11
Intoro nen Jesus i pesing nga manshewat son Apo Shiyos
1 Nonta sakey ya akew, emanshewat si Jesus so nen Apo Shiyos et idi naksheng, kowan nonta sakey ya too to son si-kato ey, “Apo, itod-iyokami ni pesing min manshewat son Apo Shiyos, ja inges toy inpangitoro nen Juan so ira ni too to.”
2 Jet si Jesus, inkowan to son si-kara ey, “No manshewat kayo son Apo Shiyos, sajay komay ikowan jo: ‘Ama, si-kam koma i mayshedjaw ni olay. Sota pantoshayan mo, pasebim koma ali. 3 I-kan mo koma sota kenen mi ni inakew. 4 Si-kam i memekawan son si-kami ni nanbasolan mi, tep mika ngo pekawani sota ira nanbasol son si-kami. Karam itolok koma ja manbesol kami, no diket si-kam i mengiredan son si-kami say eg kami manbesol.’ ”
5 Si Jesus, in-arigan to ira say eg ira koma on-ekdas ja manshewat son Apo Shiyos; kowan to ey, “No kaspangarigan ey ondaw ka shi baley ni kajem mo ni kawa ni dabi ja ikowan mo son si-kato ey, ‘Kajem, pabodorimak ka ni tedon boknol la tinapay, 6 ta waray kajem kon mimotok shi baley ko et enshiy nak ipakan son si-kato.’ 7 Nem sotan na kajem mon wara nodta naydaem ni baley to, onsongbat ja kowan to ey, ‘Karamak distolbo-en! Nanbagat kami mala, tan saja ira annak ko tan si-kak, shimokol kami ma. Ekak mebedin men onbangon ja mengi-kan ni mesepol mo.’ 8 Jet ngaranto ma? Angken na en-asneng nga onbangon ja mengi-kan ni kasapolan mo tep sankajem kayo, kenshat ta mepidit ta onbangon no memasig ka ni baga. Jet i-akan toy mesepol mo. 9 Inges niyay i pesing nga manshewat son Apo Shiyos. No kanayon na manbeka kayo son si-kato, i-akan toy kekshawen jo. No eg kayo on-ekdas sa manshewat son si-kato, ewaten joy mesepol jo. Panogtog kayo nin et idokatan tokejo. 10 Ta emin ira sota manbeka, ono manshewat son Apo Shiyos, si-karay mengewat ni mesepol sha. Tan emin ngo iray menogtog, si-karay maydokatan. 11 Arig toy san-ama. Wara ayay inon-an jon nga-nga ja no manbeka so nen ameto ni piskaw ket oleg i i-akan nen ameto? 12 Ono kaspangarigan ey sota anak to ket manbeka ni ikdog, apay kamajan ayay i-akan to? Enshi, no diket say i-akan to so nonta anak to, sota mapteng nga ibaga ni anak to. 13 Si-kayo, angken ngaaw i aramid jo, amtayo met ja mengi-kan ni mapteng nga ibaga ni anak jo. No satan i wara son si-kayo, mas pay ya amta nen Apo Shiyos ja Amejod dangit ja mengi-kan ni mapteng nga banag so nonta emengshaw son si-kato ni kasapolan to. I-akan toy Ispirito Santo to so ira nonta manbeka son si-kato.”
Inpan-esel nen Jesus sota dakin eg maka-esel
14 Waray sakey ya toon eg maka-esel jet say kabol la eg to a-selan, waray dimonyo ja pimeket son si-kato. Si Jesus, inpabtik to sota dimonyo nodtan na too jet sota too, nan-esel ma. Jet sota ira eshakel la too, nasshaaw iren pasiya. 15 Nem sota ira eshom, endedamsis sha, ja kowan sha ey, “O-owap to kari ey wares Apo Shiyos son si-kato. Say toka osala ja pebtik so ni dimonyon pimeket shi totoo ket sota apo met laeng ni dimonyo ja si Bilsibol.”
