15
Si Jesus i podnon may-eshig ey sengeg ni mola
1 “Si-kak i koskoston may-eshig ey sengeg ni mola, jet si Amak i emengajowan nontan na mola. 2 Jet no sotan na mola ket waray pangeto ja eg ondames, a-kalen to sotan na panga. Nem sota panga ja mandemes, shedosan to, say mas ondames pay. 3 Si-kayo, may-eshig ey eshalosan kayo ma, ta inkowan ko la sota esel nen Apo Shiyos son si-kayo. 4 Si-kak i pati-en jo ni olay, say wara-ak ngo ni olay son si-kayo. Sota panga, no abos to, eg mebedin na ondames; mesepol la wara ni olay nodta makapanga so. Sajay i kay-eshigan jo; isonga mesepol la si-kak ni olay i nemnemnemen jo. 5 Si-kak sota may-eshig ey sengeg ni mola, jet si-kayo sota may-eshig ey panga, jet sota on-onong ja memati son si-kak, wara-ak ngo ni olay son si-kato jet si-kato sota asdeg toy panbenagan ton mapteng. Nem sota toon enshi-ak son si-kato, enshiy to panbenagan. 6 Isonga sota eg on-onong ja memati son si-kak, may-ibong ja singa inges to sota panga ja epotol nodta makapanga so. Jet sotan na panga, mekkit; jet olnongen shen maypool shi apoy. 7 No si-kak ni olay i pati-en jo, ja onoren jo ni olay sota inkowan ko, i-akan koy ibaga jo son si-kak. 8 Ta say kayshedjawan nen Amak, sota panbenagan ni pamatiyo. Jet sajay pay i amta-an sha so ey too takejo. 9 Sota semek ko son si-kayo, inges toy kaba-deg ni semek nen Amak son si-kak. Isonga itodoy jon memati son si-kak, say wara ni olay son si-kayo sota semek ko. 10 No say nemnemnemen jo ket sota inkowan ko la son si-kayo ja bilin, wara ni olay son si-kayo sota semek ko. Ta si-kak ngo, naka pati-a i bilin nen Amak, jet wara ni olay son si-kak sota semek to. 11 Sajay i kowan ko son si-kayo, say mayda-kam kayo nodta imdeng ja wara ngo son si-kak, jet mas pay ya man-imdeng kayon pasiya.
12 “Iyay pay i piyan kon ikowan son si-kayo ja bilin. Mesepol la ensemek joy sakey tan sakey son si-kayo ja inges toy itsora ni semek ko son si-kayo. 13 Say ka-asan ni ebadeg ga semek ni sakey ya too, sota pengitodok to ni bakdang to ja angken metey para so nonta kagajem to. Sajay i oltimon ka-asan ni kaba-deg ni semek. 14 Jet niman ma, si-kayoy kagajem ko, no sota ikowan ko ket si-katoy pati-en jo. 15 Aliwen baga-en may pengibidang ko son si-kayo, ta say baga-en, eg ikowan nonta apo to son si-kato i emin na toka dagdaga. Isonga say awag ko son si-kayo, kagajem takejo, ta emin sota inkowan nen Amak son si-kak, inpa-amtak son si-kayo. 16 Aliwen si-kayoy emili son si-kak ja maistoro jo, nem si-kak i emili son si-kayo. Jet ibetkag takejo so ni totoo ja en mengikowan ni maypangkep son si-kak, jet sota dag-en jo, ebadeg i panbenagan to, ja eg mepokaw. Jet no ngantoy shewaten jo son Amak, pangkep ni joka pengi-edagey son si-kak, i-akan to son si-kayo. 17 Say bilin ko son si-kayo, mesepol la waray semek jo so ni sakey tan sakey son si-kayo.
18 “No saja tood ja dobong nga eg emati ket okesen shakejo kabol ni pamatiyo son si-kak, karekayo messhaaw, ta amtayo met ey si-kak i epangdon inokes sha. 19 No si-kayo ket inges jo ira ja tood ja dobong ja eg emati, istay ensemek shakejo koma. Nem si-kayo, aliwen inges jo ira, ta pinidi takejo ja maydesin son si-kara; isonga en-oges shakejo. 20 Karejo dibdibkan sota inkowan ko la son si-kayo, ey say baga-en, aliwen si-kato et ngo mowan i ibaingan ni totoo ey say sota apo to. Jet si-kak ja apo jo, pedikaten sha-ak; isonga angken si-kayo, sigoradon pedigaten shakejo ngo ali pangkep ni pamatiyo son si-kak. Nem no pinatiray esel ko, pati-en sha ngoy ikowan jo. 21 Eshakel aliy digat ja dag-en sha son si-kayo pangkep ni pamatiyo son si-kak, ta sota engibetkag son si-kak, eg sha pati-en. 22 No ekak ali dimaw ja engitosho son si-kara, istay mebedin na ikowan sha ey enshiy basol sha, nem niman, enshiy pangbal sha ja mengikowan ey enshiy basol sha. 23 Jet sota toon makakontra son si-kak, kontra sha ngo si Amak. 24 No eg sha inon-an i dingkak ja kaskasshaaw, ja eg mebedin na dag-en ni angken sipa, istay mebedin na ikowan sha ey enshiy basol sha. Nem angken na inon-an sha iyay ya dingkak, iso met laeng nga kontra sha-ak, tan kontra sha pay si Amak. 25 Nem sajay i ketongpalan nonta naysolat shi dinteg sha, ja kowan to ey, ‘Kinontra sha-ak ey enshiy kabol.’ 26 Sota Ispirito Santo ja mandepo so nen Amak, si-katoy ontolong son si-kayo say ewatan joy podno. Ibetkag ko di ja man-iyan son si-kayo, jet si-kato met laeng i mengipaneknek ni maypangkep son si-kak. 27 Jet si-kayo pay i mengikowan ni maypangkep son si-kak, ta si-kayo, naysigod ja naykadwa kayo son si-kak, nonta ikayshogik so pay laeng nonta obdak shiya dobong.”