Bìac Pađim Jêh Cađac Jêxu
26
1 Jò Chuaq Jêxu khoi xŏng hnài wì dìq ca bàu aih, Haq doi dèh ca 'bài mangai hŏc tiaq: 2 “Pì loq, ŏi baiq hì hòm, trùh Hì Lè Lam Cwa, èh Con Mangai jah jao am ta tì wì ma tiang đình Haq ta long pagat.”3 Jò aih 'bài wì pajàu càn wa 'bài craq broq gàu phôq, wì tagop dabau ti hamlang enh ngìa hnem pajàu ha'nhèq Caiphe. 4 Wì pađim ca dabau chaq trong đòiq jah rùp jêh đac Jêxu. 5 Wì haq doi: “Ùh khòh broq bìac aih trom hì lè, yùq wì jàn loq baxrông tajêh.”
Jêxu Chìuq Xùt Dàu ta 'Bê-tha-ni
6 Jò Chuaq Jêxu ŏi plài 'Bê-tha-ni ta hnem Simôn, adroi nèh haq mangai bacùn. 7 I mòiq ngai gu cadrì wê cabi taboc broq xam ngŏc, tah dàu xua thùm canaq 'bac lam trùh ti Haq, ùc ta gàu Haq jò Haq 'nang ha'ngui acaq.
8 Mangai hŏc tiaq hnoq 'màng aih, loh nòih, doi: “Gleq ma ùc 'ngwan ca dàu 'màng cô? 9 Dàu cô tech jah bàc 'bac đòiq am ca mangai pa.”
10 Chuaq Jêxu loq bìac aih, hi doi ca wì: “Gleq pì ma jah broq xa ca haq? Haq khoi broq bìac lem am ca Au. 11 Ma jah 'màng aih, pì i mangai pa ŏi ti pì hloi hloi,a mahaq Au ùh i ŏi ti pì hloi hloi. 12 Haq ùc dàu xua thùm ŏi ti chac Au, aih padon catùh Au. 13 Joq 'nàng Au doi ca pì: Dìq ca crŏng taneh, jang leq Bàu Lem cô jah anoi hlài, hadai jah anoi hlài bìac gu cadrì cô khoi broq đòiq hmàng ca haq.”
Mangai Blòq Chuaq
14 I mòiq ngai ta wì mòiq jàt baiq ngai, mangai hŏc tiaq, hiniq haq Juđa Ich-ca-ri-ôt, trùh ta 'bài pajàu càn, 15 bòch wì: “Tàng au jao am ca pì Jêxu, èh pì baha au toq leq?” Wì am ca haq piq jàt capiac 'bac. 16 Pang jò aih, haq chaq jò ta'nàih đòiq jao am Chuaq Jêxu.
17 Hì baxèm Lè 'Benh Ùh Tah Blo, mangai hŏc tiaq lam haten ca Jêxu doi ca Haq: “Ìh enh waq nhèn padon Ìh caq Lè Lam Cwa ŏi ta leq?”
18 Haq doi ca wì: “Pì mùt ta phôq, glàm mòiq ngai ta aih, doi ca haq: ‘Mangai Thài doi: Jò Au ten trùh, Au wa mangai hŏc tiaq Au enh caq Lè Lam Cwa ŏi ta hnem ìh.’ ” 19 Mangai hŏc tiaq broq tiaq bàu Jêxu, padon dahwèq caq lè.
20 Trùh jò xèq, Chuaq Jêxu 'nang ha'ngui acaq ti mòiq jàt baiq ngai, mangai hŏc tiaq. 21 Jò wì caq, Jêxu doi: “Joq 'nàng Au doi ca pì, i mòiq ngai ŏi ti pì jah blòq Au.”
22 'Bài mangai hŏc tiaq loh ca mango. Tang ngai bòch Haq: “Chuaq ôi, au ùh xài?”
23 Haq doi: “Mangai leq chùq 'benh ta dòt adrình ca Au, aih mangai blòq Au. 24 Con Mangai loh lam tìah ca bàu khoi achìh ta Sech Hadròih, mahaq nan xa am ca mangai ma blòq Au! Tàng ùh xa-ông ca haq yi lem.”
25 Juđa, mangai blòq Chuaq, bòch: “Thài ôi, au ùh xài?”
Chuaq doi ca haq: “Joq 'nàng tìah ca bàu ìh ma khoi doi.”
