Thài Ranenh Chaq Trong Bahlac Chuaq
22
1 Hì Lè 'Benh Ùh Tah Blo khoi tenh trùh, aih hì Lè Lam Cwa. 2 'Bài pajàu càn wa 'bài thài ranenh Yothaiq chaq trong jêh đac Chuaq Jêxu, mahaq wì yùq ca mangai jàn. 3 Kiac Satan mùt ŏi enh dalam ca Juđa Ich-ca-ri-ôt, aih mòiq ngai ŏi ta mòiq jàt baiq ngai, mangai hŏc tiaq da Chuaq. 4 Juđa lam doi ca 'bài pajàu càn wa 'bài mangai wèq lình ma gŏc Hnem Cùh Waiq, trong haq jah am Chuaq Jêxu ca wì. 5 Wì manè dìq jaq, wa mòiq manoh am ca Juđa 'bac. 6 Juđa rùp bàu chaq trong jò ta'nàih jao am ca wì jah rùp Jêxu jò ùh i ca mangai bàc.7 Trùh hì Lè 'Benh Ùh Tah Blo, hì phai jêh trìu con broq Lè Lam Cwa, 8 Chuaq Jêxu thê Petrô wa Jon, tanap: “Chôp lam padon ca bèn nòi caq Lè Lam Cwa beq.”
9 Wa bòch: “Ìh enh ma lam padon ta leq?”
10 Haq tèo: “Jò chôp mùt ta phôq, hnoq mòiq ngai, mangai calô xùi cabi tùng diac, tiaq mangai aih trùh hnem leq haq mùt. 11 Chôp doi ca craq hnem: ‘Thài nhèn doi ca ìh: Adùq leq nòi Au wa mangai hŏc tiaq Au caq Lè Lam Cwa?’ 12 Craq hnem jah patô ca chôp mòiq adùq càn ŏi ta làu đòiq caq Lè Lam Cwa, wa dahwèq đòiq padon ca caq lè khoi tôm ta aih. Chôp padon ta aih beq.”
13 Wa baiq ngai, mangai hŏc tiaq aih hi loh lam. Wa haq hnoq joq troq troi bàu Chuaq ma khoi doi. Wa hi chônh padon đòiq broq Lè Lam Cwa.
Lè Caq Hiniang Hadròih
14 Trùh jò caq, wì mangai hŏc tiaq hadai ha'ngui caq ti Haq. 15 Haq doi: “Au enh caq Lè Lam Cwa cô ti pì adroi ca Au chìuq jìq xa. 16 Ma jah 'màng aih Au doi ca pì: Au pi caq lè cô ti pì hòm trùh jò leq lè cô jah gêh ŏi ta Diac Boc Plình.”
17 Chuaq dèch doi chrŏng, manè, hi khoi, Haq doi: “Yŏc cô, pì 'nèp ca dabau, 18 taiq Au doi hòm ca pì: Pang cô ta èh, Au pi ôq diac nho hòm trùh jò leq Diac Boc Plình trùh.”
19 Khoi èh, Chuaq Jêxu yŏc 'benh manè apôi Boc Plình. Haq goh 'benh axong ca 'bài mangai hŏc tiaq rai doi: “Cô chac hamac Au khoi jah am ca pì. Phai broq 'màng cô đòiq hmàng ca Au.”
20 Caq xŏng, Haq yŏc doi chrŏng am ca 'bài mangai hŏc tiaq, rai doi: “Doi cô wêh jao ma neo ta mahem Au chìuq ta-ùc thai ca pì. 21 Mahaq ta cô raq, i mangai padon blòq Au, jao am Au ca mangai ma git ca Au. Haq 'nang đòiq tì ta ca'bŏng ti Au. 22 Con Mangai cachìt tiaq bàu khoi pajaq đòiq, mahaq nan xa am ca mangai leq ma blòq Haq.” 23 'Bài mangai hŏc tiaq bòch dabau cabô ta wì haq ma broq bìac aih.