16 Sota ira eshom, piyan shen peshasen si Jesus, isonga inkowan sha ey mandeka ni milagro ja asanan sha so kono no podnon inbetkag ali nen Apo Shiyos.
17 Nem si Jesus, amta toy wared nemnem sha, isonga kowan to son si-kara ey, “Dokodoko tan na inkowan jo. Apay nga inkowan jo ey sota apo ni dimonyo i naka osala? Eg towak todongan na pebtik so ni kait to met laeng, ta amta to ey sajay, arig toy ilin nanshowa. No manshowa shorog i sakey ya ili asan ireka mankobat, kenshat ta mepilshi sotan na ili. Kasta met sota pamilja ja manshowa, mansisi-jan ira sota totoo. 18 Eg mebedin na si Satanas, pebtik to met laeng i kait to, tep amta to ey no dag-en to iyay, eg onbayag i pansaad to. Kowan jo ey naka pebtik iray dimonyo tep si Bilsibol i emenodtodong son si-kak? 19 No kasta, kowan jo ey si-kato ngarod i ka-osala ni too jo ni shaka pengipebtik ngo ni dimonyo? No sotan i kowan jo, angken sota too jo, bedawen sha ita kowan jo ey sota apo ni dimonyo i ema-osal ni pebtik so ni kait ton dimonyo. 20 Nankamali kayo. Si Apo Shiyos i kaontolong son si-kak ja pebtik so ira ni dimonyo. Jet sotan i amta-an jo so ey say pantoshayan nen Apo Shiyos, wara ma son si-kayo.
21 “Say arig ni naka pesing so ni dimonyo, sajay. No sota toon waray almas to ja matekal la mekigobat, enshiy en mengibot ni kokowa to no bantayan to ni olay sota baley to. 22 Nem no ebaken ni sakey ya toon mas matekal ey say sota waray almas to, al-en nonta mas matekal la emin da sota almas ton toka panshindi et ibingbingay toy kokowa nonta na-abak.
23 “Sota toon eg on-onod son si-kak, wara ira son Satanas, ja sha-akka kontra-a. Jet sota eg ontolong son si-kak ja mengolnong ni too, singa shaka pansisi-jan ira sota totoo.
24 “Kaspangarigan ey sota toon istay imonod son si-kak nem eg to intoloy, mema-ma et ngo mowan i kasesaad to. Sajay, may-eshig nodta toon bintikan ni dimonyo. No sota dimonyo ket onbetik shi too, eman-eka-ekad shima kamag-an ja eman-ena-enap ni pansalshengan to, nem enshiy to sepolen. Isonga nemnemnemen to ey on-oli mowan shima toon istay kawad-an to. 25 Jet no may-odi, sebi-en ton mimapteng ma jet ikowan to ey, ‘Siya, edinisan ma iya baley ko.’ 26 Say pesing to, ondaw ja en mengodop ali ni piton kait to ja nankekedsel nem say si-kato, jet onsekep iren man-iyan nodtan na too. Jet sotan na too, mema-may kasesaad to ey say nonta pilmiro.”
27 Idi naksheng nga inkowan nen Jesus iyay, waray biin inkedsang toy esel to ja naydaok so ira nonta eshakel la too, ja kowan to son Jesus ey, “Si Apo Shiyos i emindisiyon so nonta biin engi-nak son si-kam!”
28 Nem kowan nen Jesus ey, “Ebadbadeg i bindisiyon pay nen Apo Shiyos so nonta ira mengitneng ni esel to tan memati ni kowan to!”
