11
Etey si Lazaro, nem inpanbiyag nen Jesus
1,2 Wara iray san-a-aki ja nanbaley shi Bitania, jet say ngaran sha, si Maria, si Marta, tan si Lazaro. Jet si Lazaro, ja agi sha, nansakit. (Si Maria, si-kato sota mengiro-jag ali ni emanseng-ew wa dana shi sedi nen Jesus, asan toka ponasi ni bowek to.) 3 Si Maria nen Marta, engibetkag ira ni en mengikowan son Jesus ey, “Apo, si Lazaron ensemek mo ket emansekit.”
4 Idi inamta-an nen Jesus ey emansekit si Lazaro, kowan to ey, “Sotan na sakit, eg ipatey nen Lazaro, no diket si-katoy kayshedjawan nen Apo Shiyos, tep si-katoy ka-asan ni kina-Shiyos ni Anak to.”
5 Si Jesus, ebadeg i semek to so ira niyay ya san-a-aki. 6 Nem nonta inamta-an to ey emansekit si Lazaro, nan-iyan nin shima toka pan-iyani ni showen akew pay. 7 Idi edabas sota showen akew, inkowan nen Jesus so nonta ira too to ey, “Eti, ondaw kito mowan shi Jodia.”
8 Jet kowan nonta ira too to ey, “Apo, ngantoy dawan tayo mowan shi Jodia ey nonta pinsak ka dinawan tayod man ket piyan ira nonta pangolo ni Hodiyos shiman na kespigan shaka ni bato say mebono ka?”
9 Si Jesus, simongbat ja kowan to ey, “No ka-akawan i pan-ekad, eg kita maysokbab, ta aliwen embolinget. Wara met i sampolo tan showen oras ja ka-akawan; isonga no oras ni ka-akawan i pan-ekad, eg kita maysokbab ta ma-esas i shalan ja pan-akshan, tep sinilwan ni sekit. 10 Nem sota man-ekad ni medebi, mebedin na maysokbab, ta eg to asen i panshandan to, tep enshiy onsilew son si-kato.” 11 Jet si Jesus, intoloy ton kowan to ey, “Si Lazaro ja kajem tayo, na-ogip mala, jet ondawak ta nak bengonen.”
12 Jet kowan nonta ira too to son si-kato ey, “Apo, mapteng no na-ogip, say onpesed.” 13 (Sajay i insongbat sha tep kowan sha ey kenshat ta na-ogip bengat si Lazaro, nem say piyan na a-selen nen Jesus gayam, etey da si Lazaro.)
14 Idi inamta-an nen Jesus ey eg inewatan nonta ira too to sota inkowan to, indiritso ton inkowan ey etey da si Lazaro. 15 Jet say kowan to pay, “Ebadeg i imdeng ko ta enshi-ak shiman nonta inkatey nen Lazaro. Sajay ya edaga son si-kato, panmaptengan jo, tep onba-deg i pamatiyo son si-kak. Jet niman, eti, ondaw kito shi kawad-an to.”
16 Si Tomas, ja kowan sha ey Epin, ja sakey so ira nonta too nen Jesus, kowan to so ni kait to ey, “Mekidaw kito son Apo Jesus, jet angken metey kito ja may-a-shom son si-kato no bono-en sha!”
17 Idi mimotok ma si Jesus shi Bitania, epat ta akew malen naydiyang si Lazaro. 18 Saja dogad ja Bitania, say ka-ashawi to shi Jerusalem, tedon kilomitro bengat; 19 isonga nonta etey ma si Lazaro, eshakel iray Hodiyos ja edapod Jerusalem ja en nanbisita so nen Maria nen Marta ja emandiwdiwa son si-kara. 20 Idi inamta-an nen Marta ey emanmotok si Jesus, bimo-day jet to inaspol si Jesus, nem si Maria, si-katoy ebay-an shima baley. 21 Jet kowan nen Marta so nen Jesus ey, “Apo, no wara ka komed jay nonta kepansekit nen agik, istay eg etey koma. 22 Nem amtak ey angken niman, no ngantoy kekshawen mo so nen Apo Shiyos, i-akan to son si-kam.”