Lè Hiniang Hadròih
26 Jò 'nang caq, Jêxu yŏc 'benh manè apôi, èh goh am ca mangai hŏc tiaq. Haq doi: “Yŏc caq beq. Cô chac Au.”
27 Haq yŏc doi chrŏng, manè apôi, èh am ca mangai hŏc tiaq. Haq doi: “Dìq ca pì ôq beq. 28 Cô mahem Au, mahem da bìac wêh jao ma neo, khoi ùc 'noh đòiq jah baxŏng tôiq ca bàc ngai. 29 Mahaq Au doi ca pì, pang cô ta èh, Au ùh ôq diac plì nho cô hòm, trùh hì Au jah ôq plì nho ma neo pajùm ca pì ŏi ta Diac Baq Au.”
30 Jò wì khoi calêu 'bŏi Hadròih, Chuaq Jêxu wa mangai hŏc tiaq Haq loh enh aih tŏc ta wang Ôliu.
Jêxu Doi Èh Petrô Hangah Haq
31 Hi khoi, Chuaq Jêxu doi ca wì: “Mang cô pì catŏih cro ta manoh taiq Au, tiaq bàu Sech Hadròih khoi achìh:
“ ‘Au jah jêh Mangai Ban Trìu,
èh trìu cadàu tac mac.’
32 Mahaq atìq ca Au rìh hlài, Au lam ta gùng Ga-li-lê adroi ca pì.”
33 Petrô doi: “'Nhac ca dìq ca wì cađac Ìh, au ùh jò leq cađac Ìh.”
34 Chuaq Jêxu doi ca haq: “Joq 'nàng Au doi ca ìh, mang cô, ia 'nhòq rŏng, ìh jah doi piq yàng, ìh ùh loq ca Au.”
35 Petrô doi ca Haq: “'Nhac ca au cachìt ti Ìh, au xôq ùh hangah Ìh.” Dìq ca mangai hŏc tiaq hadai doi 'màng aih.
Bàu Chuaq Waiq Khàn ta Wùan
36 Khoi èh, Jêxu wa mangai hŏc tiaq lam trùh ta wùan Ghêt-sê-ma-nê. Haq doi: “Ha'ngui gòm Au jang cô. Au lam waiq khàn jang tau.” 37 Haq 'ràng Petrô wa baiq ngai con Xê-bê-đê lam ti Haq. Haq loh ca mango chàu dìq ca jaq. 38 Haq doi: “Mahua Yiang Au loh ca mango trùh cachìt. Pì phai ŏi rìu ti Au ta cô.”
39 Hi khoi, Haq lam toq 'biaq hòm, cùp mat ta taneh. Haq waiq khàn, doi: “Baq ôi, tàng gleq jah, xìn dŏih doi chrŏng cô hangai ca Con, mahaq ùh tiaq manoh Con, tiaq manoh Baq.”
40 Khoi ca aih, Haq lam trùh ti mangai hŏc tiaq hnoq wì cùi. Haq doi ca Petrô: “Pì ùh jah rìu pajùm ca Au mòiq jò 'mòh? 41 Rìu beq, yòng waiq khàn, waq ca pì ùh mùt trong padô 'nùt. Manoh loq enh, mahaq chac xech ùh i cwìang 'blêq.”
42 Haq lam yàng baiq waiq khàn. Haq doi: “Baq ôi, tàng doi cô ùh jah hangai ca Con, tàng Con phai ôq, xìn broq gêh tiaq manoh Ìh.”
43 Mòiq yàng hòm Haq trùh ti wì, hnoq mangai hŏc tiaq 'nang cùi, taiq mat wì pi jah blèch. 44 Haq lam khoi ca wì, waiq khàn yàng piq, capoch bàu 'màng ca yàng adroi.
45 Khoi èh, Haq lam trùh ti mangai hŏc tiaq doi ca wì: “Jò cô pì xôq ŏi cùi padài 'mòh? Khoi trùh jò Con Mangai 'bìq jao mùt ta tì wì mangai dù. 46 Yòng beq, tau mangai blòq Au khoi trùh.”
47 Jò Jêxu 'nang doi, Juđa, aih mòiq ngai ŏi ta mòiq jàt baiq ngai hŏc tiaq trùh, 'nong wì bàc ngai wê chang wa long. Wì aih trùh enh pajàu càn wa 'bài craq broq gàu ma khoi thê wì lam. 48 Mangai ma blòq Jêxu khoi doi ca wì adroi: “Mangai leq au ma hìp Haq, aih raq Haq, rùp Haq beq.” 49 Tajòi 'mòi Juđa lam haten ca Jêxu, haq doi: “Ôi Thài!” Khoi èh hìp Haq.
50 Mahaq Chuaq Jêxu doi ca haq: “Ê bua, broq gêh bìac da ìh beq.”
Khoi èh wì rùp Jêxu. 51 Ta'ngàc jò aih, i mòiq ngai ŏi ti Jêxu yŏc chang jêh hapŏng pajàu ha'nhèq, pŏt catech ca don hapŏng aih.
