6
Sota pesing ni tolong
1 “Eg mesepol la ipa-sas joy mapteng nga aramid jod karakdan, ja kowan jo ey say i-etek shakejo nonta mengesas son si-kayo. No sotan i pesing jo, enshiy jo kon-oren ja i-akan ali nen Apo Shiyos ja Amejo shi dangit.
2 “Isonga si-kayo, no bilang ey waray tolong nga i-akan jo shi eshom ma too, eg mesepol la pa-amtayo shi karakdan, ja inges to sota kepesing ira nonta toon emengipa-sas ni mapteng nga aramid sha say eg amta-an ni karakdan ey ngaaw i nemnem sha, no wara ired sa-nopan tayon Hodiyos ono angken shima kalsaren eshakel i too. Ta say wared nemnem sha, piyan shen ishayaw ira nonta toon mengesas son si-kara. Nem podno iya ikowan ko son si-kayo. Sota ira toon sajay i itsora ni aramid sha, enshiy isobadit nen Apo Shiyos son si-kara, ta singa inewat sha lay konkona sha nonta in-etek ira ni totoo. 3 No bilang ey mengi-kan kayo ni tolong jo shi kakaasin too, eg mesepol la pa-amtayo iyay ja joka dagdag-a. No mebedin koma, angken sota kanigid ja takday jo, eg to amtay inpangi-kan nonta kanawan na takday jo. 4 Mapteng no sotan na tolong jo shi eshom ma too ket eg amta-an ni eshom, ta si Apo Shiyos ja Amejo, amta ton emin i joka dagdag-a, jet si-katoy mengi-kan ni konkona jo.
Sota maypangkep ni panshewat
5 “No manshewat kayo so nen Apo Shiyos, eg jo onoran sota kepesing ira nonta toon emengipa-sas ni mapteng nga aramid sha say eg amta-an ni karakdan ey ngaaw i nemnem sha. Say pipiyan sha ja panshewatan son Apo Shiyos, shima sa-nopan, ono shima kalsara ja karakdan ni too say asen ira nonta eshakel la too. Nem podno iya ikowan ko son si-kayo. Sotan iren too, enshiy isobadit nen Apo Shiyos son si-kara, ta singa inewat sha lay konkona sha nonta in-etek ni totoo ira. 6 No manshewat ka so nen Apo Shiyos, say pesing mo, daw ka shima kowadtom et pandekeb ka, asan ka manshawat so nen Apo Shiyos ja Amam. Jet si-kato, wara nodtan na kowadtom ni moka panshewat ni abos mo, jet si-katoy mengi-kan ni konkonam.
7 “No manshewat kayo so nen Apo Shiyos, aliwen sota enshokey ya esel ja enshiy silbi to i jo ikokowan, ja inges toy kepesing ira nonta pagano no manshewat ira nodta sinan shiyos sha. Tep say wared nemnem sha, no ishokey shay shawat sha, itenengan kono nonta shiyos sha. 8 Eg jo onoran sotan na shaka pesing, ta sota Amejod dangit, angken nonta eg jo pay laeng inkowan son si-kato, amta to i emin na mesepol jo. 9 Isonga no manshewat kayo, inges niyay i pesing jo:
‘Si-kam ma Amemi ja wared dangit, si-kam koma i mayshedjaw ni olay.
10 Sota pantoshayan mo, pasebim koma ali, jet sota piyan mo, si-katoy medeka shiya dobong, ja inges to ngod dangit. 11 I-kan mo koma sota kenen mi ni inakew. 12 Si-kam i memekawan son si-kami ni nanbasolan mi, ja inges toy mika pemekawan ni kait min too ja waray nanbasolan sha son si-kami. 13 Karam itolok koma ja manbesol kami, no diket si-kam i mengiredan son si-kami say eg kami manbesol.’
14 “Agpayso iyay ya ikowan ko son si-kayo. No pekawanan jo sota ira toon waray nanbasolan sha son si-kayo, si Apo Shiyos ja Amejo shi dangit, si-katoy memekawan ngo son si-kayo. 15 Nem no eg jo pekawanan ira sota toon waray nanbasolan sha son si-kayo, si Apo Shiyos ja Amejon wared dangit, eg shakejo ngo pekawanan shi basol jo.
