10
Inbetkag nen Jesus sota piton polo tan showa ja too to
1 Idi naksheng iyay, si Apo Jesus, shinotokan toy piton polo tan showa so nonta ira too to, jet inbetkag to iren sanshedwa ja en mengitosho shima emin na dogad ja kowan to ey dawan to met laeng. 2 Jet say kowan to son si-kara, “Eshakel iray toon may-eshig ey ma-epit nem kolang iray man-obda. Si Apo Shiyos i mengibetkag ni toon mengepit, isonga si-kato ngoy pengshawan jo say mengibetkag ali ni on-atang son si-kayo. 3 Daw kayo ma, nem tanshaaniyo ta ibetkag takejo ja singa kalniron naydaok shima atap pa aso. 4 Angken eg kayo mengita-jon ni pilak, ono bayong, ono sapatos. Pandiritso kayod dawan jo; karekayo mesiwat ni tabtabal shi shalan nem waray aspolen jo. 5 No onmotok kayo nodta balebaley, say pilmiron pesing jo, ikowan jo ey, ‘Bindisiyonan koma nen Apo Shiyos i nanbaley shiyay ya baley.’ 6 Jet no maronong sotan na toon nanbaley nodtan, ja anam ton mebindisiyonan, ontoloy sota inkowan jon bindisiyon nen Apo Shiyos son si-kato. 7 Topog joy baley ya pan-inan jo, karekayo man-a-atan. Jet sota waren isango sha son si-kayo ja kenen jo, si-katoy singa dagboyo. Ta sota man-obda, nebeng ton may-aknan ni kompormin mesepol to. 8 No ondaw kayo nodta ili et ewaten shakejod man, kan jo sota waren isango sha son si-kayo. 9 Pamapteng joy emansekit ta totoo nodtan na dogad, jet say ikowan jo so nonta ira totoo, ‘Sota pantoshayan nen Apo Shiyos, dimaw ali ma ja nay-esop son si-kayo.’ 10 Nem no sota dogad ja motoken jo ket, eg shakejo ewaten, daw kayod ma kabalkan na kalsara say on-an shakejo et ikowan jo ey, 11 ‘Ayshi may biyang mi son si-kayo! Angken saja depok ja naypeket shi sedi mi, pokpoken mi. Nem karejo dibdibkan ey sota pantoshayan nen Apo Shiyos ket dimaw alin nay-esop son si-kayo ja istay onsabi son si-kayo.’ ” 12 Jet intobtob nen Jesus ey, “Iyay pay i ikowan ko. No onmotok ali sota akew ja pengigsheng nen Apo Shiyos no sipay maysedakan, say podnon mepesamak so nonta too nodtan na dogad, mas embel-at i keshosara nem say sota tood Sodoma.” Inkowan nen Jesus iyay ya emin so nonta ira too ton inbetkag to.
13 Wara pay i inkowan nen Jesus ja kowan to ey, “Kakaasi kayo di ja toon i-Korasin, tan si-kayon tood Bitsaida. Eshakel i dingkak ka milagro shi ili jo jet inon-an jo, nem eg kayo nanbebawi maypangkep ni basol jo. No sajay komen milagro ja inpa-sas ko son si-kayo ket inon-an ni tood Tira, tan tood Sidon, angken aliwen too ira nen Apo Shiyos, sigoradon nanbebawi ira maypangkep ni basol sha nonta mismon inon-an sha sota milagro, tan wara pay i ka-on-anan to ey ireka mandeshingit maypangkep ni basol sha. 14 Nem ikowan ko son si-kayo, no onsabi ali sota timpon pengigsheng nen Apo Shiyos no sipay maysedakan, embel-at i keshosayo nem say sota tood Tira tan tood Sidon. 15 Tan si-kayo ngon tood Kapirnaom, kowan jo ey ikayang jon shorog i bakdang jo ingkatod dangit, nem ayshi, eg mebedin! Maybeba kayod impiyarno.”
16 Jet kowan nen Jesus so nonta ira ibetkag to ey, “No sipay mengitneng son si-kayo, si-kak i maybidang ey intenengan to. Tan no sipay ondamsis son si-kayo, si-kak i maybidang ey dinamsis to, tan no sipay ondamsis son si-kak, maybidang ey dinamsis tos Amak ja engibetkag ali son si-kak.”
Imoli ali ira sota piton polo tan showa ja too ton inbetkag to
17 Idi nay-oli ira di, sota piton polo tan showen inbetkag nen Jesus, ireka man-imdeng nga pasiya, ja kowan sha son Jesus ey, “Apo, angken sota ira dimonyo, shakamika pati-a no osalen miy ngaran mo.”
18 Si Jesus, kowan to son si-kara ey, “Owen, amtak ey si Satanas, sankakemjat i toka ka-ebak ja singa bagidat alid naykayang. 19 Si-kak i engibetkag son si-kayo et angken manshedan kayod dilikaron dogad, enshiy mepesamak son si-kayo. Mebedin jon ebaken i kabakal jon si Satanas, jet eg kayo ma-an-ano. 20 Nem aliwen sota inpanagshag jo bengat ni dimonyo i pan-imdengan jo. Nem say pan-imdengan jo komen pasiya, sota inkaydista ni ngaran jod dangit.”