Bìac Tarahen da Mangai Hŏc Tiaq
24 Wì hadai ta rahen ca dabau bìac ta wì haq ma leq ma broq yi càn. 25 Mahaq Chuaq doi ca wì mangai hŏc tiaq: “'Bài bùa da jàn 'noiq yŏc dèh cwìang wèq jàn padip padiang, wa con jàn doi wì haq mangai broq lem.” 26 Mahaq pì ùh xài 'màng aih. Da pì phai broq 'màng cô: Cabô broq yi càn, phai broq tìah ca yi 'yoh. Cabô ma broq gàu, phai patìh tìah ca hapŏng. 27 Ma jah 'màng aih, mangai ha'ngui caq wa mangai patìh, ma leq yi càn? Ma ùh xài mangai ma ha'ngui acaq 'mòh? Mahaq Au cô 'nang rìh ŏi ta'ne pì tìah ca mangai patìh. 28 Pì mangai khoi cajap manoh tiaq Au ta jò 'bài mangai 'noiq 'bàt thù ca Au. 29 'Màng aih Au jah am ca pì Diac Au, tìah ca Baq Au khoi am ca Au, 30 đòiq pì jah caq ôq pajùm ca Au ŏi ta Diac Au. Pì jah ha'ngui ta gèq bùa đòiq hadrah mòiq jàt bai xinoi Is-ra-ên.
Jêxu Doi Adroi, Petrô Chôiq Haq
31 Chuaq doi: “Simôn ôi, Simôn ôi, cô kiac Satan bòch ùm pì, tìah ca ùm 'mau mì. 32 Mahaq Au khoi waiq khàn ca ìh đòiq manoh lùi da ìh ùh tadroq. 'Màng aih, trùh jò ìh khoi jah dêh hlài, thê ìh broq ca oh daq ìh jah cajap.”
33 Petrô doi: “Chuaq ôi, 'nhac ca au ŏi tù, loq au cachìt, xôq au tiaq Ìh.”
34 Mahaq Chuaq Jêxu tèo: “Petrô ôi, Au doi ca ìh: Hì cô, jò ia 'nhòq rŏng, ìh khoi hangah piq yàng ùh 'nì ca Au.”
35 Khoi èh, Chuaq Jêxu bòch wì: “Jò Au thê pì lam, pì ùh wê 'bac, 'bau, ùh i jep, mahaq pì hìaq thìuq cleq ùh?”
Mangai hŏc tiaq tèo: “Ùh thìuq cleq.”
36 Haq doi hòm: “Mahaq manàiq, cabô i 'bac, wê beq. Cabô i 'bau hadai. Cabô ùh i ca chang gùm, tech eo, rŏt chang gùm beq. 37 Ma jah 'màng aih, Au doi ca pì: Bàu Sech Hadròih cô jah xìt ca Au: Haq 'bìq wì 'mùt pajùm ti mangai i tôiq. Joq 'nàng bàu aih ma achìh ca Au 'nang jah xìt.”
38 'Bài mangai hŏc tiaq doi ca Haq: “Waiq Chuaq, ta cô nhèn i baiq pla chang.”
Haq tèo: “'Màng aih khoi tàu.”
Chuaq Jêxu Waiq Khàn ta Wang
39 Chuaq Jêxu tŏc ta wang Ôliu 'màng ca Haq ma loq lam dèh yôt. Wì mangai hŏc tiaq hadai lam ti Haq. 40 Trùh nòi, Haq doi ca mangai hŏc tiaq: “Waiq khàn beq, đòiq pì ùh hìaq mùt ta bìac padô 'nùt.” 41 Hi khoi, Haq lam ta kenh hangai ca wì bu mòiq atèm hmu, hacùn cràng, waiq khàn: 42 “Waiq Baq, tàng lem manoh Ìh, xìn Ìh yŏc doi chrŏng cô khoi ca Au, apaq tiaq manoh Au, mahaq tiaq manoh Baq.” 43 I 'bình plình loh enh plình tam padren ca Haq. 44 Haq mango dìq jaq, dìq ca padren waiq khàn lep hrìn, pa-ùh Haq catôh tìah ca mahem catôh ta taneh.
45 Hêq ca waiq khàn, Haq yòng lam trùh ti 'bài mangai hŏc tiaq, hnoq wì cùi jìang taiq wì mango hlòm. 46 Haq doi: “Gleq pì ma cùi? Waiq khàn beq đòiq pì ùh hìaq mùt ta bìac padô 'nùt.”
47 Jò Chuaq ŏi raq capoch, hnoq mòiq lù mangai trùh, Juđa lam adroi 'nong wì; haq mangai ta mòiq jàt baiq ngai, mangai hŏc tiaq. Juđa thia haten hìp Chuaq Jêxu. 48 Mahaq Jêxu doi ca haq: “Juđa ôi, ìh blòq Con Mangai xam nà hìp 'mòh?”