Sota maypangkep ni pengibiyang ni pangan
16 “Jet, no ibiyang jo nin ja eg mengan pangkep ni pamatiyo, eg mesepol la pa-amtayo shi eshom ma too, ja inges toy kepesing ira nonta toon mengipa-sas ni mapteng nga aramid sha say eg amta-an ni karakdan ey ngaaw gayam i nemnem sha. Emedew shi dopara ey si-kara, inbiyang sha nin i pangan sha maypangkep ni pamatira. Nem podno iya ikowan ko son si-kayo. Sota ira toon sajay i itsora ni aramid sha, enshiy isobadit nen Apo Shiyos son si-kara, ta singa inewat sha lay konkona sha nonta in-etek ira ni totoo. 17 Nem si-kayo, no ibiyang jo nin i pangan maypangkep ni pamatiyo, sagaysay joy bowek jo, tan pansha-dop kayo, say sota inpangibiyang jo so ni pangan maypangkep ni pamatiyo, eg medew. 18 Mapteng no say maka-amta bengat ket si Apo Shiyos ja Amejon wared dangit. Ta si-kato, wara met laeng shita kad-an mo ni abos mo, jet si-katoy mengi-kan ni konkona jo.
Sota koston pannemnem ni too ja pengosal to ni kokowa
19 “Aliwen sota kokowa shiya dobong i jo kamkamkaman na olnongen, ta sotan iren kokowa, kesheshala ni bigis, kesheshala ni dati, tan kaibetik ni emengibot. 20 Nem say nemnemen jo et, sota pesing nga mengolnong ni kokowayod dangit. Ta shiman, enshiy onsharal so ono onkibot so. 21 Shi dangit komay wa-wa-shen pengolnongan jo ni kokowayo, ta sota kawad-an ni kokowayo, si-katoy wared nemnem jo ni olay.
22 “Sota mata, si-katoy may-eshig ey silew ni bakdang. Jet no mapteng i moka pengesas ja pesing mo ni kokowam, may-eshig ey napnoy bakdang mo ni dawag. 23 Nem no ngaaw i moka pengesas nontan na kokowa, ja piyan mon sinopen ja para son si-kam bengat, may-eshig ey emin na parti ni bakdang mo ket wared embolinget. Jet no ma-enshiy istay dawag ni nemnem mo, may-eshig ey embolinget ngon emin i kawad-an mo.
24 “Say too, eg mebedin na showay pansilbi-an to. No ensemek to sota sakey, okesen to sota maykadwa; no ishayaw to sota sakey, bedawen to sota maykadwa. Isonga eg kayo mebedin na mansilbi son Apo Shiyos no pilak i wa-wa-sha son si-kayo.
Karekayo manshanag ni kompormi
25 “Isonga say ikowan ko son si-kayo, aliwen kayo meshanagan ni panbiyag jo: no ngarantoy kenen jo, ono inomen jo, ono ibaro jo. Ta say biyag tan bakdang, epateg nem say mekan tan baro. 26 Idmang jo kari ira ja titit ja emantejatejab shi naykayang: eg ira manmoda ono mengepit, ono mengitdo ni apit shi sarosal. Nem si Apo Shiyos ja Amejon wared dangit, si-katoy ememekan son si-kara. Jet si-kayo, mas epateg i biyag jo nem say sota ira titit. 27 Sota joka panshanshanag, eg to met peshokey i biyag jo ni angken ootik. 28 Apay nga sota ibaro joy joka panshanshanagi? Asas jo kari ira sota sabsabong shima shontog; nemnem jo kari no toway toka pesing nga manbiyag. Eg met man-obda ono mengebel ni baro, 29 nem iyay i ikowan ko son si-kayo. Angken si Ari Solomon ja kabaknangan nonta bayag da, emin sota osal ton nankemapteng, eg sha pay ingesen i kamapteng ira nima sabsabong. 30 No si Apo Shiyos ket eg to i-oway sota edet shima shontog ja wara niman et no kabasan ket maypool shi apoy, sinto pay kayo mangon too to ja i-oway to. Isonga eg tokejo baybay-an. Si-kayo, ootik eshan i pamatiyo, isonga kayoka meshanagin pasiya. 31 Karekayo meshanagan ja kowan jo ey, ‘Towa emoy pengal-an da ni i-ala ni mekan?’ ono, ‘Towa emoy pengal-an ni i-ala ni ma-inom, ono ibaro?’ 32 Tep si Amejon wared naykayang, amta ton emin i mesepol jo. Sota ira toon enshiy pamatira son Apo Shiyos, anam shen si-karay manshanag ni panbiyangan sha, aliwen si-kayo.
Sota pantoshayan nen Apo Shiyos i nemnemen
33 “Nem say epateg jen mesepol la nemnemen jo, sota pantoshayan nen Apo Shiyos, tan sota mapteng ja piyan ton dag-en jo. Jet no sajay i pesing jo, emin na banag ja kasapolan jo, i-akan to.
34 “Karekayo manshanag niman maypangkep ni ma-onod alin timpo, ta shi ma-onod alin timpo, si-kato ngoy pannemnem jo ni mesepol jo no onmotok sotan ali ngon akew. Sota problima niman na akew, si-katoy nemnemen jo bengat; eg jo i-eshom i problima ja onsabi nem kabasan.