Anoi 'Noh Hlài Mòiq Jàt Bàu Thê
5
1 Môise creo dìq ca jàn Is-ra-ên trùh wa doi ca wì:Ôi Is-ra-ên, tamàng au anoi pa'noh ca pì bàu thê wa 'bài ranenh hì cô, đòiq pì hŏc waq ca loq wa dì tiaq rìm bìac aih. 2 Chuaq Boc Plình bèn broq wêh jao ca bèn jò ŏi ta wang Hôrêp. 3 Chuaq ùh broq wêh jao cô toq ti 'bài boc bèn calah nèh, mahaq ti bèn, aih dìq ca bèn ma ŏi rìh hì cô. 4 Chuaq enh ta'ne ùnh ta ngìa jang ca pì ŏi ta bôi wang khoi capoch ca pì, 5 jò au yòng ta'ne Chuaq wa pì đòiq anoi 'nòh bàu Chuaq, pì loq crè taiq ùnh, èh pì ùh hùa tŏc ta bôi wang. Chuaq doi:
6 “Au Chuaq Boc Plình pì, khoi 'ràng pì loh khoi ca gùng Aicàp, aih claih ca hnem broq hapŏng dìch.
7 Pì apaq cùh waiq cleq enh gùng ca Au, Boc Plình pì.
8 Pì apaq broq ca dađeh dua 'mù, hadai apaq pùng padì dua 'mù leq tìah ca 'bài ngè ta plình ha'nhèq, loq ŏi ta taneh, loq ta diac enh 'neq ca taneh. 9 Pì apaq hacùn cràng cùh waiq 'bài dua 'mù aih wa apaq patìh wì haq, ma jah 'màng aih Au Chuaq Boc Plình pì loq tagrình. Taiq tôiq boc yaq, Au baxa dìq con xau trùh piq pôn 'nhòng mangai ma git ca Au, 10 mahaq Au pa'noh can xa-ŏch xam manoh loq waq wì trùh bình ngŏng 'nhòng ca mangai loq waq ca Au wa wèq bàu thê da Au.
11 Pì apaq yŏc hiniq Chuaq Boc Plình pì ma capoch pagôq heo, ma jah 'mang aih, Chuaq joq 'nàng baxa mangai ma yŏc hiniq Haq ma capoch pagôq heo.
12 Pì phai wèq Hì Sabat đòiq wèq hadròih tiaq bàu thê da Chuaq beq, tìah troi Chuaq Boc Plình pì khoi thê pì. 13 Pì phai broq dìq dèh ca bìac ta tadràu hì beq, 14 mahaq hì ma tapèh aih Hì Sabat da Chuaq Boc Plình pì. Hì aih pì ùh jah broq mòiq bìac cleq, cla ìh, con calô, con cadrì, hapŏng calô, hapŏng cadrì, 'bo, lùa, loq mòiq toq ngè aban leq da pì, loq tamoi ŏi ta hnem pì, đòiq hapŏng calô, hapŏng cadrì, hadai jah padài troi pì. 15 Pì phai hmàng pì khoi broq hapŏng dìch nòi gùng Aicàp. Chuaq Boc Plình pì khoi yŏc tì cwìang itai 'nong pì loh khoi ca gùng aih, taiq nen aih Chuaq Boc Plình pì thê pì wèq Hì Sabat.
16 Phai iu loq waq miq baq pì troi Chuaq Boc Plình pì khoi thê, waq ca pì jah rìh halình wa i xôq ramŏt ta gùng Chuaq Boc Plình pì ma khoi hnhu am.
17 Apaq jêh đac mangai.
18 Apaq broq tôiq tango anang.
19 Apaq atùng.
20 Apaq anoi hlài bàu amòng tajraq hlài ca mangai haten hatìa.
21 Pì apaq ham ca mai da mangai haten hatìa, hadai paq ham ca đùng taneh, hapŏng calô, hapŏng cadrì, 'bo, lùa, hadai ngè leq da mangai haten hatìa.”
22 Ŏi ta bôi wang, ta'ne ùnh, yùc wa can clam clôiq, Chuaq dêh bàu capoch bàu cô am dìq ca pì, wa ùh tam bìac cleq. Khoi èh, Haq achìh bàu aih ta baiq capiac hmu, èh am ca au.
23 Jò pì tàng bàu capoch loh enh nòi clam clôiq, jò bôi wang loh ùnh, pì thia haten ca au, dìq ca mangai broq gàu hadròng hadrech wa mangai broq craq wèq, 24 hi doi: “Chuaq Boc Plình nhèn khoi pa'noh can 'ngah 'ngai wa can rahù rahìac Haq am ca nhèn. Nhèn tàng bàu Haq capoch loh enh ta'ne ùnh. Hì cô nhèn hnoq Boc Plình hatùang ca mangai, mahaq mangai xôq ŏi rìh. 25 Mahaq manàiq cô, hagleq bèn ma ep chìuq dìq jaq yat èh cachìt? Taiq ngia ùnh càn cô èh cheo bùh bèn, tàng bèn ŏi tàng bàu capoch da Chuaq yi dùnh hòm, èh bèn cachìt dŏng. 26 Ma jah 'mang aih, ta con mangai, i cabô khoi tàng bàu da Boc Plình ma rìh hloi enh ta'ne ùnh capoch loh troi bèn, mahaq xôq ŏi rìh ùh? 27 'Màng aih, ìh thia haten beq, tamàng rìm bàu Chuaq Boc Plình bèn doi, hi khoi anoi 'noh hlài ca nhèn rìm bìac Chuaq Boc Plình bèn ma doi ca ìh, wa nhèn jah tàng, èh nhèn broq tiaq.”
28 'Nang jò pì anoi ca au, Chuaq tàng bàu da pì, dài Haq doi ca au: “Au tàng bàu jàn cô hatình ca ìh. Bàu wì haq doi dìq troq. 29 Au ngèh enh jàn cô loq i manoh crè ca Au, wèq yôt bàu thê da Au, đòiq wì haq wa con xau wì haq jah xôq ramŏt hloi hloi!
30 “Lam doi ca jàn beq, thê wì hlài dèh ta traiq cla. 31 Phàn da ìh, ìh ŏi hlài jang cô ti Au. Au anoi ca ìh dìq bàu thê, ranenh, wa bìac ep broq am ca ìh, đòiq ìh hnài wì haq, đòiq wì haq broq tiaq dìq bìac aih ta gùng Au padon am ca wì haq nhàn yŏc.”