Pan-ibaga ira nonta eshom ma too ey mandeka si Jesus ni milagro
29 Kanayon na manka-shomi sota ira too ja mantetneng son Jesus. Jet nontan, inkowan to ey, “Ngaaw iray aramid ni too ma niman! Say shaka pan-ibaga, sota milagro, ta kowan sha ey si-katoy asanan sha so no agpayson si Apo Shiyos i engibetkag son si-kak. Nem enshiy milagro ja en maypa-sas son si-kara niman! Say pengamta-an jo ey inbetkag towak nen Apo Shiyos, no onsabi son si-kak sota inges toy epasemak so nen Jonas nonta bayag da. 30 Tep si Jonas, nonta inmotok tod Niniba, si-katoy mismon engamta-an sha nontan na timpo ey si Apo Shiyos i engibetkag son si-kato. Inges towak ja kowan sha ey Anak ni Too, waray pengamta-an ni too nem ekay ey si-kak i inbetkag nen Apo Shiyos.
31 “No timpo alin pengigsheng nen Apo Shiyos no sipay maysedakan, ondayat sota arin bii ja edapod ma pesaw, jet ikowan to ey kenshat ta meshosa kayo. Tep si-kato, edapod arawin dogad ni indaw ton to itenengan i kalaing nen Ari Solomon ni toka pantosho. Jet niman, asas jo ta wared jay i engatngato ey say si Ari Solomon, jet eg jo pinati. 32 Say sakey pay, sota totood Niniba ja intod-an nen Jonas. Ondayat ira di no timpon pengigsheng nen Apo Shiyos no sipay maysedakan jet ikowan sha ey kenshat ta meshosa kayo. Tep si-kara, nanbebawi ira nonta inteneng shay esel nen Apo Shiyos ja inkowan nen Jonas son si-kara. Jet niman, asas jo ta iyay shiyay niman i engatngato nem say si Jonas, jet eg jo mowan pinati.
33 “No bilang ey waray kingki ja inparedang mo shi naydaem ni baley, simpri eg mesa-keban, no diket maypa-tok shi ekayang, say sota ira toon onsekep ali, asen shay seskepan sha.
34 “Sota matam, si-katoy may-eshig ey silew ni bakdang. Jet no mapteng i toka pengesas ni eshom, sota bakdang mo, may-eshig ey napno ni dawag. Nem no sota matam ket ngaaw i toka pengesas ni eshom, may-eshig ey emin na parti ni bakdang mo ket wared embolinget. 35 Isonga pantanshaan ka, ta no ma-enshiy istay dawag ni nemnem mo, may-eshig ey embolinget ngon emin i kawad-an mo. 36 Isonga no napno i emin na parti ni bakdang mo ni dawag, ja enshiy parti ton embolinget, napno ka ngo ni kinamapteng, ja singa inges toy silew ja sinilwan toka.”
Inkowan nen Jesus sota basol ira nonta Parisiyo man sota basol ni kait sha
37 Idi naksheng si Jesus ja nan-esel, sota Parisiyo, inewis tos Jesus ja en mekipengan shi baley to, jet dimaw si Jesus ja en ekilikob son si-kato. 38 Sota Parisiyo, nasshaaw nonta dinmo ton eg nanbolo nin si Jesus ni inpangan to.
39 Kowan nen Apo Jesus son si-kato ey, “Si-kayon Parisiyo, say itsora ni ogadiyo, singa sota tasa ono malokong ja showal to bengat i eki-wanan, nem sota dikong to, edogit ta pasiya. Sotan i kay-eshigan jo tep say joka ipa-sas shi karakdan, singa maronong kayo, nem say joka dagdag-a, sota pengamkamkam ni kompormi tan sota eshom ma ngaaw. 40 Enshiy am-amtayo! Si Apo Shiyos, piyan ton mapteng koma i wared poso jo, ja inges toy mapteng nga joka pesing shi sango-an ni totoo. 41 No shi ebiteg komay joka pengi-kani ni wara son si-kayo, mapteng may emin na wared poso jo.
