Ranenh Bìac Cađac Mai
24
1 Jò mòiq ngai gu calô yŏc mai, èh ùh lem manoh taiq mai haq i hiniq cleq ùh troq manoh haq, èh haq achìh jàiq cađac am dèh ca mai, thê dèh mai loh khoi ca hnem, 2 hi khoi mai haq loh khoi enh hnem haq, lam broq mai mangai 'noiq, 3 tàng ŏng yàng ma baiq git ca haq, achìh jàiq cađac, thê haq loh khoi ca hnem, loq ŏng yàng ma baiq cô 'bìq cachìt, 4 èh mangai ŏng yàng mòiq pi jah yŏc hlài haq broq mai, taiq haq khoi 'bìq amùa. Tàng haq yŏc hlài, aih bìac ramòt jang ngìa Chuaq. Pì apaq broq tôiq ca gùng Chuaq Boc Plình pì ma am ca pì broq xôxech.5 Jò mòiq ngai mangai gu calô neo yŏc mai, èh apaq mùt lình lam tajêh wa apaq thê haq broq mòiq bìac 'noiq leq. Haq jah ŏi padài mòiq hanam, lem bùi dèh ti mai neo yŏc.
'Bài Ranenh Ma 'Noiq
6 Apaq yŏc da wì apao xai 'mau broq ngè baxon, ma jah 'màng aih, taiq haq aih raq ranac broq wì jah rìh.
7 Tàng i cabô rùp atùng dèh mòiq ngai oh daq, mangai Is-ra-ên, đòiq broq hapŏng, loq tech haq broq dìch, èh mangai ma atùng aih phai 'bìq hadrah jêh đac, 'màng aih pì jah 'noh đac bìac ngang dù ta'ne pì.
8 Ngan kenh 'bình bacùn oq, đòiq wèq broq tiaq rìm bìac 'bài pajàu xinoi Lêwi ma hnài pì, pì phai ngan kenh broq tiaq tìah troi au ma khoi thê wì haq. 9 Pì phai hmàng hlài bìac Chuaq Boc Plình pì broq ca Mi-ri-am ti trong beq, jò pì loh khoi enh gùng Aicàp.
10 Jò pì am ca mangai haten hatìa pì bòch đò mòiq ngè leq, apaq mùt ta hnem haq đòiq yŏc ngè baxon haq. 11 Pì phai gòm enh gùng ca hnem, èh mangai ma khoi jah am wai aih jah 'ràng 'noh ngè baxon. 12 Tàng mangai aih pa, apaq yŏc ngè baxon haq èh lam cùi. 13 Jò mahì mùt phai am hlài da haq ngè baxon đòiq haq i eo clùm jò cùi, haq waiq xôq ramŏt am ca pì. 'Màng aih jah doi: Pì jah rìh ta-atoq jang ngìa Chuaq Boc Plình pì.
14 Pì apaq jùq jàm mangai broq caq cùng ma pabônh wa nan xa, ùh kè ca oh daq cla loq mangai jàn 'noiq ŏi đò ta gùng pì wa ta phôq pì. 15 Phai am da haq cùng abroq rìm hì, adroi ca jò mat mahì clìh, ma jah 'màng aih pagah haq mangai pa, ngèh ca jah dèh 'bac cùng abroq aih. Tàng ùh am, haq creo trùh Chuaq anoi bìac pì, èh pì ep pòq tôiq.
16 Apaq taiq tôiq con ma jêh đac baq, loq taiq tôiq baq ma jêh đac con. Mangai leq i tôiq èh phai jêh đac cla mangai aih.
17 Apaq hadrah ùh ta-atoq ca mangai jàn 'noiq ta pì, loq mangai lac, wa apaq yŏc eo yôh da mangai hadrô broq ngè baxon. 18 Phai hmàng, pì khoi broq hapŏng dìch ta gùng Aicàp, wa Chuaq Boc Plình pì khoi rŏt hlài pì claih enh aih. Taiq 'màng aih, au thê pì broq bìac aih.
19 Jò pì gat 'mau ta đùng, èh troq hèt mòiq achaoq 'mau ta đùng, pì apaq wìh yŏc hlài achaoq 'mau aih. Aih jah wìa phàn da mangai jàn 'noiq, mangai lac, wa mangai hadrô, waq ca Chuaq Boc Plình am xôq ca pì ta rìm bìac da tì pì broq loh. 20 Jò pì ra'nhùn dèh long ôliu cla pì, apaq prot dŏng dìq plì ŏi top ta hamenh, aih phàn da mangai jàn 'noiq, mangai lac, wa mangai hadrô. 21 Jò pì ket dèh plì nho cla, apaq prot dìq ca plì ma ŏi rah ta long, aih phàn da mangai jàn 'noiq ŏi ta pì, mangai lac, wa mangai hadrô. 22 Pì phai hmàng ca dađeh khoi broq hapŏng ŏi ta gùng Aicàp, taiq nen aih au thê pì phai broq 'màng aih.