23 Simongbat si Jesus ja kowan to ey, “Si agim da, manbiyag mowan.”
24 Jet si Marta, simongbat ja kowan to ey, “Amtak ey no timpo ali ni panbiyag mowan ni nanketey, manbiyag ngo si Lazaro.”
25 Simongbat si Jesus mowan, ja kowan to ey, “Si-kak i panbiyag so ira nonta nanketey, tan mengi-kan ni biyag sha; isonga sota memati son si-kak, angken na metey, manbiyag met laeng. 26 Jet angken sota ira too niman ja eg pay laeng etey, no memati ira son si-kak, i-aknan ko ira ni biyag ja enshiy to engintegan. Jet si-kam, moka pati-a iya inkowan ko la?”
27 Si Marta, simongbat ja kowan to ey, “Naka memati ey si-kam sota naypadton mengisedakan ja Anak nen Apo Shiyos ja ibetkag to alid ja dobong!”
28 Idi enaksheng iyay ya inpantabtabal nen Jesus nen Marta, nay-oli si Marta shima baley jet idi naydasin ira nen Maria nodta eshakel la too, inkowan to son si-kato ey, “Wara sota Maistoro jet tokaka pan-ibaga.”
29 Idi inkowan nen Marta iyay son Maria, dimayat ta shagos jet dimaw shima kawad-an nen Jesus. 30 Si Jesus, eg pay laeng simabi nodta kawad-an ni baley nen Maria, no diket wara pay laeng nodta dogad ja en inaspolan so nen Marta. 31 Jet sota ira Hodiyos ja bisita ja wara nodta baley ja emandiwdiwa son Maria, idi inon-an sha ja kinano-an nen Maria ja bimo-day, inonod sha, ta say wared nemnem sha, kowan sha ey baka ondaw si Maria shima naydiyangan nen Lazaro ja en onnangis shiman.
32 Si Maria, idi mimotok shima kad-an nen Jesus, nanshomog nodta sango-an nen Jesus jet kowan to ey, “Apo, no wara ka komed jay nonta kepansekit nen agik, istay eg etey koma.”
33 Jet si Jesus, inon-an to ja emannengis si Maria, tan angken pay sota ira Hodiyos ja ekidaw ali son Maria, ireka onnanengis ngo, jet si Jesus, ngimed-as. 34 Jet inbag-an to ira ja kowan to ey, “Toway indiyangan jo so nen Lazaro?”
Simongbat ira ja kowan sha ey, “Kala Apo. mo asas i indiyangan mi so.”
35 Jet si Jesus, nimangis ngo ma.
36 Jet sota ira Hodiyos, kowan sha ey, “Asas jo kari, ensemek ton pasiya si Lazaro.” 37 Nem sota ira eshom ma Hodiyos ngo, kowan sha ey, “No agpayson inpan-asas to sota ekorab, apay ngarod nga enshiy to dingka say eg etey si Lazaro?”
38 Jet si Jesus, mas pay ya ngimed-as, jet dimaw nodta diyang nga naydiyangan nen Lazaro. Sota diyang, epokit ni bato; 39 isonga si Jesus, inbilin to ey a-kalen sha sota bato ja naypokit nodta bongot ni diyang.
Nem si Marta, ja agi nonta etey, kowan to ey, “Apo, epat ta akew to niman na naydiyang. Sigoradon eman-ekob mala niman na pasiya!”
40 Jet si Jesus, simongbat ja kowan to ey, “Apay ekak aya inkowan nontan son si-kam ey no memati ka, asen moy obdak ja kayshedjawan nen Apo Shiyos?”
