4
In-arig nen Jesus sota kalasin bo-day ja naysepa-an ni botil
1 Dimaw mowan si Jesus ja en nantoro shi kilig ni baybay et esa-nop i eshakel la totoo son si-kato. Kesoreng si Jesus ey man-a-tan nodta bangka ja wara nodta shanom. Timongaw si Jesus nodtan, ey sota ira too, wara iren esalpag nodta kilig ni shanom. 2 Eshakel i intoro nen Jesus son si-kara, nem poro arig i inpaspasing ton engikowan.
Say sakey ya arig ga inkowan to son si-kara, sajay: 3 “Itnengiyo iyay! Waray too ja dimaw wa en manbangkag shi oma. 4 Idi toka pan-iwaris sota botil, wara iray nayponta shi shalan, jet kinan ira ni titit. 5 Sota eshom ma botil, nayponta ira nodta kabato-an ja ma-ingpis i bo-day to, jet timemel la shagos, tep aliwen masshel i bo-day ja nayponta-an to. 6 Nem idi simekal i sekit, nakkit sota ira timemel la botil ta eg shimalem sota damot sha. 7 Sota eshom ngon botil, nayponta ira shima similja ni sebit, jet idi bimengis iren showa, na-abak sota temel ni mola jet eg timoloy ya dimames. 8 Sota eshom ngon botil, nayponta shima mapteng nga bo-day jet simimit et kimabay. Idi dimames ma ira, waray nandames ni tedon polo, waray nandames ni enem ma polo, tan wara pay i nandames ngo ni sandasos.” 9 Jet intobtob nen Jesus ey, “Niman i waray waya jon mengitneng niyay ya naka pan-ikowan, isonga singpet jon itenengan.”
10 Idi a-abos to, inbag-an nonta sawal ni showen apostol to tan sota eshom pay si Jesus no ngarantoy olog nonta arig ja inkowan to.
11 Simongbat si Jesus ja kowan to son si-kara ey, “Si-kayo nin i naypalobos ja on-awat so ni maypangkep nonta pantoshayan nen Apo Shiyos. Nem sota eshom, arig bengat i pengitoshok son si-kara, 12 say no angken isi-ning sha, eg sha imatonan sota inon-an sha, jet angken itenengan sha, eg sha amtay olog to. Ta baka man-odi ira son Apo Shiyos et mepekawanan i basol sha.
13 “I-olog ko niman sota arig ga inkowan ko la. Nem nasshaawak tep eg jo shagos inewatan i olog to. No eg jo ewatan iyay ya arig, toy pesing jo ngarod ja mengewat ni eshom ma arig? 14 Say olog nonta arig ga inkowan ko la, sajay. Sota botil ja pan-iwaris nonta too shi oma, may-eshig ey esel nen Apo Shiyos. 15 Sota nayponta-an ni botil ja shalan, si-katoy kay-eshigan nonta ira toon naykowanan ni esel nen Apo Shiyos, nem idi itenengan sha, ondaw alin shagos si Satanas ja to dingdingen sota esel la naytoro son si-kara. 16,17 Sota nayponta-an ni botil la kabato-an, si-katoy kay-eshigan nonta toon engitneng ni esel nen Apo Shiyos ja emati ni sanka-atikan. No itenengan to, waren shagos i imdeng ton mengewat, nem eg may-a-det shi nemnem to. Isonga magenon ibi-jag to no onmotok ali sota digat to, ono okesen ni too maypangkep ni in-awat to so ni esel nen Apo Shiyos. 18 Sota nayponta-an ni botil ja similja ni sebit, si-katoy kay-eshigan nonta toon engitneng ni esel nen Apo Shiyos met laeng, 19 nem say toka nemnemnema, sota pesing ton manbiyag, sota ekanas sa biyag ni baknang, tan sota kompormin toka kamkamkami. Jet anongosto ma ey medingding sota esel nen Apo Shiyos son si-kato, jet enshi may mapteng nga pantongpalan to. 20 Sota nayponta-an ni botil ja mapteng nga bo-day, si-kato ngoy kay-eshigan nonta toon engitneng ni esel nen Apo Shiyos jet toka ewata. May-eshig ey sajay ira, waray dames sha: waray nandames ni otik, waray nandames ni kalaingan, tan waray nandames ni eshakel.”