49 Mangai hŏc tiaq ma ŏi ti Haq hnoq bìac 'màng aih, wì doi: “Nhèn khòh dŏih chang ùh?” 50 Ta wì mangai hŏc tiaq i mòiq ngai yŏc chang pŏt catech ca don pah 'ma lình da pajàu ha'nhèq.
51 Mahaq Chuaq Jêxu doi: “Hêq, paq jêh hòm.” Hi khoi, Haq yŏc tì bèq don hapŏng aih; don haq hi jah brêh hlài.
52 Khoi ca aih, Jêxu doi ca wì pajàu càn, 'bài mangai ma wèq lình gŏc Hnem Cùh Waiq, wa craq broq gàu Hnem Cùh Waiq: “Gleq pì ma wê chang, wê long dùi, lam rùp Au, tìah ca trùh rùp mangai atùng 'màng cô? 53 Rìm hì Au ŏi ti pì ta Hnem Cùh Waiq, gleq pì ùh rùp Au? Mahaq jò cô, aih jò da pì, taiq cwìang Diac clam cluiq khoi am ca pì broq 'màng cô.”
Bìac Petrô Chôiq Chuaq Jêxu
54 Khoi ca rùp Chuaq Jêxu, wì 'nong Haq lam, 'ràng Haq ta hnem pajàu ha'nhèq. Petrô ta'yoi tiaq enh cloh. 55 Jò aih i wì baxù ùnh ta'ne hamlang hnem. Wì haq ha'ngui 'nhìa ùnh ti dabau. 56 I mòiq ngai hapŏng cadrì hnoq Petrô ha'ngui 'nhìa ùnh, ngan Petrô rai doi: “Mangai cô hadai ŏi ti Haq aih!”
57 Mahaq Petrô hangah doi: “Ê daq, au ùh 'nì ca Mangai aih.”
58 Mòiq rahyàc hòm i mòiq ngai hnoq Petrô, haq doi: “Ìh hadai pajùm ca Haq.”
Petrô doi: “Daq ôi, au ùh xài!”
59 Mòiq jò đùng hô atìq ca aih hòm, i mòiq ngai doi: “Hi loq, mangai cô hadai ŏi ti Jêxu, ma jah 'màng aih haq hadai mangai Ga-li-lê.”
60 Petrô ta rahen ca wì: “Daq ôi, au ùh 'nì tàng ìh doi cleq!” Petrô ŏi raq capoch, tajòi 'mòi ia rŏng hloi jò aih. 61 Chuaq Jêxu wìh ngan Petrô. Haq hmàng hlài bàu Chuaq Jêxu khoi doi adroi ca haq: “Mang cô, adroi ca ia rŏng, ìh hangah ùh loq ca Au piq yàng.” 62 Petrô drah cadàu loh enh gùng, hmoi ua-ac.
Chuaq Jêxu Chìuq Jìq Xa
63 Jò aih 'bài mangai ma rùp Chuaq, wì capoch halê Haq wa jêh Haq. 64 Wì yŏc hadret càt mat Haq, bòch halê Haq. Wì doi: “Capoch bàu loq adroi beq, doi thù cabô ma jêh ìh!” 65 Wì yŏc bàc bàu 'noiq lê Haq, capoch 'mèq hlòm ca Haq.
66 Trùh xrŏih xroq, 'bài craq broq gàu ta jàn, 'bài pajàu càn wa 'bài thài ranenh Yothaiq, tagop pajùm mòiq nòi. Wì thê 'ràng Jêxu trùh enh ngìa 'bài craq hadrah enh 'nhèq. 67 Wì bòch Haq: “Tàng joq Ìh Crich, doi ca nhèn loq beq!”
Chuaq tèo wì haq: “Tàng Au doi, pì ùh lùi. 68 Tàng Au bòch, pì ùh tèo. 69 Mahaq pàng cô ta èh, Con Mangai padon ha'ngui pah 'ma Boc Plình i cwìang itai.”
70 Dìq ca wì bòch: “'Màng aih, Ìh i joq Con Boc Plình ùh?”
Haq tèo: “Joq troi pì ma doi aih raq!”
71 Wì doi ca dabau: “Bèn pi nhet ca i mangai anoi hlài ca bèn hòm, ma jah 'màng don bèn khoi tàng bàu cla Haq doi.”