Bàu Pariaq Wa Bàu Pa'yèp
29
1 Mangai 'bìq tagàih lech yôt èh xôq cadoq,haq jah 'bìq raliang đac da'ngàc, ùh i ca trong jah dŏih dèch.
2 Jò mangai ta-atoq bàc tam, mangai jàn lem bùi;
mahaq jò mangai ngang dù wèq cwìang, mangai jàn hràng rayoih.
3 Mangai enh ca bìac khôn rabiaq broq dèh ca baq lem bùi;
mahaq mangai broq bua ca gu cadrì tango anang broq raliang dèh cùng hang.
4 Bùa nhò bìac ta-atoq broq dèh ca Taneh Diac hagao;
mahaq cabô bòch caq cùng rŏt manoh aih broq raliang đac.
5 Mangai 'noh bàu padô alùan dèh mangai haten hatìa,
aih tang hlàm ca haq.
6 Taiq tôiq lôi mangai ngang dù 'bìq hlech dèh rajôiq cla,
mahaq mangai ta-atoq calêu lem bùi.
7 Mangai ta-atoq ngan loq ca bìac lem jang da mangai pa;
phàn mangai dù ùh i ca manoh hèm trùh.
8 Mangai palèu baxù ùnh đòiq haq cheo phôq;
mahaq mangai khôn rabiaq broq ngach can nòih.
9 Tàng mangai rabiaq tarahen ca mangai blùng,
'nhac ca haq nòih loq do, xôq ùh jah hatenh.
10 Mangai broq ta-ùc mahem git ca mangai gêh tôm;
mahaq mangai lem jang wèq ban can rìh haq.
11 Mangai blùng pa'noh loh dèh bìac nòih;
mahaq mangai khôn rabiaq padràng đòiq.
12 Tàng bùa tamàng bàu padô 'nùt,
èh 'bài cwan haq loh ca ngang dù.
13 Mangai pa wa mangai padit padiang dìq i mòiq hiniq tìah ca dabau:
Chuaq am 'ngah ca mat wa haq.
14 Bùa leq hadrah lem jang am ca mangai pa,
gèq bùa aih jah hagao hloi hloi.
15 Long roi wa bìac tagàih lech am can khôn rabiaq;
mahaq mangai con ùh iu, broq camaih dèh ca miq.
16 Jò mangai ngang dù bàc tam, èh tôiq lôi hadai bàc tam,
mahaq mangai ta-atoq jah hnoq bìac tacro da wì haq.
17 Anoq hlài dèh con calô, èh haq jah am ca ìh bìac catèm;
haq hadai broq ca mahua yiang ìh jah lem bùi.
18 Ŏi ta leq ùh i ca bìac mahno, mangai jàn tablàq,
mahaq xôq ramŏt ca mangai leq wèq tiaq bàu ranenh.
19 Toq hnài pariaq xam bàu dech, hapŏng ùh loq iu;
'nhac ca haq loq tàng, haq xôq ùh iu tiaq.
20 Ìh i hnoq mangai renh ca capoch?
Mangai blùng ŏi jah ngèh gòm yi hnao ca haq.
21 Mangai leq loq iu tiaq dèh hapŏng enh jò ŏi 'yoh,
atìq èh hapŏng aih ngan dađeh tìah con calô da cadraq.
22 Mangai loq nòih broq loh bìac tarahen,
wa mangai nòih hôn broq loh bàc tôiq.
23 Bìac loq catèh da mangai broq ca haq loh ha'neq;
mahaq mangai i manoh paha'neq dađeh jah wì padèch tŏc.
24 Mangai leq mòiq manoh ca mangai atùng, aih git dèh ca mahua yiang;
'nhac ca haq loq bìac broq aih ùh troq, haq ùh hùa capoch 'noh bìac leq.
25 Crè ca mangai, aih khoi bet rahoch ca dađeh;
mahaq mangai leq canòm nhò Chuaq jah catèm lem.
26 Bàc ngai chaq bìac hanò da bùa;
mahaq trong lem jang da con mangai trùh enh Chuaq.
27 Mangai ùh ta-atoq aih bìac ramòt ca mangai ta-atoq;
wa mangai caq ŏi lem jang broq ramòt ca mangai ngang dù.