In-arig nen Jesus sota kingki ja eg koma mesa-keban
21 Kowan pay nen Jesus ey, “Apay al-en jo aya i kingki et sa-keban jo ni timba ono idoong jo shi katiri? Ayshi met: ipa-tok jod ekayang. 22 May-a-mot i sakey ya banag say ma-okat met laeng nem sakey ya akew; sota eg ma-amta-an niman, sigoradon ma-amta-an ali. 23 Niman i waray waya jon mengitneng niyay ya naka pan-ikowan, isonga singpet jon itenengan.”
24 Inkowan to pay ey, “Singpet jon itenengan iya naka pan-ikowan, tep sota joka penokat, si-kato ngoy penokat nen Apo Shiyos no mengi-kan son si-kayo, ono sodokan to pay. 25 Sota toon mengitneng tan memati, metod-an pay. Nem sota toon endedamsis to, ja eg memati, angken sota ootik ka amta to, ma-enshi pay.” Kowan nen Jesus.
Wara pay i in-arig nen Jesus maypangkep ni pantoshayan nen Apo Shiyos
26 Inkowan mowan nen Jesus ey, “Say kay-eshigan nonta pantoshayan nen Apo Shiyos, inges to iyay. May-eshig shi toon engi-sek ni botil shi bo-day. 27 Sota too, ema-okip nem medebi jet kaonbangon nem mewa-wa, jet sota botil la in-esek to, simimit asan ma kekabay, ey eg dimbaotan nonta too i kepesing nonta botil la mandeka niyay. 28 Sota bo-day, si-katoy mengipedemes ni mola: emepangdo nin sota bolong to, asan kebosbos, jet medowem may dames to. 29 Nem angken eg to ewatan na emin, no medowem sota dames to, eni-en to tep simabi ma sota timpo ni pan-eni.”
30 Intoloy nen Jesus ey, “Itnengiyo iya ikowan kon kay-eshigi ni pantoshayan nen Apo Shiyos. 31 May-eshig nodta botil ni sakey ya kalasin mola. Sajay ya botil, no may-a-sek shi bo-day, ootilik ka pasiya, ja enshiy kay-ingesan ni ka-ootik to shiya dobong, 32 nem no onba-deg, si-katoy kabalkan so ni emin na mola. Say pangeto, ebadeg et mebedin na man-obong iray titit, shima pangpangeto, ja sotan i pansishoman sha.” Sajay day inkowan nen Jesus.
33 No mebedin ni totoon ewatan, angken pigen arig i inkowan nen Jesus son si-kara ja kait da iren ja arig ja inkokowan to la. 34 Enshiy eshom ma intoro to so ni karakdan na totoo nontan na timpo, nem eg arig ni olay. Nem idi abos sha so nonta ira too to, in-olog ton emin son si-kara.
Inpasalsheng nen Jesus i makedsang nga shagem man makedsang nga shadoyon
35 Idi mama-shem mala nontan met laeng nga akew, inkowan nen Jesus so nonta ira too to ey, “Eti, ondaw kitejo shima shemang niya baybay.”
36 Jet siya, indekjas sha ma sota eshakel la totoo. Si Jesus, ka-onong nodta bangka ja tinongawan to nontan. Jet wara pay iray kait ton bangka ja nay-olop son si-kara.
37 Idi maramen eman-ekad sota bangka ja ondaw nodta shemang, ebiglen kimedsang i shagem nodta baybay, nakol ni kepanshespega ni shadoyon sota bangka ingkatod eshogi-an ja emankepno sota bangka ni shanom. 38 Si Jesus, wara nodta obet ni bangka ja na-ogip shi kotson, isonga sha binengon, ja kowan sha ey, “Apo! Ngantoy! Shanshani kito men metey, ey eg mokito sintilen!”
39 Bimangon si Jesus et inkowan to so nonta makedsang nga shagem ey onsalsheng, tan inkowan to so nonta shadoyon ey, “Enog! Salsheng ka!” Jet simalsheng nga agpayso sota shagem jet timalna men kosto sota baybay.
40 Inkowan ma nen Jesus son si-kara ey, “Ngantoy? Entakot kayo? Ayshi pay laeng aya i pamatiyo?”
41 Etakot iren pasiya; kowan sha ni sakey tan sakey son si-kara ey, “Sipa emo iyay ya too? Toka pesalsheng iray shagem tan shadoyon et shaka pati-a!”