7
Aliwen en damsisen i eshom
1 “Karejo nemnemen i nankamali-an ni eshom ja si-katoy pengikowanan jo ma ey ngaaw ira, say eg ngo ikowan nen Apo Shiyos ey ngaaw kayo. 2 Sota wared nemnem jo ja joka pesing nga mandokod ni kowan jo ey nankolangan ni eshom, si-kato ngoy osalen nen Apo Shiyos ja pandokod to ngo ni nankolangan jo. 3 Apay nga sota ootik ka naybosi shi mata ni kait mo i moka iningning, ey si-kam ma mismo ket eg mo nemnemen ey ebadeg i naypadkal shi matam? 4 Na-alas ja mo ikowan so ni kait mo ey a-kalen mo sota naybosi shi mateto, ey si-kam ket ebadeg i naypadkal shi matam ma shorog. 5 Ngaaw ita moka pesing ja moka idibak i ngaaw wa nemnem mo! Ekal mo nin sota mismon naypadkal shi matam say kosto may pan-esas mo, et say asen mo men pasiya ja a-kalen sota naybosi shi mata ni kait mo.
6 “Nem mesepol la asen jo nin i pengipiyalan jo so ni inbilin nen Apo Shiyos, ta aliwen anam ni toon singa asoy ogadi to. No ipiyal jo son si-kara sota inbilin nen Apo Shiyos, sekitan shakejo et bengat. Kasta met no waray ensekig ga too ja singa keshel i itsora to, angken eg jo ngo ipiyal sota ebanol la maypangkep ni pantoshayan nen Apo Shiyos. Ta no sajay i pesing jo, singa joka pan-i-akan shi keshel sota ebanol la para alkos ni baro ni too. Jet sajay ya ebanol, kenshat ta damsisen mango ira nonta keshel iyay et pan-ikatin sha bengat.
Ma-ekan si Apo Shiyos
7 “No waray mesepol jo, si Apo Shiyos i panbeka-an jo, jet i-akan to. No eg kayo on-ekdas ja manshewat son si-kato, ewaten joy mesepol jo. Panogtog kayo nin et idokatan tokejo. 8 Ta emin ira sota manbeka, ono manshewat son Apo Shiyos, si-kara ngoy mengewat ni medepo son Apo Shiyos. Jet emin ngo iray menogtog, si-karay maydokatan. 9 Arig toy san-ama. Wara ayay inon-an jon nga-nga ja no manbeka so nen ameto ni tinapay ket bato i i-akan nen ameto? 10 Ono kaspangarigan ey sota anak to ket manbeka ni piskaw, apay oleg i i-akan to aya? Enshi, say i-akan nonta ama so ni anak to, sota mapteng nga ibaga to. 11 Si-kayo, angken ngaaw i aramid jo, amtayo met ja mengi-kan ni mapteng nga ibaga ni anak jo. No satan i wara son si-kayo, mas pay ya amta nen Apo Shiyos ja Amejod dangit ja mengi-kan ni mapteng nga banag so nonta emengshaw son si-kato ni kasapolan to.
Sota sakey ya epateg ga bilin
12 “Sota piyan jon pesing ni kait jon too son si-kayo, si-kato ngoy pesing jo nonta eshom. Ta si-katoy wared ma naysolat ta bilin nen Apo Shiyos, tan si-katoy kowan ira nonta para padto nonta bayag da.
Sota arig ni edipit ta shalan
13,14 “No sota maypangkep ni pengitoshong jo shi biyag ja enshiy to engintegan, may-eshig shi sakepan ja edipit. Nem sota embanaw wa sakepan, inam-ay ya panshalnan, isonga eshakel i kaonsekep nodtan. Nem sotan i mengitoshong shi kesheshalan. Sota sakepan na edipit, edigat ta panshalnan, nem sotan i mengitoshong shi biyag ja enshiy to engintegan. Aliwen eshakel i kaonsekep shi edipit, nem si-kato komay seskepen jo.
Sota arig ni mola tan sota dames to
15 “Tanshaaniyo sota kowan sha ey para padto kono ira nen Apo Shiyos nem o-owap i shaka ikokowan. No wara di ira, singa maronong ira nem mareshal gayam ira ni pamatiyo. 16 Sajay ira, say pengamta-an jo no to-to-wen para padto ira, asas jo nin i shaka dagdag-a. Say kay-eshigan ni pengamta-an jo ni itsora sha, inges to sota mola. Aliwen shi sebit i ka-epitan ni kowan sha ey obas, ono sota kowan sha ey higos. Eg ondames i mola ni dames ni sakey ya kalasi ngon mola. 17 Sota molen mapteng, mapteng i dames to, nem sota molen ngaaw, ngaaw ngoy dames to. 18 Sota molen mapteng, eg ondames ni ngaaw; kasta met sota ngaaw wa mola, eg mebedin na ondames ni mapteng. 19 Jet emin na molen eg ondames ni mapteng, mebetang ira jay jet maypool shi apoy. 20 Sajay iray kay-eshigan ni too. Ma-amta-an i itsora ni too no bidbiren i shaka dagdag-a.
Sota mayda-kam shi pantoshayan nen Apo Shiyos
21 “Isonga aliwen emin na too ja mengewag ey apo towak ket mayda-kam shi pantoshayan nen Apo Shiyos. Nem say mayda-kam, sota mengonod ni piyan nen Amak ja wared dangit. 22 No ka-onoran alin akew, eshakel i mengikowan ey, ‘Pangaasim Apo, engitosho kami met ni esel nen Apo Shiyos et inkowan mi pay ey si-kam i engibetkag son si-kami. Inosal mi pay i ngaran mon engipabtik ni dimonyo so nonta ira toon eman-engaw, tan eshakel pay i milagron kaskasshaaw ja dingka mi ni in-osal mi so ni ngaran mo.’ Sajay i idason sha ali son si-kak. 23 Nem say isongbat ko son si-kara, ‘Eg takejo am-amta, ki-nan kayod jay! Ta si-kayo, ngaaw i aramid jo nontan.’
Sota arig ey showen engitowen ni baley to
24 “Sota toon ontongpal niyay ya intenengan ton inkowan ko la, si-kato sota may-eshig ey toon waray nemnem to. Sajay ya too, may-eshig ey intowen toy baley tod naypilmin bato. 25 Jet idi imoran ali, nandayos, nem pesed ja eg na-an-ano. Angken shimagem ni makedsang, ja sini-bok to sotan na baley, eg eto-dang, ta naytowen i tokod to nodta bato. 26 Nem sota toon itenengan to bengat i inkowan ko, ja eg to pinati, may-eshig ey toon enshiy am-amta to. May-eshig ey intowen toy baley tod ma sharat. 27 Jet idi imoran ali, et nandayos, shinepos to sotan na baley. Eshagem pay sotan na baley jet kolpin etowang.”
Emin iyay, sajay i intoro nen Jesus so nonta ira too to nonta wara ired shontog.
Embelbel-at i toro ngo eshan nen Jesus