52 Jêxu doi ca haq: “'Mùt hlài chang ìh ta hnup beq, ma jah 'màng aih, cabô ma wèq chang, mangai aih cachìt ca chang. 53 Ìh ùh 'nì, Au jah xìn Baq Au, tajòi 'mòi Haq jah am ca Au yi hnao ca tapèh jàt ngŏng 'bình plình 'mòh? 54 Mahaq tàng broq 'màng aih, èh jah tiaq bàu Sech Hadròih 'màng leq, bàu ma khoi doi adroi bìac cô?”
55 Jò aih Jêxu doi ca wì: “Pì wê chang wa long lam rùp Au cô tìah ca mangai atùng 'mòh? Rìm hì Au ha'ngui hnài ŏi ti Hnem Cùh Waiq. Jò aih gleq pì ùh rùp Au? 56 Mahaq dìq ca bìac cô, aih broq xìt hlài wì pajàu Boc Plình khoi achìh adroi.” Khoi èh dìq ca mangai hŏc tiaq cađac Chuaq, cadàu mot.
Chuaq Jêxu Enh Ngìa Caiphe
57 'Bài mangai ma rùp Jêxu 'ràng Haq trùh ta pajàu ha'nhèq Caiphe. Wì thài ranenh wa wì craq broq gàu phôq tagop ti aih. 58 Petrô lam tiaq Haq ŏi hangai, mùt ta hamlang pajàu ha'nhèq, ha'ngui ti wì mangai lình, waq ca jah ngan ro dìq ca bìac cô jah loh 'màng leq?
59 Wì mangai pajàu càn, xam dìq ca craq hadrah enh 'nhèq chaq mangai đòiq capoch amòng kìan Jêxu, waq ca wì jah i trong jêh cađac Haq. 60 I bàc ngai capoch amòng kìan Haq, mahaq wì chaq xôq 'nhòq hnoq i bìac cleq ma đang ca jêh Haq.
Khoi èh i baiq ngai lam trùh doi: 61 “Mangai cô doi: ‘Au jah raliang đac Hnem Cùh Waiq Boc Plình, khoi èh Au broq hlài trom piq hì.’ ”
62 Pajàu ha'nhèq yòng doi ca Haq: “Wa cô kìan Ìh 'màng aih, Ìh ùh tèo hlài 'mòh?” 63 Mahaq Jêxu ùh doi cleq.
Pajàu ha'nhèq doi hòm ca Haq: “Au thê Ìh pachac enh ngìa ca Boc Plình Ìh, doi ca nhèn loq, Ìh joq Crich Con Boc Plình ùh?”
64 Chuaq Jêxu tèo haq: “Joq troi bàu ìh khoi doi, mahaq Au doi ca pì, hì atìq pì jah hnoq Con Mangai ha'ngui ŏi ti pah 'ma Boc Plình. Haq i cwìang itai dìq dŏng, Haq lam trùh ti yùc plình.”b
65 Pajàu ha'nhèq hich dèh eo rai doi: “Haq khoi capoch bàu 'mèq đùng Boc Plình. Bèn ŏi nhet cleq ca chaq mangai kìan Haq hòm? Pì khoi tàng Haq capoch 'mèq đùng Boc Plình ùh? Pì hèm 'màng leq?”
66 Dìq ca wì tèo: “Haq đang ca cachìt.”
67 Wì cachôh ta hadrò Haq, clàc Haq wa tep Haq. 68 Wì doi: “Crich ôi, tàng Ìh Mangai capoch thai Boc Plình, thê Ìh doi ca nhèn loq cabô ma hwat Ìh beq?”
Petrô Hangah Chuaq Jêxu
69 Jò Petrô xôq ha'ngui enh gùng ŏi ta hamlang hnem, i mòiq ngai hapŏng cadrì trùh haten doi ca haq: “Ìh hadai ŏi ti Jêxu Mangai Ga-li-lê.”
70 Mahaq Petrô hangah enh ngìa dìq ca wì doi: “Au ùh 'nì tàng bàu aih.”
71 Jò haq loh ti 'mang ngo, i mòiq ngai hapŏng gu cadrì 'noiq doi ca wì ŏi ti aih: “Mangai cô hadai ŏi ti Jêxu Mangai Na-xa-ret.”
72 Mòiq yàng hòm Petrô hangah xam bàu pachac: “Au ùh loq ca Mangai aih.”
73 Atìq ca aih 'bài mangai ma yòng kenh aih doi ca Petrô: “Joq 'nàng ìh ŏi ti wì. Ìh hadai capoch bàu Ga-li-lê.”
74 Mahaq Petrô hanip wa pachac rai doi: “Au ùh 'nì ca Mangai aih.”