21 Jet nontan met laeng nga oras, sota Ispirito Santo nen Apo Shiyos, inpan-imdeng to si Jesus. Isonga kowan to son Apo Shiyos ey, “Ama, apo ni dangit tan saja dobong, man-iyamanak son si-kam, tep say inpa-amta-an mo so ni maypangkep ni pantoshayan mo ket sota ira toon mapiyan na metod-an. Nem sota ira toon kowan shed nemnem sha ey waray amtara, eg mo ipalobos sa amta-an sha sota maypangkep ni pantoshayan mo. Owen Ama, edaga iyay tep si-katoy piyan mon medeka.” Sajay i iyaman nen Jesus son Apo Shiyos.
22 Jet inkowan to pay ey, “Si-kak bengat i inpiyalan so nen Amak ni emin. Si-kak bengat i maka-amta ni emin na maypangkep son si-kato, tan si-kato ngo bengat i maka-amta son si-kak ka Anak to. Isonga sota piyan kon pengitosho-an ni maypangkep ni pantoshayan nen Apo Shiyos, si-katoy itoro-an ko so.”
23 Si Jesus, sinengo to sota ira too to et kowan to son si-kara ni abos sha ey, “Ekasat kayo, ta inon-an jo ira jay ya naka dagdag-a. 24 Agpayso iya ikowan ko son si-kayo. Eshakel ira sota para padto nen Apo Shiyos tan a-ashi nonta bayag da ja piyan shen on-an koma iyay ya inon-an jo niman na timpo, tan piyan shen itenengan koma iyay ya intenengan jo, nem eg sha sina-kop.”
In-arig nen Jesus sota i-Samaria ja amta ton mengaasi
25 Waray sakey ya maistoro ni dinteg ni Hodiyos; dimaw son Jesus sa kowan to ey peshasen to no kas-anoy katekal nen Jesus. Kowan to son Jesus ey, “Maistoro, ngantoy kowan mo ja dag-en ko say ewaten koy biyag ja enshiy to engintegan?”
26 Simongbat si Jesus ja kowan to ey, “Ngarantoy naysolat nodta bilin nen Apo Shiyos nonta bayag da? Jet nganto mangoy moka pengodog?”
27 Sota maistoron ememeshas son Jesus, simongbat ja kowan to ey, “Say kowan to, ‘Semek mos Apo Shiyos ja si-katoy pengitoshongan mo ni emin na wara son si-kam—emin na wared posom, emin na kedsang mo, tan emin na nemnem mo.’ Tan kowan to pay ey, ‘Semek moy kait mon too ja inges toy moka penmek so ni bakdang mo.’ ”
28 Kowan nen Jesus ey, “Kostoy songbat mo. Jet no onoren mo iyay, ja dag-en mo, ewaten mo sotan na biyag ja insalodsod mo.”
29 Nem sota maistoro ni dinteg ni Hodiyos, emandeson. Isonga kowan to son Jesus ey, “Jet sipa ngarod i kowan mo ey kait kon sesmeken ko?”
30 Sinongbatan nen Jesus ni arig, ja kowan to ey, “Waray sakey ya too; emanshedong ja edapod Jerusalem ja ondaw shi Jiriko. Nem sota ira tolisan, tinodisan sha et indaray angken baro to. Pinegpeg-as sha et indekjas shen nalpeng. 31 Sotan ma ey naytompong ngon waray pari ni Hodiyos ja emanshedong nodtan na kalsara. Idi inon-an to sota toon naypolay, dinigdig to ja nanshalan shi naykilig. 32 Idi naksheng iyay, wara mowan i Hodiyos sa para tolong met laeng ni pari ja nanshalan nodtan, nem inges to met laeng i inpasing to. Idi inon-an to sota toon tinodisan sha, nanshalan nodta naykilig. 33 Nem idi nanshalan aliy sakey ya toon i-Samaria nodtan, ja aliwen kait nonta Hodiyos sa tinodisan sha, inon-an to et naysemekan nodta too. 34 Dimaw, to simbi et to inekasan sota ira sogat to ni danen edaokan ni adak, asan toka bedbeshi. Jet inpankabajo to nodta kabajo to et indaw to nodta baley ya shiwesan et inajowanan tod man. 35 Idi ewa-wa, inbo-day toy pilak to et in-akan to nodta emanbantay nonta baley ya shiwesan, ja kowan to ey, ‘Ajowanim iyay ya too et no on-oli-ak ali, manshedanak alid jay et bayshan taka no pigay kasto-en mon para son si-kato.’ ”
36 Jet si Jesus, inbaga to so nonta maistoro ni dinteg ey, “Jet saja tedon too ja nanshalan nodta kad-an ni toon etolisan, sipa son si-kara i kowan mo ey kait to?”
37 Sota maistoro ni dinteg ja nansalodsod, simongbat ja kowan to ey, “Simpri sota engaasi son si-kato.”
Jet si Jesus, kowan to ey, “Owen et sajay ngoy pesing mo so ni eshom.”
En binisita nen Jesus si Maria nen Marta
38 Idi eman-ekad si Jesus tan sota ira too to, simbiray dogad ja kawad-an ni biin manngeshan ni Marta, jet inewis to si Jesus shi baley to. 39 Si Marta, waray agi ton si Maria i ngaran to. Sajay ya agi to, timongaw wa emantetneng ni kepan-itoro nen Jesus. 40 Nem si Marta, ngaaw i dekna to ta sakey ton emengisekana ni kenen sha. Dimaw son Jesus et kowan to ey, “Apo, baybay-an mo aya ita agik ka indekjas towak ka sakey kon emanposposipos sa man-obda? Ikowan mo son si-kato ey ondaw ali et todongan towak.”