जूहन्ना
चो दुसर चिटी
मूर चो गोट
1
मय, मंडली चो धरम-सियान, हुन बाछलो बईन आउर हुनचो पिलामन* चो नाव ने, लिखेंसे, जोनमन के मय सत मया करेंसे, सोजे मय ची नाई मानतर सत के जानतो सपाय लोग बले मया करसोत।
2 आमी तुमके एईकाजे मया करुंसे कि सत आमचो ने आसे आउर हुन सत आमचो संगे अमदेया रयदे।
3 बुआ महापरभु, आउर हुनचो बेटा जीसु किरिस्त बाटले जीव-दुखतोर, दया आउर अस्तिर, आमचो संगे सत आउर मया ने बनुन रयदे।
सत आउर मया
4 मोके तुचो आदो पिलामन के, बुआ चो हुकुम असन, सत बाट ने चलतोके दखुन खुबे हरिक लागली।
5 ए मोचो बईन, एदांय मय तुमके कोनी नवा हुकुम नाई, मानतर हुनी हुकुम के लिखेंसे जोन आमके मूर ले मिरलीसे। आउर तुमके गुहारेंसे कि आमी गोटोक-दुसर के मया करुं।
6 महापरभु चो हुकुममन के मानुन चलतोर ची मया आय। हुनी हुकुम के तुमी मूर ले सुनलासाहास, आउर तुमके हुनचेई हिसाब ले चलतोर ची आय।
7 कसनबलले संवसार ने खुबे भरमातो लोग ईलासे, जोन जीसु किरिस्त के मनुक रूप धरुन संवसार ने ईलोसे बलुन नी पतेयाओत। एमन भरमातो लोग आउर किरिस्त-बयरीमन आत।
8 तुमी चेत ने राहा कि जोन मसागत आमी करलुसे हुनके फोकाहा जाउक नी दिया, मानतर हुनचो पलटा तुमके पुरा-पुरा मिरो।
9 जोन कोनी किरिस्त चो सिखिया हिसाब ले पुरे जायसे आउर हुनचोने बनुन नी रयसे, हुनचो संगे महापरभु नीआय, मानतर जोन कोनी हुनचो सिखिया ने चमकट आसे हुनचो संगे बुआ आउर बेटा दुनो आसोत।
10 कोनी तुमचो लगे एउन ए सिखिया नी देयसे, हुनके घरे बले एउक नी दियास आउर हुनके जुहार बले नी करा।
11 कसनबलले जोन बले असन लोग के जुहार करेसे, हुन बले हुनचेई संगे अडरा बुतामन ने भागी होयसे।
सरासरी जुहार
12 मोके खुबे गोटमन तुमके लिखतोर आसे, मानतर कागत आउर सियाई ले लिखुक मन नी करेंसे। मय आसा करेंसे कि तुमचो लगे एयंदे आउर छमा-छम दखुन गोटेयायंदे, जेचोले आमचो हरिक भरपुर होओ।
13 तुचो बाछलो बईन चो पिलामन बले तुके जुहार बलसोत।