ni Hodiyos, wara iren esa-nop shi Jerusalem. 6 Jet angken sota kangeto-an na pari ja si Anas, tan shi ira Kaipas, si Juan, si Alejandro, tan sota emin na partido nen Anas, ekisa-nop ira. 7 Sha inda ali si Pedro nen Juan jet inpa-adagey sha ira nodta nankinaw-an sha, jet inbag-an sha ira no ngarantoy inpamaal shen inpakedsang nonta toon epilay. Kowan sha ey, “Sipen ngaran i inngadnan jo nontan?”
8 Jet si Pedro, ja inshalan ni Ispirito Santo, simongbat ja kowan to ey, “Si-kayon toray tan pangolo ni Israel, 9 jokamika panbistigala niman ni maypangkep ni mapteng nga dingka mi ni inpan-akad mi so niya toon epilay. Jet no piyan jon amta-an i inpasing ton mimapteng, 10 pa-amta mi son si-kayo, pati pay sota eshom ma totoon Hodiyos, ey si Jesucristo ja i-Nasarit ja binonoyon indansa shi koros, inpanbiyag mowan nen Apo Shiyos, jet si-katoy kabol la minaptengan niyay ya toon istay epilay ja wara niman shi sango-an jo. 11 Si Jesus i kaytoshongan nonta inkowan nonta naysolat ja kowan to ey, ‘Sota baton binedaw jon para amag ni baley, ja kowan jo ey enshiy silbi to, si-kato et ngo mowan sota epateg ga mesepol jon pasiya.’ 12 Enshiy eshom ma tood ja dobong nga inbetkag ali nen Apo Shiyos ja mengisedakan, nem eg si Jesus bengat.” Kowan nen Pedro.
13 Jet idi inon-an sha ey etoled si Pedro nen Juan ja man-a-sel, nasshaaw iren pasiya ta amtara ey sajay iren too, ootik i ashal sha. Nem ninemnem sha ey si-kara gayam sota eki-odo-odop so nen Jesus. 14 Jet sota ira toray tan sota ira pangolo ni Hodiyos, enshiy pesing shen mengipidit ni piyan sha, ta sota toon istay epilay, mismon wara nodtan ja kadwa nen Pedro nen Juan. 15 Jet say inpasing sha, inpabo-day sha nin si Pedro nen Juan, jet nantatabtabal ira sota toray, 16 ja kowan sha ey, “Ngantoy pesing tayo aya son si-kara, ket sota kaskasshaaw wa dingkara ket amta ni emin na tood Jerusalem, jet eg tayo mebedin na isaot.” 17 Idi anongosto ma, ninemnem shay pesing sha, ja kowan sha ey, “Say pesing tayo, say eg amta-an pay ni totoo, ikowan tayo son si-kara ey kenshat ta ibi-jag shen mengitosho shi totoo ni maypangkep nonta shaka itorotoro.”
18 Jet tina-wal shes Pedro nen Juan et inkowan sha son si-kara ey, “Niman ma, kenshat ta ibi-jag jon mengitosho ono mengikowan shi totoo ni maypangkep nonta joka itorotoro!”
19 Nem si Pedro nen Juan, simongbat ira ja kowan sha ey, “Nemnem jo kari, no sipay piyan nen Apo Shiyos ja pati-en mi—sota kowan to ono sota kowan jo? 20 Sota inon-an mi tan intenengan mi son Jesus, kenshat ta eg mebedin na isalsheng min mengikowan shi totoo.”
21 Jet sota ira toray, kini-det shen binidin ira, asan shaka ibodos ira ta enshiy basol sha ja sha so ira shosa-an. Tan sakey pay ja inbolosan sha so ira, sota emin na totoo, ireka man-iyaman son Apo Shiyos ni inmapteng nonta toon epilay. 22 Saja toon istay epilay ya kaskasshaaw i inmapteng to, esolok ka epat ta polo i tawen to.
Sota emati, kini-det sha ja nanshawat so nen Apo Shiyos
23 Jet nonta ebolos si Pedro nen Juan, imoli iren shagos shima kad-an ni kagajem sha jet inkowan sha son si-kara i emin na dingka ira nonta apo ni papashi tan sota eshom ma pangolo ni Hodiyos son si-kara. 24 Idi intenengan sha iya inkowan nen Pedro nen Juan, nansaksakey ira ja nanshawat son Apo Shiyos, ja kowan sha ey, “Apo Shiyos ja emalsowa ni dangit, dobong, baybay, tan emin na wara so iren jay, 25 angken si David ja toom, ja apo mi la nonta bayag, inshalan ni Ispirito Santo, jet insolat to ey,
‘Apay nga emanbonget iray toon eg emati? Apay nga eshakel i piyan ni tood ja Israel ja dag-en nem enshiy tongpal to? 26 Nansaganay arin emin shiya dobong, pati sota ira toray, na-olnong ira ja memekal son Apo Shiyos tan memekal so nonta shinotokan to ja mengisedakan ali.’ Sajay i kowan nen David, 27 jet say kina-agpayso to, si Ari Hirodis, tan si Poncio Pilato, tan sota ira toon eg emati ja aliwen Hodiyos, tan angken sota ira tood Israel, nantotodag ira ja maykontra son Jesus ja Anak mon shinotokan mo. 28 Nansaksakey ira ja ondaga ni piyan sha. Sajay ngoreshan i planom et dingkara shi timpon inkesheng mo. 29 Niman Apo Shiyos, on-im ima ngaaw wa planora ja kowan sha ey dag-en sha son si-kami, jet si-kamin toom, akniyokami ni kedsang min mengitosho ni esel mo shi totoo. 30 Ipedobos mo son si-kami ja ma-aknan ni panakabalin nen Jesus ja Anak mon shinotokan mo, say mengekas kami ni emansekit, tan mandeka kami ni milagro, ta si-katoy pengamta-an sha ey si-kam i makapanakabalin.” Kowan sha ni shawat sha.
31 Jet idi naksheng nga nanshawat ira son Apo Shiyos, kimiwed sota baley ya esa-nopan sha, jet emin ira, enapno ira ni Ispirito Santo jet etoled ma ira ja mengikowan ni esel nen Apo Shiyos.
Sota ira emati, inpansaksakey sha i kokowara
32 Jet emin ira sota emati, nansaksakey i pangkep sha tan nemnem sha, ja ayshiy kowan ni sakey tan sakey son si-kara ey sota kokowa to, mos-an to, no diket kokowaren emin. 33 Jet nontan, sota ira apostol, mas kimedsang iren mengitosho ni maypangkep son Apo Jesus, jey nanbiyag mowan shi patey, jet si Apo Shiyos, ebadeg i kaasi to son si-karen emin. 34 Emin ira sota emati, enshiy nankolang son si-kara ni mesepol sha, ta sota ira waray bo-day to, ono baley to, indako sha, 35 jet sota nandako-an sha, in-awat sha so nonta ira apostol ja si-karay maka-amta ja mengiweshis nonta pilak so nonta ira makasapol.
36 Jet nontan, waray sakey son si-kara ja emati ja si Jose i ngaran to. Sota ira apostol, inbeshayan sha ni Bernabe, ta say olog to, “mengi-kan ni pansi-metan”. Sajay ya too, nay-anak shi Cyprus, nem Hodiyos met laeng ja para tolong ni pari. 37 Waray indako ton eshom ma bo-day to, jet sota nandako-an to, in-awat to so nonta ira apostol.