42 “Kaasi kayo di, si-kayon Parisiyo! Ta joka tongtongpala sota bilin na ootik i pateg to, nem joka et ngo mowan ibiyang sota bilin na epateg ga pasiya! Kaspangarigan, joka idaton so nen Apo Shiyos ja singa bingay to sota maykesampolo nodta emin na apit jo, angken pay sota molejo ja para seng-ew ni sira. Nem joka diwayi sota koston pesing shi kait jon too tan sota penmek jo son Apo Shiyos. Sajay ya joka pesing nga mengi-kan ni singa bingay nen Apo Shiyos, mapteng; nem mesepol la eg jo diwayan iya wa-wa-shen piyan nen Apo Shiyos.
43 “Kaasi kayo di, si-kayon Parisiyo! Ta pipiyan jon ontongaw shima naysaganen tongawan say mebigbig kayo, tan pipiyan jo pay ya rispito-en shakejo ni totoo, ja semsemano-an shakejo shima malkaro ja karakdan ni too. 44 Kaasi kayo din pasiya! Ta may-eshig kayon singa naybeka-an ni too ja enshiy malka to, ja eg idasin ni toon man-ekad.”
45 Sota sakey ya maistoro ni dinteg ni Hodiyos, kowan to son Jesus ey, “Maistoro, idi inkowan mo iyay, singa inda-kam mokamin maistoro ni dinteg et ebebaingan kami ngo!”
46 Simongbat si Jesus ja kowan to ey, “Angken si-kayo ngon mamaistoro ni dinteg, kaasi kayo di! Ta joka ida-kariy too ni embel-at ta bilin jon eg sha iposi. May-eshig ey joka ira bel-ati ni kalka ja eg sha iposi, nem si-kayon mismo ket eg jo pay peshasen na angken sakey ya kalomot joy mandi-bit.
47 “Kaasi kayo di! Ta si-kayo i nandaga ni monyominto ira nonta para padto nen Apo Shiyos nonta bayag da ja binbinno ni ap-apo jo la nontan da. 48 Sata ira monyominto ja inemag jo, si-katoy ka-asan to ey joka aporbali sota inpamono nonta ira apo jo la so nonta ira para padto nen Apo Shiyos nonta bayag da. Sota ap-apo jo i emono et si-kayo ngoy engamag ni monyomintora. 49 Nay-eshom kayo nodta aramid da nonta ap-apo jo, isonga agpayso noman sota kowan nen Apo Shiyos ey, ‘Mengibetkagak da ngo son si-kara ni totoon para padto tan sota eshom ma totoo ja mengikowan ni esel ko. Nem bono-en sha sota ira eshom, tan pedigaten shay eshom.’ Sajay i inkowan nen Apo Shiyos tep amta to ey tima-nil kayo ja en-oges joy toka ibetkag ali son si-kayo. 50 Isonga si-kayon too niman na timpo, meshosa kayo di ja ikaro jo sota inpamono ni ap-apo jo so nonta ira inbetkag nen Apo Shiyos, manshoki nonta inkapalsowa niya dobong ingkato niman. 51 Say pilmiron ebono nontan da bayag, si Abel, jet say ka-onoran, si Sakarias, ja binono ni too nonta bayag da shima naydaem ni Timplo, ja nay-esop shima kowan sha ey altar. Owen, ikowan ko ey emin iyay, si-kayon too niman i mengikesho.
52 “Kaasi kayo di, si-kayon mamaistoro ni dinteg! Ta si-kayo i kabol la eg so amta-an ni totoo ni maypangkep so nen Apo Shiyos. Si-kayon shorog, eg jo koston amta-an, jet si-kayo i timiped so ira nonta toon makapiyan na mengamta.” Kowan nen Jesus.
53,54 Idi naksheng nga inkowan to iyay, bimo-day si Jesus nodtan na baley. Nem sota mamaistoro ni dinteg ni Hodiyos tan sota ira Parisiyo, empait shen pasiya sota inkowan to; isonga manshoki nontan, pineshas shen pasiya i kabaalan shen menaol son si-kato. Say inpasing sha, eshakel i inbagabaga sha son si-kato ni maypangkep ni ka-iri-irin, ta kowan sha ey balang nem waray pankamali-an ton isongbat, ja pebesolan sha son si-kato.