Bàu Pariaq Wa Bàu Pa'yèp
28
1 Mangai ngang dù cadàu mot 'nhac ca ùh i ca cabô hnan,mahaq mangai ta-atoq tanuq tìah ca baco hlari.
2 Taiq gùng broq tôiq bàc dài ma jah i bàc mangai wèq cwìang;
mahaq nhò mangai i can rabiaq wa manoh 'nì loq, taneh diac jah cajap dùnh.
3 Mangai pa padit mangai pabônh,
ùh crài cleq ca diac càn clua dŏng 'bài ngè bèn pìt.
4 Mangai cađac tiaq Bàu Ranenh, manè padèch mangai ngang dù;
mahaq mangai wèq Bàu Ranenh tajraq hlài ca wì haq.
5 Mangai ngang dù ùh loq ca bìac ta-atoq;
mahaq cabô chaq Chuaq jah loq rìm bìac.
6 Mangai pa mahaq caq ŏi lem,
yi hnao ca mangai padrŏng can mahaq caq ŏi tawech tawoch.
7 Cabô wèq tiaq Bàu Ranenh, aih con calô khôn rabiaq;
mahaq cabô broq bua ca mangai ham ca acaq, aih broq camaih dèh ca baq.
8 Mangai leq am đò 'bac đòiq caq lòi,
aih tagop đòiq am ca mangai i manoh xa-ŏch ca mangai pa.
9 Mangai leq wìh đac don ta 'noiq, ùh tamàng Bàu Ranenh,
bàu waiq khàn da mangai aih đang ca ramòt.
10 Mangai leq broq ca mangai lem jang lac ta trong 'mèq 'mac,
mangai aih jah mùt ta ralùng cla haq khoi chìa; mahaq mangai gêh tôm jah hùang phàn xôq lem.
11 Mangai padrŏng can hèm dađeh khôn rabiaq;
mahaq mangai pa i khôn rabiaq loq ro mangai aih.
12 Jò mangai ta-atoq jah ta'blêq, èh jah 'ngah 'ngai càn;
mahaq jò mangai ngang dù yòng, rìm ngai cadàu mot.
13 Mangai leq cadoc dèh tôiq lôi ùh jah i lòiq cleq;
mahaq mangai leq pa'noh wa cađac tôiq lôi jah xa-ŏch.
14 Mangai leq loq crè ca Chuaq yôt yôt jah xôq ramŏt;
mahaq mangai leq cadoq manoh jah clìh ta bìac ranàc.
15 Mangai ngang dù wèq cwìang jàn pa ùh crài cleq ca baco hlari grenh,
tìah ca higàu hnan tiaq hanùm.
16 Cwan wèq cwìang thìuq can loq 'nì padit padiang jàn;
mahaq mangai git ca cùng hang ùh lem jang jah rìh halình.
17 Mangai pòq dòih broq ta-ùc mahem èh cadàu mot trùh cachìt,
ùh khòh i cabô jùp đò haq!
18 Cabô caq ŏi lem jang jah dèch claih;
mahaq mangai lam tiaq trong jŏng jah tacro ùh ngò.
19 Mangai leq abèq dèh đùng taneh jah i dahwèq caq panàc;
mahaq mangai leq hnan tiaq bìac dech 'ngwan, jah bình halùih bìac pa.
20 Mangai wèq manoh dađeh jah xôq ramŏt bàc;
mahaq mangai leq enh renh can padrŏng ùh claih ca 'bìq baxa.
21 Gen can aih bìac ùh lem;
hadai ùh lem tàng mangai broq tôiq đòiq jah i mòiq ha'nech 'benh.
22 Mangai leq i mat caq jŏng, dahôiq yŏc cùng hang;
haq ùh loq ca bìac thìuq glàm trùh ta dađeh.
23 Cabô tagàih lech ca mòiq ngai leq, atìq haq jah bìac hanò,
aih yi hnao ca mangai yŏc rapet capoch pajìang mahaq đòiq alùan.
24 Mangai atùng dèh cùng hang miq baq,
wa doi: “Ùh i ca tôiq cleq”,
mangai aih pajùm ti mangai broq raliang.
25 Mangai padèch dađeh broq loh bìac tarahen,
mahaq mangai leq lùi canòm Chuaq jah i lòiq.
26 Mangai leq lùi dèh manoh cla, aih mangai blùng;
mahaq mangai leq caq ŏi khôn rabiaq jah dèch claih.
27 Mangai leq am ca mangai pa haq ùh hìaq thìuq cleq;
mahaq mangai leq wìh đac mat ta 'noiq, èh jah 'bìq waiq hanip.
28 Jò mangai ngang dù yòng, wì cadàu mot dŏng;
mahaq jò wì haq hù hnhung, èh mangai ta-atoq jah bàc tŏc tam.