41 Jet sota bato ja naypokit nodta diyang, ingkal sha. Jet si Jesus, timangkak ja kowan to ey, “Naka man-iyaman son si-kam Ama, ta moka i-akan no waray kekshawen ko son si-kam. 42 Amtak ey moka itenengi ni olay i naka ishawat son si-kam, nem say engibolikasan ko so niyay ya shawat son si-kam, say itenengan ira niya toon wared jay niman, say memati ira ey agpayso ja si-kam i engibetkag son si-kak shiya dobong.”
43 Idi enaksheng nga inkowan nen Jesus iyay, kimeljaw ja kowan to ey, “Lazaro, bo-day ka di!”
44 Jet si Lazaro, bimo-day ali, ja ebedbeshan i takday to tan sedi to, tan edibotan i dopa to ni dopot ta shaka idibot ni etey. Jet si Jesus, kowan to so nonta ira toon wara nodtan ey obaren sha sota naybedbed say ka-way ton man-ekad.
Sota ira Hodiyos, nantotodag ira ey bono-en sha si Jesus
45 Sota ira Hodiyos ja bisita nen Marta nen Maria, inon-an sha sota inpasing nen Jesus ja emiyag son Lazaro, isonga eshakel son si-karay emati son Jesus. 46 Nem sota eshom ja Hodiyos, dimaw ira so nonta ira Parisiyo, jet sha inkowan i dingka nen Jesus. 47 Jet nontan ma, sota ira Parisiyo, tan sota apo ira ni papashi, nanmimiting ira nonta toray ni Timplo, jet kowan sha ey, “Ngantoy pesing tayo aya so nen Jesus? Eshakel ma i dingdingka to ja kaskasshaaw. 48 No itolok tayo ja sotan ni olay i pesing to, eshakel malay ma-ewis ja memati son si-kato, jet ondaw ma aliy i-Roma ja meneshal niya Timplo tayo, tan saja ili tayo.”
49 Nem sota kangeto-an na pari nontan na tawen, ja si Kaipas i ngaran to, kowan to ey, “Enshi gayam i amtayo. 50 Eg jo gayam amtay panmaptengan jo. Agpos et ey metey iya sakey ya too, say eg meshosa i totood ja ili tayon Israel.” 51 (Sajay ya inkowan nen Kaipas, aliwen edapod nemnem to, no diket inpaipadto nen Apo Shiyos, ta si-kato nontan i kangeto-an na pari. Jet sajay ya inkowan to, pinonta-an to nga agpayso ey si Jesus, metey say eg meshosa i tood Israel, 52 jet aliwen si-kara bengat, no diket angken pay sota ira emin na annak nen Apo Shiyos ja naywaris shi intiron dobong, say manseksekey ira ja memati son Jesus.)
53 Jet nontan ma, waray plano iren ja esa-nop ey bono-en sha si Jesus. 54 Isonga nontan ngo ma, eg manpa-sas si Jesus shi karakdan shi Jodia, no diket inpa-agpos ton dimaw shima dogad ja kowan sha ey Ipraim ja nay-esop shima shonshontog ja enshiy balbaley, jet eki-iyan nin shiman so nonta ira too to.
55 Shanshani ma sota timpo ni piyasta ni Hodiyos ja kowan sha ey Paskowa jet eshakel iray toon dimaw shi Jerusalem ja edapod dogadogad ja nay-esop shiman, say sha dag-en sota sigod ja ogadi ni Hodiyos ja shaka dagdag-a asan ireka makipiyasta. 56 Jet sota ira eshakel la totoo nodta Timplo, shaka pan-enapa no wares Jesus, nem enshi. Jet nanbibinaga ira sota totoo, ja kowan sha ey, “Nganto ngatay namnama jo: ondaw ngata di, ono enshi?”
57 Nontan, sota ira apo ni papashi, tan sota ira Parisiyo, inkowan sha so nonta ira totoo ey no sipa son si-kara i maka-amta ni kawad-an nen Jesus, ikowan sha son si-kara say sha a-shelen.